Chulkə Nji inda njo Gədləbiya ku Daɓədzər Nji
23
1 Kala ndə nda nja tasəya ndara tlabiya kiɗa cha do gwa ku huɗa daɓədzər njikə Tlakə wa.2 Mazagwa do gwa ku daɓədzər njikə Tlakə wa, mada nyandəla cha tsa'a biyatə zamin kuməkunyi do gwa ku huɗa daɓədzər njikə Tlakə wa.
3 Ndər Amon ndara ndər Mowab, ndara kala nyandəla nda, mada biya tsa'atə zamin kuməkunyi do gwa ku huɗa daɓədzər njikə Tlakə wa. 4 Aka a da nda biya lali hi na sərsuma ndara ɓiti, ku nda hyo zəbiya vu Masar nda wa, a təvira əngə ma'a, nda ki gədiya Bala'am zər Beyor vu Petor ku Mesopotamiya na kwaba ka cha shi'unda hi. 5 Dəhə ka ənga, Hyel Tlakən hi da səhimi da Bala'am wa, kəl ja, cha shandə shi'u nda cha shi'u hi nda ka papa'akur, aka nyida nda Hyel Tlakən hi kwa nyida hi. 6 Ngwa hya gwa'a dlə bazhikur ka nda ku ngya kəhi pa'a wa.
7 Ngwa hya ngyar njir Edom wa, aka njikə njikə hi. Ngwa hya ngyar njir Masar wa, aka mərtə hi mihiɓikur tə hə'i kənda. 8 Makərkunya nyandəla nda kwa nau gwa ku daɓədzər njikə Tlakəu.
Nja Tsamartə Ngakə Ləvaləva Chaməu
9 Ma hyo biya ka ki dla'a, hya ɗa naɗə tsa kala sə ɗimi. 10 Macha vanya ndə da ku huɗa hi tə dyaɓəndə kərnyi təwa pə nda tə biya ku dza cha vu'i, cha təra biyatə ya ngakəu, cha biya ngya biya nda. 11 Ma akə kaɗə ɗa, cha chinda kərnyi, ma pəchi tə təɗa, ba'a cha ɓəl gu ngakəu.
12 Hya ɓatlətə vanya mbwa biyatə ya ngakə aka mbwar nji kunyi. 13 Hya hətə chakwa tsa'a na balmi kəhi ka la ka'u, ma hya njinda kunyi, ba'a hya labiya ka'u hya haɗiya sənda tə biya ku dza hi nda. 14 Aka Hyel Tlakən hi tsa'a ka hi ku ngakə kəhi aka ga cha ɓəlatə hi ana ga cha nə hi gyalkur kura njir dawa kəhi. Ngakə kəhi cha ɗa chaməu, məlna a cho la'a sə hiɗahiɗa ku huɗa hi ba'a shanda ma cha wa.
Alenya Gadlagadla
15 Ma mava tə shili mbu tanyi ku huɗa hi, ngwa hya ɓəlandə nyi nə tlakən nyi wa. 16 Hya ngya nyi cha ngyo huɗa hi wi nda cho i, ana ku kala mələm nda cha tabiya. Ngwa hya lidiya nyi na tlər wa.
17 Ngwa sal ndara kwa Isra'ila da ɗa ka zawar mbwa'alə katə wa. 18 Ngwa hya shili na sər ha ku himi zawar sal ndara mala ku Mbwa'alə Hyel Tlakən hi ka nyabiya salkur wa, aka Hyel Tlakən hi kwa həɗə tsari kya'a.
19 Ma hya nə nyi yavə nə kuvanhi ndər Isra'ila, ngwa hya dləu zhar tsa cha təkəra sə nda nə nyi yavə nə wa, mada kwaba, ndara sərsuma ndara vanya sə nda tsa'aka njo gwa'a zhar təkəri. 20 Hyo nau dləu zhar tsa ndə shilishili, kəl ja, ngwa hya dləu tsa kuvanhi ndər Isra'ila wa, təwa ənga, Hyel Tlakən hi kwa səkə hi papa'akur təkəra dəhə sənda hyo mər tə hə'i ngə hyo gwa dləuya nga.
21 Ma hya hətə salkur mar Hyel Tlakən hi, ngwa hya findadzər nyabiya wa, aka Hyel Tlakən hi kwa səkə salkur kəhi, ya ma a hya nyabiya wa, cho ɗa ka səpəla'a nə hi. 22 Kəl ja, ma a hya hə salkur wa, a da hya mər səpəla'a wa. 23 Kala sənda nya hi tə pəbiya, tuku hya nyabiya, aka nya hi nga pəbiya na ikur kəhi mar Hyel Tlakən hi.