Nja Tsəfətə Gadlagadla kyo Mə Ebal
27
1 Musa kə'i njirawawa'a Isra'ila tə tsau nyi bar nə nji, <<Ɓəlatə ma dəhə gadlagadla nə yo nə hi ənya na. 2 Ma hya dləgəbiya Dəl Urdən ga gwatə hə'i ngə Hyel Tlakən hi kwa nə hi nga, hya chiya hangu wawa'a i'i, ba hya hyahiti. 3 Hya tsəfətə dəhə ɓwanya inə ti, ma hya dləgəlbiya gwa tə hə'i ngə Hyel Tlakən hi kwa nə hi nga, hə'i nda 'ua ana mwamwa kwa hwi kwa, tang wi nda Tlakəu, Hyel nə kə'i jival kəhi, tə mərtə hi alkawal. 4 Ma hya dləgəlbiya Urdən, hya chiya hangu ingə kyo Mə Ebal, tang wi nə yo tsau hi bar ənya na, hya hyahiti. 5 Hya gi həriya dzəgana nə Hyel Tlakən hi ki nda na hangu i'i. Ngwa hya mər tlər na sə lyanglyang ma hyo gəga hangu ingə wa. 6 Hya həriya nyi dzəgana nə Hyel Tlakən hi ana hangu inda kəla nja dzəɗa, a tə dzəgana nga, hyo hatəmachi nə Hyel Tlakən hi. 7 A kya ti, hyo hatəmachi nə daɓkər, hyo səm na hirgyaɗi mar Hyel Tlakən hi. 8 Kəl ba'a hya tsəfətə dəhə ɓwanya gadlagadla inə bwabwa'a tə hangu inda hya chiya inda.>>Sə inda kwa Təɗəkə Nyi Shi'u nə Ndəu
9 Ngə Musa ana nyandəla Levi inda pərist tə nar nyi nə dəhə njir Isra'ila, <<Bəgə ma ɗi njir Isra'ila hya səya himi! A ɗatə hi ka njikə Hyel Tlakən hi ənya. 10 Hya nəu nya Hyel Tlakən hi ana hya ɓəlatə gadlagadla nyi i'i ana tsaubar nyi i'i nda yo nə hi ənya.>>
11 Pishi nda tanyi Musa tə tsau nyi bar nə nji. 12 Ma hya dləgəlbiya Urdən, nyandəla Simion, Levi, Juda, Ishaka, Yusufu ana Banyami kwa ta'i kyo Mə Gerizim ka nda səkənyi papa'akur nə nji. 13 Ana nyandəla Roben, Gad, Asha, Zebulun, Dan ana Naftali tsə'u kwa ta'i kyo Mə Ebal ka nda shi'unda nji.
14 Njir Levi kwa bəziya na kurakə dzəgamdzəgam nə dəhə njir Isra'ila:
15 <<Hyella shi'unda kala ndə nda fiɗətə ndara fətəbiya katəu, ga həsəli nə nyi tə ɗəuwa, mada aman tlalwakura tlakə nyi, sər həɗə cha nə Tlakəu.>>
Kəl dəhə nji kwa dləu ndo na, <<Aɗəmja.>>
16 <<Hyella shi'unda kala ndə nda ngyar nəu nya ada nyi ndara ama nyi,>>
Kəl dəhə nji kwa dləu ndo na, <<Aɗəmja.>>
17 <<Hyella shi'unda kala ndə nda tə fəliya gəl yo nə kuvanyi,>> Kəl dəhə nji kwa dləu ndo na, <<Aɗəmja.>>
18 Hyella shi'unda kala ndə nda tə tyatənda ndər wulfə tsa laku, Kəl dəhə nji kwa dləu ndo na, <<Aɗəmja.>>
19 <<Hyella shi'unda kala ndə nda tə ɗiya ndə shilishili, zər maha, ndara malatəsal,>>
Kəl dəhə nji kwa dləu ndo na, <<Aɗəmja.>>
20 <<Hyella shi'unda kala ndə nda tə piya na mala ada nyi, aka dyaɓəndə tə cha gangər ada nyi,>>
Kəl dəhə nji kwa dləu ndo na, <<Aɗəmja.>>
21 <<Hyella shi'unda kala ndə nda tə piya na sərshishi,>>
Kəl dəhə nji kwa dləu ndo na, <<Aɗəmja.>> 22 <<Hyella shi'unda kala ndə nda tə piya na kwamə nyi, ndara kwar ada nyi ndara kwar ama nyi.>>
Kəl dəhə nji kwa dləu ndo na, <<Aɗəmja.>>
23 <<Hyella shi'unda kala ndə nda tə piya na səlkə nyi mala,>>
Kəl dəhə nji kwa dləu ndo na, <<Aɗəmja.>>
24 <<Hyella shi'unda kala ndə nda tə mbuya nyi mwabu nə təwul nyi,>> Kəl dəhə nji kwa dləu ndo na, <<Aɗəmja.>>
25 <<Hyella shi'unda kala ndə nda tə dləu vangula ka nja tsəya ndə kəla bikəu,>>
Kəl dəhə nji kwa dləu ndo na, <<Aɗəmja.>>
26 <<Hyella shi'unda kala ndə nda tə ngyar dləukər ɓwanya gadlagadla inə təwa ngyar ɓəlati,>>
Kəl dəhə nji kwa dləu ndo na, <<Aɗəmja.>>