Mələm Mbu i'i
(LikJi 35:9-34; Jos 20:1-9)
19
1 Ahir ma Hyel Tlakən hi tə zhazhinda jul nji ingə cho nə hi hə'i kənda nga, ya ma hya gədləbiya nda ga vaviya mbwar ngya ku mələm kənda i'i ana ki kənda i'i, 2 ba'a hya ɗəmtsə mələm makər tə hə'i nda Hyel Tlakən hi kwa nə hi ka nəkəhi. 3 Hya təkəbiya hə'i ngə Hyel Tlakən hi kwa nə hi ngə makərəu, kala hə'i na mələm zhang kwa, nda njo nau həya kuskusəu. Tsa'aka ma vanya ndə tə tsəya ndəu, ya a da na ikur nyi wa, cho nau hwi na pya cha yo zhang lya mələm mbu makər inda.4 Janə sənda hyo məra, ma vanya ndə tə tsəya ndəu, ya a da na ikur nyi wa, ya a vanya dawakur da tə pama nda haaɗa wa, cho nau hwi tanyi yo zhang lya mələm inda, ga cha nau mbəɗandə pya cha hinda. 5 Janə ba'ada, ma vanya ndə tə ma'i ki gəga wu kwa takə ana təwulə nyi, ngə tə ɗa cha vyaltə kəm nyi ka cho gəga wu ni, ngə kəm nda tə tsabiyadzə ga yi dəgəya təwulə nyi nda ga tsəya nyi, cho nau hwi tanyi yo zhang lya mələm inda, ya cho mbəɗandə pya cha. 6 Macha a da əngə wa, ndər kiskur kwa gədlə nyi na huɗatla ɗimiɗimi, cho səya nyi macha mələm nda naɗə gagaɗa, ya cho nau tsəya nyi madangə a da cha zandə sənda njo kina tsəya nyi təkər wa. 7 Nacha ngə sənda gwa'atə ya nar hi hya ɗəmtsə mələm makər ka mbwa.
8 Ma bəji nda Hyel Tlakən hi tə tsakətə hi hə'i kəhi wi nda cha na nə kə'i jival kəhi təwa səmfəla, ga nə hi dəhə hə'i nda wi nda cha mərtə nda alkawal, 9 ma hya ɓəlatə dəhə tsaubar inə yo nə hi ənya na, hya nyida Hyel Tlakən hi ana hya mər sə inda cho i wa'atanyi, ba'a hya tsakətə ɗəmtsə mələm makərəu. 10 Hya mər ənga, a tsa nja da ba'a kuɗənda nji kəla bikə tə hə'i kəhi, hə'i nda Hyel Tlakən hi kwa nə hi ka sərfa'aki kəhi, təwa ənga a da hyo ɗa ka njir bikə təwa tsa nji wa.
11 Kəl ja, ma ndə tə tsəya ndə na ikur nyi təwa mbuya nyi mwabu, ndara dawakur ga tsəya kuvanyi ndər Isra'ila, ga hwi tanyi yo zhang lya mələm inga, 12 ba'a njirawawa'a sə nja yi səbiya ndər tsa ndə nda hyo mələm nda, ba'a nja shili nənyi nyi nə njir kiskur nda, ga nda tsəya nyi. 13 Ngwa hya ngatə təhuɗə nyi wa. Tuku hya zhazhibiya ndər tsa ndə kəla bikəu, ga hya uya ngya mənakəu.
14 A ku sərfa'aki nda Hyel Tlakən hi kwa nə hi ka nəkəhi, ngwa hya da ghəzanda hangu gəla hi ka təwul kəhi, nda njirawawa'a tə ɗaka fiya wa.
Matauli i'i
15 Matauli zhang da nji ka njo tlanda nyi nəuma nə ndə təkəra mwararamkur ndara kala bikə nda cha mər wa. Kəl na nja uya matauli mətlə ndara makər nda tə tauli ku səsənyi. 16 Ma matauli tə tliya gəzhi nya ndəla vanya ndə təkəra mwararamkur, 17 kəl ba'a nda shili mar Tlakə kya'a nda, nda ta'i mar pərist ana ndər tla nəuma nda nya tlər tə bəji nda. 18 Njir tla nəuma inda nda gwa'abiya hya ɓwanya nda mənakəu, ya ma nda ngabiya ənda matauli nda ndər tla gəzhi cha, ya a bəra gəzhi nda cha tlandzə nyi nə kuvanyi ndər Isra'ila, 19 kəl ba'a nja tlanda nyi nəuma nə matauli gəzhi nda, ana sənda njo nda kina mərtə nyi nə ndə nda nja wula nda. Tuku hya zhazhibiya ndər mər sə ɗimi ku huɗa hi. 20 Təwa ənga, alenya nji kwa ngatə ya ləvər kwa səya nda, ya a tsə'u nji do tsakətə mər ngawa chulkə sə ɗimi ku huɗa hi wa. 21 Ngwa hya ngatə təhuɗə wa. Pi a təvira pi, li a təvira li, hir a təvira hir, chi a təvira chi, ana hi a təvira hi tsəu.