22
1 Ma hya la'a tla ndara kətəng sasa nə kuvanəhi ndər Isra'ila, ngwa hya da shanda ma hi wa, kəl ja, hya səya hya shili nə nyi nə tlakə nyi. 2 Kəl ja, macha tlakə nyi da ləhə wa, ndara a da hyo zəndə tlakə nyi wa, hya təra nə hya ki gəzəya ku ki kəhi kəl sakanda tlakə nyi tə shili gwa'a, ba'a hya nə nyi. 3 Əngə tanyi hya məra, ma hya uya kwara, ndara daura, ndara kala sər kuvanhi ndər Isra'ila nda tə sa. Ngwa hya shanda ma hi wa.4 Ma hya la'a kwara ndara tla nə kuvanhi ndər Isra'ila tə dla ku laku, ngwa hya shanda ma hi wa. Hya hagwa nyi chi cha hya'atə tə hya cha.
5 Ngwa mala da ha dzaki sal wa, ya ngwa sal da ha dzaki mala wa, aka Hyel Tlakən hi kwa həɗə tsa chulkə sə wi inga.
6 Ma hya uya ki eakəu nya laku, ndara kyo wua, ndara hu'i ana ama amanyi təkəra hihi ndara ngulisha'a, ngwa hya fa'aya ama ana nguli ngulinyi wa. 7 Hyo nau fa'aya nguli ngulinyi ba'a ngyar ama amanyi cha təra, təwa ənga hyo uya ngya mənakəu ya pya hyo təɗardza.
8 Ma hyo hər taɗər ki, a ɗatə tuku hya hərtə gangama kyatə kəra vi kəhi, məlna mada vanya ndə tə təɗə səya kyatə kərapakə kəhi ga tah, a njo səya hi na bikə wa.
9 Ngwa hya tləka chuli pampam mətlə ku fa anap kəhi wa, ma hya mər ənga, sə inda hya tləka inda kya'a, ana sakəda nyi nda hyo nda məriya, kwa ɗa ka sə hiɗahiɗa.
10 Ngwa hya daɓiya kwara ana tla ka hya zwa nə wa. 11 Ngwa hya ha dzaki nda nja tsatə na ul ba'a lilin ku chir zhang wa.
12 Hya tsatə buzər tə nyachira məngum fwaɗə nə daura kəhi.
Tsaubar inda Təkəra Kasalikur
13 Ma ndə tə həbiya mala nyi, ahir cha piya nacha, ngə cha la'a tsə'u cho i nyi wa, 14 ngə cha wula nyi təkəra sər kuzhi, ga na, <<Ya həbiya kwa na, kəl ja, nda ya gwa piya na cha, a da ya həya nyi tsəkətsəkə wi kwapəlyakə wa,>> 15 kəl ba kə'i ada nyi ana amanya kwa nda, kwa shili na sənda kwa chari ənda kwa kənda tsəkətsəkə tanyi təvi cha ɗəuwa a biya nya mələm mar njirawawa'a mələm nda. 16 Kəl adanya kwa nda kwa na, <<Ya ɗəunda nyi kwa ɗa nə sal na, kəl ja, a da cha i nyi wa. 17 Sakana, cha tlandzə nyi gəzhi ga na, <A da ya həya kwa nə tsəkətsəkə wi kwapəlyakə wa.> Kəl ja, janə ya shilitə na sənda kwa chari ənda kwa ɗa tsəkətsəkə tanyi macha ɗəuwa.>> Kəl njir yah kwa nda kwa hyanda sər sətə sərpiya nda mar njirawawa'a mələm nda, 18 kəl njirawawa'a mələm nda kwa səbiya sal kwa nda na wuɗa. 19 Ndo tlanda nyi ki səu nə kwaba azurfa shekel 100, ba nda hətə kwabakwaba nyi ba nə nyi nə adanya kwa nda, aka sal nda tə səwandə tləmər kwa Isra'ila, ya a da cha nji ka gədlənda kwa nda ma a wur ɗa ana pi cha wa.
20 Macha tsəu, sənda sal nda na nda ngə jiri, ya səda nda tə chari ənda kwapəlyakəkur kwa nda tsəkətsəkə tanyi wa, 21 njo shili na kwa nda nya nyaki ada nyi, a tangnda shili mələm nda kwa vevakənda nyi na hangu, kəl nacha tah. Aka a mərtə cha zawarkur tsə'utanyi ku ki ada nyi. Təwa əngə hyo zhazhibiya sə ɗimi ku huɗa hi.
22 Ma nja səya vanya ndə kwa piya na mala vanya ndəu, tuku nja kuɗənda sal nda ana mala nda kya'a nda. Təwa əngə hyo zhazhibiya sə ɗimi ku huɗa hi.
23 Ma vanya sal tə ɓə na kwapəlyakə nda vanya sal tə zhiya ka mala ha ku ta mələm, ga piya nacha, 24 hya səya nda kya'a nda biyanya nya mələm nda, ba'a vəvakənda nda na hangu, kəl nda kuɗa, aka kwa nda ku ta mələm cha, ya a cha lələ ka nja dləuya nyi wa, ya sal nda tsə'u səwandə tə mala vanya ndəu. Təwa əngə hyo zhazhibiya sə ɗimi ku huɗa hi.
25 Kəl ja, ma sal tə piya na kwapəlyakə nda vanya sal tə zhiya ka həa, a biya tə ya mələm na hatləu, kəl sal nda mər sə nda tanyi njo tsəya. 26 Ngwa da hya tsəkar mala nda wa, aka nacha mər səpəla'a wa. Chul ngawa səu məlməl tanyi na ndə nda mbuya təwulə nyi ga tsəya nyi. 27 Aka sal nda mbuya mala nda biya tə ya mələm, ya madangə a lələ tə cha, a nacha uya ndər dləuya nyi wa.
28 Macha vanya sal tə piya na vanya kwamalakə nda pa'a vanya sal tə zhiya ka mala hə nyi a biya tə ya mələm, ya ngə nja fa'atə nda, 29 sal ndo kinda kwaba shekel azurfa 50 nə adanya kwa nda. Tuku kəl nacha həbiya kwa nda, aka wurtə cha səwandə nyi. A da cho wuriya gədlənda kwa nda ma a wur ɗa ana pi cha wa.
30 Ngwa ndə da hə mala ada nyi wa, ngwa cha da həyatə gangər ada nyi wa.