Yar Tangərmar Səzwazwa ana Zhang Ku Kuma
26
1 Ma hya gwatə hə'i ngə Hyel Tlakən hi kwa nə hi ka sərfa'aki nga, ga dləuya ga vaviya mbwar ngya kwa, 2 hya gwa'arə yar tangərmar dəhə sə zwazwa nda tə hə'i nda Hyel Tlakən hi kwa nə hi nda, ba'a pəu ku tsəla. Ba'a hya hətə yatə mbwa nda Hyel Tlakən hi kwa tabiya ka njo həsəli nə nyi ti. 3 Hya yi həya pərist nda nya tlər tə bəji nda, ba'a hya na, <<Ənya a pəbiya tə ya a mar Hyel Tlakə ɗa, ənda a shili tə ya tə hə'i nda cha səmnda nyi fəla nə kə'i jival kəmən.>> 4 Pərist nda kwa dləutsə tsəla nda ku cha hi, ba'a fiya hu'i biyamar dzəgana Hyel Tlakən hi. 5 Kəl hyo na mar Hyel Tlakən hi, <<Jival kəea ndər Arami, ndər ma'i kəɓang cha, cha ma'i gwa Masar ana nji yiɗau, ga gwa ngya ku nda, ngə nda ɗaka hə'i dəgaləu, ga ɗa na dunama ga yatəkər. 6 Kəl ja, njir Masar tə ɗali na ea, nda fəu ea ku ɓwaɓwatəu ga lidiya ea na tlər gagaɗa. 7 Kəl ngə ea tiwi nə Tlakəu, Hyel nə kə'i jival kəmən, ngə Tlakə tə ngatə tiwi kəea ga la'a chul ɓwaɓwatə nda ea kwa, ənda nja kwa lidiya ea ana ənda njo ɗa məndzau na ea. 8 Ngə Tlakə tə fa'abiya ea ana gyalkur dəgal ba'a dunamar kərnyi, ana sər ləvəra, sər muniya i'i ana səshinshin i'i. 9 Cha shili na ea tə mbwa na ga nə ea hə'i na, hə'i nda 'ua ana mwamwa kwa hwi kwa, 10 nacha nə ya shili na nghə yar tangərmar sə zwazwa nda ka na'a Tlakəu.>> Kəl hyo fiya tsəla nda səya mar Hyel Tlakən hi, ba'a hya hətə nyi səli. 11 Nahi kə'i nyandəla Levi ana nji shilishili inda ku huɗa hi, hya mər hirgyaɗi təkəra dəhə sə mənakə inda Hyel Tlakən hi tə nə hi, ana nə dəhə njir ki kəhi.12 Kala makərkunya fa, nacha ngə fa nda hyo hə zhang ku kumə kwa, ma hya həbiya zhang ku kuma nə kala sə zwazwa nda hya zuya, hyo shili nə nyi nə nyandəla Levi, nji shilishili, nguli maha ana mahi'ifi, ga nda səm nda nyi ku mələm kəhi i'i. 13 Kəl hyo na mar Hyel Tlakən hi, <<A həbiya tə ya mbaɗə nda karti ku kiɗa, ga nə nyi nə nyandəla Levi, nji shilishili, nguli maha ana mahi'ifi, wi sənda ka tsau ea bar. A naya ɓəlnda gadlagadla nghə ndara ya far na mada zhang wa. 14 A da ya səmnya mbaɗə nda karti ku bəji nda yo sə'ingua, ndara ya həbiya vanya sə kwa ku bəji nda ya hiɗahiɗa ma nghə wa, ndara ya zəba sə ni nə njikə mambəl wa. A nəu tə ya nya Hyel Tlakə ɗa, a mərtə tə ya dəhə sə inda ka tsau ɗa bar. 15 Ndzamar ea səya kya huɗamələməu, mbwa karti nda kə na ngya ti, ka səkənyi papa'akur nə njir Isra'ila nji ngha, ana təkəra hə'i nda ka nə ea təwa alkawal səmfəla nə kə'i jival kəea, hə'i nda 'ua ana mwamwa kwa hwi kwa.>>
Ɓəlatə Gadlagadla Tlakəu
16 Ənya Hyel Tlakən hi kwa tsau hi bar ka hya nəubiya gadlagadla nyi i'i ana tsaubar nyi i'i. Hya ɓəlatə mənakə na dəhə ɗufwa hi ana dəhə jigadəma kəhi. 17 Hya zəndə ənya ənda Hyel nacha ngə Tlakən hi, ya hyo ɗa kəriwa nə nyi, ənda hyo ɓəlatə tsaubar nyi, gadlagadla nyi ana ɓwanya nyi. 18 Ənya Tlakə dləukərtə ənda nahi nji nyi hi, nahi ngə məɗəwa nyi nda na səli wi nda cha mərtə hi alkawal, ana ənga hya bəlatə gadlagadla nyi i'i. 19 Nacha tsəu, cho mərtə hi dəgal matsa alenya nji, tləmən hi kwa tiwi ku dunəya, səli kəhi kwa ndiya alənya nji nda cha mər tə dunəya dəhəu, hyo ɗaka nji karti nə Hyel Tlakən hi, wi nda cha mər alkawal.