Mirga aka Ndə nda Tsəya Ndəu
21
1 Macha ɗa, nja ghahə na nja tsəya ndəu, a tə hə'i ngə Hyel Tlakən hi kwa nə hi nga, ya a ndə da zəndə ndə nda tə tsəya ndəndənyi wa, 2 njirawawa'a ana njir tla nəuma kəhi kwa biya dəkətə naɗəkura babal fwatə dzər ndə tətə nda, yi tsa'a dzər mələm inda ləhələhə tangnda. 3 Kəl njirawawa'a nə mələm nda ndiya na ləhə dzər ndə tətə nda nja ghahə nə nda, kwa səya mbugul nda pa'a nja taa mər tlər ni ya a gang da taa gyatə wulya cha wa, 4 kəl njirawawa'a nə mələm nda kwa hətə mbugul nda go dakə nda na ɓiti kwa hwi kwa, mbwa nda a nja taa zwa ndara tləka tə wa, ya kəl ba'a nda yi ndalkər wulya təkəra mbugul nda ku dakə nda. 5 Sakanda ngə kə'i pərist inda nyandəla Levi kwa biyama, aka Hyel Tlakən hi ngə tə tabiya nda ka mər tləra ana ka səkə nyi papa'akur nə nji ku tləmər Tlakəu, ana ga nda walbiya kəpala ana takasa nda ɗa kwa. 6 Kəl dəhə njirawawa'a nə mələm nda ndiya na ləhə dzər ndə tətə nda kwa chinda dza nda səya kəra mbugul nda nda ndalkər wulya ku dakə nda, 7 ba'a nda har kurakə ndo na, <<A da naea na tsəya ndə nə wa, ya a lya ea da la'a bəji nda njo tsa nyi tə wa. 8 Tlakəu, dləutsə sə nənna ka mirga a tə ya Isra'ila inda nənghə na nji, nji inda ka pəliya, ya ngwa ka fəkə nda bikə nə tsa ndə kəla bikə wa.>> Ya kəl njo zhazhinda bikər tsa ndə nda. 9 Təwa mər ənga, hyo chinda kərnəhi tsa bikər ndə nda nja tsəya tə mul nda, mana wurtə hya mərtə sənda tsa'atsa'a mar Tlakəu.Hə Mala nda nja Səya Ku Dla'a
10 Ma hya biya ka ki dla'a njir dawa kəhi, ya ngə Hyel Tlakən hi tə gwa'atə hya kura nda ga fa'atə nda aka mavi'i, 11 ma hya la'a alenya mahi'i gumaguma da ku huɗa nda ya hyo i, hyo nau həbiya nda ka mala. 12 Ka shili na cha ku ki ngha, cha shili sənda kəra cha ana cha tsəɗənda pəla cha, 13 ba'a cha səɗənda dzaki nda nja hətə nyi nə tə mbwar dla'a nda. Cho ngya ku ki nghə nə hya zhang cho sə'ingu ada nyi ana ama nyi, ahir nga, ko nau gwa da cha, ko gwa ɗaka sal nyi, nacha tsə'u cho ɗaka mala ngha. 14 Ma ka la'a a da cho ɗa nə nghə wa, wuniya nyi cha təra banda cho i ti, mana wurtə ka piya na cha, ngwa ka ɗəlnda nyi ndara ka nə nyi ɓwaɓwatə wa.
Sə nda Zə'ualə kwa Fa'aki Ni
15 Macha vanya ndə da na mahi'i nyi mətləu, ya cha ndiya nyida vanyi matsa vanyi, ya kya'a nda nguli shili da tsa nda, ngə tə ɗa mala nda pa'a cho nyida nda ngə amanya zə'uala, 16 ma cho təkə sərfa'aki nə nguli shili nyi, ngwa cha da wuriya hətə sə nda nə zə'ualə nda ba'a nə nyi nə zər mala nda cha ndiya na nyida nda wa. 17 A ɗatə tuku cha nə nyi mbaɗə zə'uala, a nə zər mala nda pa'a cho nyida nda, cha nə nyi zhaka mətləu ku dəhə sənda nənyi. Aka zər nga nacha ngə tangərmar dunama nyi, sənda nə zə'ualə tsəu, nə nyi nga.
Zər Sal nda kwa Tləmwali
18 Macha vanya ndə da na zərsal nda pa'a kwa ngatəndəra ya kwa tləmwali, a da cho nəu nya ada nyi ana ama nyi wa, ya mada nda ɓu nyi a cho sha nyar wa, 19 ada nyi ana ama nyi kwa səya nyi ba'a shili nacha huɗə njirawawa'a tə lakur gwa ku mələm. 20 Ndo shili nar nyi nə njirawawa'a inda, <<Zər kəea nə da kwa ngatəndər wa, ya cho tləmwali. A da cho nəu nya ea wa. Ndə banghuɓə na, ya ndər wi tsəu.>> 21 Kəl dəhə njirawawa'a mələm kwa vəvakənda nyi na hangu. Tuku hya zhazhibiya ndər mər sə ɗimi ku huɗa hi. Dəhə njir Isra'ila kwa ngati, ya ləvər kwa səya nda.
Alenya Gadlagadla
22 Macha vanya ndə tə mər mwararamkur, ngə nja tsəya nyi təwa kukwanda nyi kyatə udzəm, 23 ngwa hya ngyar gunduɓər dza cha hanyi kyatə udzəm nda wa. Hya haɗənda nyi pishinda tanyi, aka dəhə ndə nda nja kukwanda kyatə udzəm, a da kiɗa shu'u Hyel cha. Ngwa hya da dyaɓəndə hə'i nda Hyel Tlakən hi kwa nə hi ka sərfa'aki wa.