Ladər Dləgəlnda
(Dəla 12:1-20)
16
1 Hya ɓəlatə hyar Abib, hya mər Ladər Dləgəlnda nə Hyel Tlakən hi, aka a tə hyar Abib nda cha fa'abiya hi zəbiya vu Masar əvu'i. 2 Hya yi hatəmachi nə Ladər Dəgəlnda nə Hyel Tlakən hi na sərshishi kəhi, wi ka tla, kətəng ndara kua, tə mbwa nda Tlakə tə tabiya ka njo həsəli nə nyi ti. 3 Ma hyo səma, ngwa hya səm na gwazhilakə nda na tləlam kwa wa, kəl ja, hanyi məɗəfa hyo səm gwazhilakə kəla tləlam, aka gwazhilakə ɓwaɓwatə nga, aka ana kusa hya ngyar Masar. Ga hya ɗənghatə ənda hya zəbiya vu Masar ma tə wur ɗa ana pi hi. 4 Ngwa nja da uya tləlam tsa hi ku dəhə hanyi məɗəfə ingə wa. Ngwa hya ngyar vi wur təkəra kumur sərshishi inda hya hatəmachi nə a ba akə nda wa.5 A da kala mələm nda Hyel Tlakən hi kwa nə hi hyo hatəmachi Ladər Dəgəlnda kwa wa, 6 kəl tə mbwa nda cho tabiya ka mbwar həsəli nə nyi. Tangnda ngə hyo hatəmachi Ladər Dəgəlnda a ba akə ma pəchi kwa gwa təɗa, tə bəji nda hyo ɗənghatə zəbiya kəhi vu Masar. 7 Hya tagu kum nda, hya ɗə tə mbwa nda Hyel Tlakən hi kwa tabiya. Ya ma vi tə wura, ba'a hya ɓəl ta hi yo madləɓa kəhi i'i. 8 Hanyi məɗəfə hyo səm gwazhilakə kəla tləlam, pəshir hanyi məɗəfəkunyi, ba'a hya tsəmiyadzə mar Hyel Tlakən hi dəhə hi, ya ngwa hya mər tlər wa.
Ladər Usaku Bəjir Fwakəu
(Dəla 34:22; Liv 23:15-21)
9 Hya jigabiya suku məɗəfə fwatə bəji nda hya hətə tlaku ka tla səuhiuhi kəhi ti. 10 Hya mər Ladər Usaku Bəjir Fwakə nə Hyel Tlakən hi təwa shili na ga'a məlməl na papa'akur nda Hyel Tlakən hi tə nə hi. 11 Hya mər hirgyaɗi mar Hyel Tlakən hi tə mbwa nda cho tabiya ka mbwar həsəli nə nyi. 12 Hya ɗənghatə ənda ɗaka ɗa, mvi'i hi vu Masar, hya ɓəlatə tsaubar inə mənakəu.
Ladər Madləɓa i'i
13 Hya səm Ladər Madləɓa i'i hanyi məɗəfa ahir ma hya tsəkənda səkə hi tə lar ga ɓəchibiya yayar anap. 14 Hya mər hirgyaɗi tə bəjir ladər nga, nahi, nguli shili kəhi, ku'imahi'i kəhi, mavi'i kəhi shili ka mahi'i, nyandəla Levi, nji shilishili, nguli maha ana mahi'ifi inda na ngya ku mələm kəhi i'i. 15 Hanyi məɗəfə hyo mər ladər ngə nə Hyel Tlakən hi tə mbwa nda cho tabiya ka njo həsəli nə nyi ti. Aka Hyel Tlakən hi kwa səkə hi papa'akur təkəra sənda hya mərəya ana a təkəra dəhə tlər cha hi, ya təwa ənga, hirgyaɗi kəhi kwa nyabiyadza.
16 Dəhə shili kwa shili mar Hyel Tlakən hi zhaka makər ku fa tə mbwa nda cho tabiya ka həsəli nə nyi ti, bəjir Ladər Kəla Tləlam, Ladər Usaku Bəjir Fwakəu ana Ladər Madləɓa i'i. Ngwa madawa shili mar Tlakə twa'atwa'a chi wa. 17 Kala ndə shili na ga'a məlməl na sənda Hyel Tlakən hi tə səkə nyi papa'akur.
Njir Tla Nəuma
18 Hya ɗəmətsə njir tla nəuma ana alenya gau i'i ku kala nyavi inda ku mələm kəhi nda Hyel Tlakən hi kwa nə hi, ya ngwa nda tla nəuma na tazhira wa. 19 Ngwa hya titikənda jiri ndara hya tazhira wa, ngwa hya dləu vangula wa, aka vangula kwa wulfənda ndər dəma ba'a cha banda ndər jiri. 20 Jiri cha ɗa ka jiri tanyi, ga hya ngya na pi, hya dləutsə hə'i nda Hyel Tlakən hi kwa nə hi.
Guhi təkəra Həsəli nə Katəu