25
1 Ma kəpal tə ɗa ku pama njir Isra'ila mətləu, ngə nda shili nə ku vi nəuma, ngə njir tla nəuma tə tlanda nda nəuma, ga wuniya ndə kəla bikəu, ga nə nyi bikə nə ndər bikəu. 2 Macha tsa'aka njo dəgə ndər bikə nda, njir tla nəuma kwa nar nyi cha piya tsupətənya, ba'a nda səbiya nyi na shuwa. Ɗangkura dəgə nyi kwa ɗa məlməl na ɗangkura bikə nda cha məra. 3 Kəl ja, ngwa nja sənyi na shuwa ndiya fwaɗəkumnyi wa. Ma nja dəgə nyi ndiya fwaɗəkumnyi, səli kuvanhi ndər Isra'ila kwa tsəyadzə mar nji.4 Ngwa hya mbu nyi mbəl ku nya tla ma hyo dəgə uhi na cha wa.
Gadlagadla Təkəra Ɓwatsər
5 Ma kə'i zama na zama kwa ngya ka sərfa'aki zhang, ngə vanya zama tə tah, ya a da cha yiyah zər wa, malatəsal nda do hə vanya sal nda pa'a njikə sal nyi wa. Tuku zamnya sal nyi həbiya mala nda, aka sənda zamnya sal kwa kina mər nga. 6 Zərsal tangərma nda mala nda kwa yiyah, kwa ɗaka zər ndə nda tə nda, məlna a nji do far na sal nda vu Isra'ila wa.
7 Kəl ja, macha zamnya sal nyi nda da i hə nyi wa, kəl mala nda kwa biya həya njirawawa'a biyanya nya mələm, ba'a nar nda bəra, <<Zamnya sal ɗa do i cha tuliya tləmər zamə nyi vu Isara'ila wa, ya a cho i cha piya na ya wi sə nda zamnya sal kwa kina mər wa.>> 8 Kəl njirawawa'a inda kwa nga sal nda zəbiya ba'a ɓwanya nə nyi, dəhə ka əngə macha ngyar ga na, <<A da yo i ya hə nyi ka mala wa,>> 9 malatəsal zamə nyi nda, kwa hya'atə ba'a yi da cha mar njirawawa'a inda, cho səɗəbiya ɓiɓi zhang ku hya sal nda, ba'a təfəu nyi tiwuli ku huɗəma cha, cho na, <<Əngə tanyi sənda njo mərtə nyi nə sal nda pa'a tə i zamə nyi uya nyandəla cha.>> 10 Njo nga tləmər ki ndə nda vu Isra'ila, Ki Ndə nda nja Səɗəbiya Ɓiɓi nyi.
Alənya Gadlgadla Mətləu
11 Ma shili ki mətlə kwa pah, ngə mala vanya ndə lya nda zəbiya ka cho hala nyar sal nyi təwa mutsə kiɗa vanya sal nda, 12 tuku hya tlanda cha mala nda. Ngwa hya ngatə təhuɗə nyi wa.
13 Ngwa hya fa'a sər dəkə tədəɓəkura sə mətlə ku mbəl kəhi, zhang kakafə nyi zhang tədəbə nyi wa. 14 Ngwa hya fiya kətas dəkə sə mətlə ku ki kəhi, zhang kushə nyi zhang dəgal nyi wa. 15 Hya mər tlər na sər dəkə tədəɓəkura sə nda tsa'atsa'a ana kətas dəkə sə nda məlmələu, ka ga pya hi təɗardzə tə hə'i nda Hyel Tlakə kwa nə hi. 16 Aka Hyel Tlakən hi kwa həɗə tsa dəhə ndər ɗa ndəu.
Nja Dlənda Dəhə Njir Amalek
17 Ɗənghatə ma sə nda njir Amalek tə mərtə hi ku laku, bəji nda hya kwa zəbiya vu Masar nda. 18 Nda mbuya hi mwabu, ga kuɗənda nji inda həɗa kwa dəɓa biyahi, a da nda na ləvər Hyel wa. 19 Aka əngə ja, ma Hyel Tlakən hi tə nə hi ɓəlsar tsa dəhə njir dawa kəhi tə hə'i nda cho nə hi ka sərfa'aki, hya zhazhinda dəhə njir Amalek tə dunəya. Ngwa hya da ba'a far wa.