Ma Njo Biya Ki Dla'a
20
1 Ma hyo biya ki dla'a njir dawa kəhi, ya ngə hya la'a taku i'i ana charkaina taku i'i ana ləvaləva inda tə ndəɗə nəkəhi na ɗanghəu, ngwa hya ləvər nda wa, aka Hyel Tlakən hi nda tə fa'abiya hi zəbiya vu Masar, kwa ngya tsa'a na hi. 2 Ma hyo gwa'a dzəguya dla'a, pərist kwa zəbiya ta'i biyama ba'a ɓwanya nə kə'i ləvaləva. 3 Janə sənda cho na, <<Səya ma himi njir Isra'ila, ənya hyo biya ka ki dla'a njir dawa kəhi. Ngwa ləvər ndara ɗufwa hi tsəyadzə wa, ya ngwa dza hya dzədzi ndara hya tsamtlaɗə wa. 4 Aka Hyel Tlakən hi kwa ma'i tsa'a na hi, ya cho pah tə ya hi ana cho gwa'atə hyo kura nda.>>5 Kəl wawa'ar ləvaləva kwa nar nyi nə ləvaləva, <<Vanya ndə da həriya taɗər ki ya a da cha ghəya ngya kwa wa ya? Ndəndənyi ɓəl kyo ki, ma a da wa njo nau tsəya nyi ku dla'a na, ya vanya ndə pam kwa nda ghəya ngya kwa. 6 Vanya ndə da zuya fa anap ya a da cha mbərsa nə wa ya? Ndəndənyi ɓəl kyo ki, ma a da wa njo nau tsəya nyi ku dla'a na, ya vanya ndə pam kwa nda mbərsa ni. 7 Vanya ndə da zhiya mala ka cho hə ya? Ndəndənyi ɓəl kyo ki, ma a da wa njo nau tsəya nyi ku dla'a na, ya vanya ndə pam kwa nda həbiya.>> 8 Kəl wawa'ar ləvaləva inda kwa tsakətə na, <<Vanya ndə da ləvər tə səya nyi ndara ɗufwa cha tsəyadzə ya? Ndəndənyi ɓəl kyo ki a tsa ɗufwa kuvanyi ləvaləva da tsəyadzə tə dəbar nyi tsəu.>> 9 Ma wawa'ar ləvaləva inda tə wurandə ɓwanya nə ləvaləva inda, ba'a nda ɗəmtsə gau i'i ka nda nəu na ka dzuku ka dzuku.
10 Ma hya shili ləhə dzər mələm nda hyo dla'a, hya sətə nda kurakər ngya mənakəu. 11 Ma nda dləukəri ga mbəɗiya nya mələm kənda, dəhə njir mələm nda kwa ɗaka sər cha hi, ya ndo mər tlər tuku nə hi. 12 Kəl ja, macha njir mələm nda da dləukər ngya mənakə wa, ya ngə hya gwa ku pah, hya ɓandə mələm nda təhakəu. 13 Ma Hyel Tlakən hi tə nə hi kura təkəra mələm, hya kuɗənda dəhə shili na katsakər. 14 Kəl ja, mahi'i, ngulisha'a ana dəhə sərshishi ana dəhə alenyi sər mələm nda, hya fa'atə ka kwazhaɓi nə kərnəhi. Hyel Tlakən hi ngə tə nə hi. 15 Əngə tanyi sə nda hyo mər na dəhə mələm inda naɗə dzən hi, mələm inda hyo gwa ngya kwa.
16 Kəl ja, dəhə mələm inda Hyel Tlakən hi kwa nə hi ka sərfa'aki, hya kuɗənda dəhə səpipi inda kwa. 17 Hya kuɗənda nda papatəu, dəhə njir Hivi, njir Amori, njir Kan'ana, njir Perizi, ana dəhə njir Jebusi, hya mərtə wi nda Hyel Tlakən hi tə tsau hi bar. 18 Ma a da hya kuɗənda nda wa, ndo dlədləɓtə hi dəhə sər həɗə ingə ndo mər ka həsəli nə katə kənda inga, ya cho ɗaka səpəla'a nə hi mar Hyel Tlakən hi.
19 Ma hya ɓandə mələm ka dla'a, ya ngə hya finda bəji tə mbwar pah, ngwa hya gəganda wu i'i na kəm ga hya səwandə wu inda wa, aka hyo nau səm yayar wu inda. Ngwa hya gəganda wu i'i wa, aka wu da njir dawa kəhi wa. 20 Hyo nau gəganda wu inda pa'a njo səma, ba'a latə mbwar ta'i ni, a dza ɓangtili mələm nda hyo pah nda, kəl bəji nda hya kura nda ti.