Sər fa'aki Nyandəla Levi
35
1 aku biji nda njir Isra'ila ngya tə babal Mowab nda kwa ndzam Jeriko, Tlakə tə nar nyi nə Musa, 2 <<Ka nar nyi nə njir Isra'ila ənda, nda nənyi mələm i'i anə nyandəla Levi ka nda ngya kwa, aku dəhə hə'i sər fa'aki inda nda uya. Ana mbwar ɓəla sərshishi ləha dzər mələm inda. 3 Ana ənga ndo uya mələm inda ndo ngya kwa ana mwar ɓəla tla, kətəng ana sərshishi kənda inda ndo gəzə ku ki.4 <<Mbwar ɓəla nda hyo nənyi nə nyandəla Levi kwa jiga hi 1500 fwatə ɓangtili nə mələm. 5 A biyatəya mələm nda, njo dəkətə hi 3000 təwa zədərpəchi, 3000 təwa təɗərpəchi, 3000 təwa Holma ana 3000 təwa vwa ba'a mələm nda tə ghada. ndo fiya babal nga ka mbwar ɓəla nə mələm inda.
Mələm i'i nə Mbwa
6 <<Kwa aku mələm inda hyo nənyi nə nyandəla Levi kwa ɗa ka vir mbəɗa, mbwanda ma vanya ndə tə tsəya ndəu, cho hwi tanyi yinda. Hya tsakətə nda alenya mələm 42. 7 Dəhədəhəu, tuku hya nənyi mələm 48 nə nyandəla Levi tsa'a na vir ɓəla sərshishi kənda i'i. 8 Mələm inda hyo nənyi nə nyandəla Levi ku hə'i inda njir Isra'ila tə fa'aki ni, cha ɗa məlməl na sənda kala nyandəl tə uya, ka hətə mələm ɗang tsa nji'inda na mələm ɗanghəu, mələm tsaɗə tsə'u tsa nji'inda tə uya mələm tsaɗəu.>>
9 Ngə Tlakə tə ndər na Musa ga na, 10 <<Ɓwanya nə njir Isra'ila ka Nar nda, <Ma hya dləgəlbiya Urdən gu Kan'ana, 11 hya ɗəmtsə alenya mələm inda kwa ɗa ka vir gwa'a mbəɗə kəhi, mbwa inda ma ndə tsəya vanya ndəu cho hwi ya ti. 12 Ndo ɗa ka vir mbwa a tsa ndər gwa'a kisəkur, tsa'aka ndə nda njo ngəl na tsa ndə da kwa tə təvi nja tlanda nyi nəuma biyamar nji wa. 13 Tuku hya uya mələm kwa, nə gwa'a mbəɗa. 14 Mələm mbəu inga, ka fiya makər zəbiya təwa Urdən, makər tsə'u ku Kan'ana. 15 Mələm kwa ina kwa ɗa ka vir mbəɗə nə Isra'ila, mihiɓi ana dəhə nji'inda na ngya ku pama nda, tsa'aka ma ndə tə tsəya kuvanyi, ya a da na ikurnyi wa, cho hwi ya nda.
16 << <Ma ndə tə dəgə kuva nyi ana lyang ngə lakənya tah, ndər tsa ndə cha, ya njo tsəya ndər tsa ndə nga. 17 Ndara hangu nda kwa nau tsəya ndə da ku cha vanya ndəu, ngə cha dəgə ndə ni, ngə ndə nda tah, ndər tsa ndə cha, ya ndər tsa ndə tsəu, njo tsəya nyi. 18 Macha ndara ndə tə kuvanyi na zəwa ngə ndə nda tah, ɗatə cha ka ndər tsa ndəu, ya njo tsəya ndər tsa ndəu. 19 Ndər kisəkur ngə tsəya ndər tsa ndə nga, macha uya nyi cho tsəya nyi. 20 Əngə tanyi tsə ma ndə tə tsəya kuvanyi aka a da cho i nyi wa, təwa mbəla nyi, ndara cha vakə nyi na vanya səu ya ana ikur nyi, 21 ndara təwa dəgə na chi, ngə ndə nda tah, njo tsəya ndər tsa ndə nga. Ma ndər kisəkur tə uya nyi, cho tsəya nyi.
22 << <Kəl ja, ma ndə tə tsəya kuvanyi ku tar zəndi, təwa mbəla ndara cha vakəya nyi na vanya səu, 23 ndara a da cha la'a nyi wa, ngə cha vakəya nyi na hangu ngə cha tah. Manda a da cha ndər dawa nyi wa, ya a da cha gwa'a nyi na tsa wa, 24 daɓərdzər nji kwa ndzam sə ku pama nda na ndər kisəkur nga, məlməl na tsaubar ina. 25 Daɓərdzər nji inda kwa ɓəlatə ndə nda tsəya ndə nda tsa ndər gwa'a kisəkur nda, ndo ɓəlandə nyi yo mələm uya mbəɗə nda cha hwi ya kwa. Cho ngya hinda ba'a nə biji nda gau fərist nda nja dzəvəya na mal karti tə tah.
26 << <Kəl ja, ma ndə nda tə tsəya ndə nda tə dləgəlbiya ɓəlkər mələm uya mbəɗə nda cha hwi ya kwa nda, 27 ya ngə nda ɓə na ndər kisəkur nda biyatə mələm nda, ndər kisəkur nda kwa tsəya nyi, ya a da njo uya nyi na bikər tsa ndə wa. 28 Tuku ndə nda tsəya ndə nda cha ngya ku mələm nda cha hwi ya kwa nda, kəl ahir tər gau fərist cho nau ɓəla shili ku ki nyi sər fa'aki nyi.
29 << <Inənnə ngə kwa ɗa ka tsaubar kəhi ba'a nə zamin inda kwa da shili, kala mbwa nda hya ngya ti.
30 << <Tuku nja tsəya ndə nda tə tsəya ndəu, kəl ja, kəl nja ɓwanya ku nya matauli i'i gwadangəu. Kəl ja, macha matauli zhang tanyi, a da njo tsa ndə wa.
31 << <Ngwa ka da dləu ransome təkəra pya ndər tsa ndə nda njo ki na tsəya wa. Tuku nja tsəya nyi.
32 << <Ngwa ka dləu ransome təkəra ndə nda tə hwi ka gwa'a mbəɗə ana ka ngya nyi cha ɓəla shili tə hə'i nyi təvi tər gau fərist wa.
33 << <Ngwa hi da mərtə hə'i nda hi na ngya kwa hiɗahiɗa wa. Pənda mashi kwa mərtə hə'i hiɗahiɗa, ya a da njo nau chinda mələm nda mashi tə səwandə wa, kəl təwa pənda mashi ndə nda tə pənda mashi vanya ndəu. 34 Ngwa hya da mərtə mələm nda hi na ngya kwa ana mbwa nda ya na ngya tə hiɗahiɗa wa, aka naya, Tlakəu, kwa ngya ku pama njir Isra'ila.> >>