24
1 Ma vanya sal tə həbiya mala, ya ngə cha nda la'a a tsə'u cho i mala nda wa, aka vanya sənda cha la'a ku cha, ngə cha ɓəliya sar ga nə nyi nə mala nda, ga gədlənda nyi, 2 ahir cha biya ku ki sal nda ga ki hə vanya sal, 3 ngə mətləkunya sal nyi da i nyi wa, ngə cha ɓəliya sar ga nə nyi nə mala nda, ngə cha gədləbiya nyi ku ki nyi, ndara tsə'u sal nda tə tah, 4 sal nyi nda gədlənda nyi tangərma da kwa ɓəla hə nyi səkə wa, aka vanya ndə səwandə nyi ti. Sə ngə kwa ɗa sə hiɗahiɗa mar Tlakəu. Ngwa hya shili na chulkə ngə na səpəla'a tə hə'i ngə Tlakə kwa nə hi ka sərfa'aki ngə wa.5 Ma sal tə təka hə mala, ngwa nja fəu nyi ku huɗa nji indo biya ki dla'a, ndara nja fəkə nyi təkəra vanya tlər wa. Fa patlu, nja ngya nyi ku ki, ka ga cha uya lakur mərtə ɗufwa mala nyi nda cha həbiya nda twasəu.
6 Ngwa hya hətə bəra ndara hangu bəra ka sər dangul yavə wa, ma hya mər ənga, a mbuya tə hi shala səm ki nda ndani.
7 Ma hya səya ndər həl ndəu, ya cha həltə kuvanhi ndər Isra'ila, ndara cha fiya nyi ka mava, ndara cha ɗəlnda nyi ka mava, tuku nja tsəya ndər həl ndə nda. Təwa əngə hyo zhazhibiya sə ɗimi ku huɗa hi.
8 Ma shiləkə bibi tə səya ndəu, hya gəla kəl na hya ɓəlatə sə inda pərist inda nyandəla Levi tə nar hi tsa'atsa'a, tuku hya ɓəlatə sə inda ya tsau nda bar mənakəu. 9 Hya ɗənghatə sənda Hyel Tlakən hi tə mərtə nyi nə Miriyam ku laku sakanda hyo zəbiya vu Masar.
10 Ma hyo nə nyi yavə nə kala sə nə təwul kəhi, ngwa hya gwa ku ki kənda ka hya gwa hətə vanya sə nda nja nar hi ka sər dangul yavə wa. 11 Hya ta'i biya, ba'a hya ngyar təwul kəhi nda gwa zəbiya nahi səsənyi na kərnyi. 12 Macha təwul nghə ndə ɗaliɗali cha, ngwa hya i səsənyi hanyi tsa hi wa. 13 Hya ɓəlandə nda sər tul kənda ma pəcho gwa təɗa, ka ga nda gwa piya ta nda kwa. Ma hya mər əngə ndo usaku hi, ya Hyel Tlakən hi kwa jigau sə nda hya mər nda ka sə tsa'tsa'a.
14 Ngwa hya ɗiya ndə ɗaliɗali nda biya ka zwa gədi, ndara kuvanhi ndər Isra'ila, ndara ndə shilishili nda na ngya ku mələm kəhi i'i wa. 15 Hya kinda nda wazəba kənda kala bəji təvi pəcho gwa təɗa, aka nji ɗaliɗali nda, ya chul tlər wi ingə ngə kwa gəzə nda. Ma a da wa, ma nda tiwi nə Tlakə təkəra hi, cho ɗaka səppla'a nə hi.
16 Ngwa nja tsa njir yah aka səpəla'a ngulisha'a kənda wa, ya ngwa nja tsa ngulisha'a aka səpəla'a njir yan nda wa. 17 Ngwa hya guratsəya sər nji shilishili, ndara sər nguli mahə wa, ya ngwa hya dləu gadəmbul mahi'ifi ka sər dangul wa. 18 Hya ɗənghatə ənda ɗakaɗa mavi'i hi vu Masar, ya ngə Hyel Tlakən hi tə pəliya hi vu nda. Nacha gwa'atə ya nə hi gadlagadla nənna.
19 Ma hyo mər sakədar fa kəhi sho ki, ya ngə hya far na vanya dəmadəma ku fa nda, ngwa hya ɓəl gwa hə wa. Ngya nyi ma ni nə nji shilishili, ndara nguli maha, ndara mahi'ifi, ka ga Hyel Tlakən hi səkə hi papa'akur təkəra dəhə sə nda hyo mər na cha hi. 20 Ma hyo ndəva yayar zaitun səya kyatə wua, ngwa hya ɓəla zharəu nəu cha wu səkə wa, hya ngya nyi ni nə nji shilishili, nguli maha ana mahi'ifi. 21 Ma hyo ɗəmə yayar anap, ngwa hya zha ɗəmə səkə wa. Ngyar ma sənda tə həyadzə nə nji shilishili, nguli maha ana mahi'ifi. 22 Hya ɗənghatə ənda ɗakaɗa mavi'i hi vu Masar, ya ngə Hyel Tlakən hi tə pəliya vu nda. Nacha gwa'atə ya nə hi gadlagadla nənna.