Mbaɗə kə'i Pərist ana nyandəla Levi
18
1 Njir Levi inda pərist, dəhə nyandəla Levi ma'a, a da ndo uya hə'i ka kərnənda ndara vanya sərfa'aki vu Isra'ila wa. Təvira ənga, ndo səm ku dəhə sər hatəmachi ana ga'a inda nja shili ni, nə Tlakəu, aka nacha ngə sərfa'aki kənda. 2 A da ndo uya sərfa'aki ku huɗa kuvanənda njir Isra'ila wa, Tlakə ngə sərfa'aki kənda, wi nda cha mərtə nda alkawal.3 Janə mbaɗə pərist ku sə inda nji kwa shili hatəmachi ni, ndara tla ndara kətəng; patləka cha, sərhuɗəu ana shashangha cha kya'a. 4 Hya nə nda yar tangərma nə uhi, taɗər ɓitir anap ana mal zaitun, ana tangərmar shishi nda hya sənda dzər kətəng kəhi. 5 Aka Hyel Tlakən hi tabiya tə dəhə nyandəla Levi ku huɗa njir Isra'ila dəhəu, ka mər tlər pərist nə nyi ba'anawa.
6 Ma kala ndər Levi nda tə hya'atə ku vanya mələm ku Isra'ila, ya cho i cha yatə mbwar həsəli nda Tlakə kwa tabiya, 7 cho nau mər tlər pərist tə mbwa nda cha yitə nda wi nda alenya nyandəla Levi kwa mər mar Tlakəu. 8 Cho dləutsə mbaɗə nyi məlməl na alenya pərist inda, a matsa gəna nda njir ki nyi tə nə nyi ku sə inda nda ɗəlnda.
Guhi təkəra sə inda Nji kəla zəndə Hyel kwa Məra
9 Ma hya gwa tə hə'i ngə Hyel Tlakən hi kwa nə hi nga, ngwa hya da gwa dlədləɓə sər həɗə inda njir hə'i nda kwa mər tangnda wa. 10 Ngwa nja uya vanya ndə ku huɗa hi nda kwa hatəmachi na zərsal nyi, ndara kwa nyi ku hu'u, ndara tsakəza, ndara tsa məlaga, ndara pə sənda kwa ɗa zəkəu, ndara cha fəu kərnnyi ku mutiyakur, 11 ndara cha gwa'a ɓwanya na mambəl nji kuɗəkuɗa, ndara mutiya, ndara bushin wa. 12 Kala ndə nda tə mər sə inga, sər həɗə cha mar Tlakəu, aka chulkə səpəla'a tang wi ingə ngə Hyel Tlakən hi kwa gədlə jul nji ingə biyaman hi. 13 Tuku hya ngya kəla sər ngəl mar Hyel Tlakən hi.
Ndər Mətakər
14 Jul nji ingə hyo gwa gədləbiya ngə kwa tsa kəza ndara tsa məlaga. Kəl ja, nahi nəkəhi, a Hyel Tlakən hi da dləukəri hya mər ənga wa. 15 Hyel Tlakən hi kwa hya'andə ndər mətakər nə hi wi naya aku huɗa ka zamən hi. Tuku hya səhimi da cha. 16 Aka nacha ngə sənda hya gwa'a tsa Hyel Tlakən hi a vu Horeb tə pəchir tsəmədzə nda hya na, <<Ngwa ea da ɓəla ngatə kuraka Hyel Tlakən ea səkəu wa, ndara ea ɓəla la'a hu'u nə səkə wa, ma əngə wa, eo kuɗa.>>
17 Təma ngə Tlakə tə nar ɗa. <<Sə ngə nji ingə tə na nga, mənakəu. 18 Yo hya'andə nda ndər mətakər wi naka aku huɗa kə'i zamən nda; yo fəu nyi ɓwanya ɗa ku nya cha, ya cho dəkətə nda dəhə sənda ya nar nyi cha məra. 19 Kala ndə nda pa'a səhimi da ɓwanya ɗa nda ndər mətakər nda kwa dəkə ku tləm ɗa, naya kwa jau tlakənyi na kərɗa. 20 Kəl ja, kala ndər mətakər nda tə wuriya takər ku tləm ɗa, ya a da naya tsau nyi bar wa, ndara cha takər ku tləmər alenya hyel i'i, tuku nja tsəya nyi.>>