17
1 Ngwa hya hatəmachi na tla ndara kətəng nda na tyakəm ndara nda na zə tə wa, aka sər həɗə ngə nə nyi.2 Ma nja uya vanya mala ndara sal ku huɗa hi ku vanya mələm ingə Hyel Tlakən hi kwa nə hi inga, kwa mər sə ɗimi a mar Hyel Tlakən hi, nda tə ɓəlnda mbandər nyi, 3 ya ngə cha ki həsəli nə alenya hyel i'i, wi ka pəchi, ndara hya, ndara sasəlga inda biya huɗamələm, 4 ya ngə nja shili na hi labar təkəri, hya gwa'abiya hya cha mənakəu. Macha vəlvəl a mərtə nji sər həɗə wi ngə vu Isra'ila, 5 hya həbiya mala ndara sal nda biya nya mələm ba'a vəvakənda nyi na hangu, kəl cha tah. 6 Ma nja uya matauli mətlə ndara makər təkəra ndə nda tə mər səpəla'a, ba'a nja tsəya ndər mər səpəla'a. Kəl ja, macha aka matauli zhang tanyi, ngwa nja tsa nyi wa. 7 Matauli inda ngə kwa ghəya vakə ndə nda, təvi alenya nji kwa biyama na vakə nyi. Təwa əngə hyo zhazhibiya njir mər sə ɗimi ku huɗa hi.
Nəuma inda Dza'u
8 Ma nja shili na hi nəuma inda dza'u gagaɗa ku vi nəuma kəhi, wi ka tsa ndəu, ndara kəpala, ndara nə gugurvi, ndara kala chulkə nəuma nda nji do nau tlanda kus wa, hya ma'i nə yitə mbwa nda Hyel Tlakən hi kwa tabiya ka njo həsəli nə nyi. 9 Hya ma'i nə ya mar nyandəla Levi inda pərist ana ndər tla nəuma nda nya tlər tə bəji nda. Hya yi na wula kəhi huɗən nda, ya ndo nar hi ənda njo tlanda chul ngə na nəuma. 10 A ɗatə tuku hya tla nəuma wi sənda nda nar hi hya tə mbwa nda Tlakə kwa tabiya. Hya gəla, kəl hya mərtə tang wi sənda nda nar hi. 11 Hya mər kala sənda nda dlədləɓətə hi ana nəuma nda nda tlanda. Ngwa hya shar sənda nda nar hi wa, mada təwa matsal ndara chisəm wa. 12 Ndə nda wuriya tlə mwali, ndara cha ngyar mər sənda ndər tla nəuma ndara pərist nda na tlər tə bəji nda, tuku nja tsəya nyi. Təwa əngə hyo zhazhibiya sə ɗimi vu Isra'ila. 13 Təwa ənga, dəhə nji kwa ngati, ya ləvər kwa səya nda tsa tləmwali səkəu.
Tsaubar təkəra Ngyar Təl
14 Ma hya gwa tə hə'i nda Hyel Tlakən hi kwa nə hi, ya ngə hya gwa dləuya hə'i nda ga vaviya mbwar ngya, hyo nau na, <<A mən fiya təl nə kərnəmən wi nə dəhə alənyi hə'i nda tə ɓandə mən.>> 15 Hyo nau fiya təl nda Hyel Tlakən hi kwa tabiya. Tuku təl nda cha ɗa ku huɗa kuvanəhi njir Isra'ila. Ngwa hya da fiya ndə shilishili, ndə nda pa'a ndər Isra'ila ka təl wa. 16 Dəhə ka ənga, ngwa təl nda hyo fiya da ba'a daliya taku ɗang nə kərnyi wa, ndara cha ɓəl dzəva Masar ka gwa'a alenya taku wa, aka Tlakə wurta nar hi, <<Ngwa hya ɓəl dzəva Masar səkə wa.>> 17 Ngwa cha fa'a mahi'i wa, aka kwa gwa'atə ɗufwa cha kwa ɗa naɗə tsa Tlakəu. Ngwa cha ɓutə gəna bəjingha ana azurfa nə kərnyi wa.
18 Ma cha go dzəga təlkur, tuku nja tsəfəbiya nyi gadlagadla na hya'atə tsa nyandəla Levi inda pərist. 19 Cha gəzəya likatəkatə na, nə kərnyi, ga cha kəratsəntə nyi nə kərnyi dəhə ngya nyi, ga cha nau hətə nyi səli nə Hyel Tlakən hi ana cha nəubiya dəhə gadlagadla mənakəu, ana tsaubar inə dəhəu. 20 Ngwa cha həkəra kərnyi matsa kuvanyi njir Isra'ila təwa tyatənda gadlagadla, təwa matsal ndara chisəm wa. Təwa ənga, nacha ana nyandəla cha kwa səm təlkur nə fa ɗang vu Isra'ila.