Wazəbar Ɓəlatə Gadlagadla
28
1 Ma hya nəubiya dəhə sə inda Hyel Tlakən hi tə na tsa'atsa'a, ga ɓəlatə gadlagadla inə yo nə hi ənya nə mənakəu, Hyel Tlakən hi kwa nə hi gyalkur təkəra dəhə alenya hə'i nda tə dunəya. 2 Papa'akur inənə dəhə kwa səya təkəra hi, ya ndo ɗa ka nəkəhi.3 Njir papa'akur hi ku mələm kəhi ana tə takə kəhi.
4 Tlakə kwa nə hi ngulisha'a ɗanghəu, əngə tanyi tsə'u sə zwazwa kəhi ana sərshishi kəhi, tla, kətəng ana ku kəhi kwa yatəkər.
5 Tsəla kəhi ana təm upə kəhi kwa ɗa na papa'akur. 6 Papa'akur kwa nəu nghə ma ko biya ana ma ko shili.
7 Tlakə kwa gwa'atə hyo kura njir dawa kəhi inda tə gwa'a nya hi. Ndo shili kəra hi təwa laku zhang, kəl ja, ndo biya hwibiya təwa laku pampam məɗəfa. 8 Tlakə kwa səkə hi papa'akur təkəra val kəhi ana a təkəra dəhə tlər nda hyo məra. Hyel Tlakən hi kwa səkə hi papa'akur tə hə'i ngə cho nə hi nga.
9 Tlakə kwa fiya hi aka nji nyi nda karti, wi nda cha na təwa səmfəla, macha hyo ɓəlatə gadlagadla Hyel Tlakən hi inga, ga ɗa kəriwa nə nyi. 10 Təwa ənga, dəhə njir dunəya kwa ngabiya ənda njikə Tlakə hi, ya kwa gwa'atə ndo ləvər tsa hi. 11 Tlakə kwa gwa'atə hyo uya biyama gagaɗa tə hə'i nda cha na cho nə hi təwa səmfəla nə kə'i jival kəhi, ngulisha'a kəhi kwa ɗa ɗanghəu, hyo fa'a sə zwazwa ya sərshishi kəhi kwa yatəkər.
12 Tlakə kwa mbəɗiya huɗamələm banghəu, cho təɗiya par tə bəji tsatsa'a hya'atə ku məɗəwa nyi, ya cho səkər papa'akur təkəra dəhə tlər nda hyo məra, hyo tlənda nyi məl nə hə'i ɗanghəu, kəl ja, nahi nəkəhi, a da hyo dləu məl wa. 13 Tlakə kwa fiya hi ka kər, a da hyo ɗa ka shiu wa. Ma hya səndzə himi da gadlagadla inə yo nə hi ənya na, ga nəubiya nda mənakəu, hyo ɗa biyama, a da hyo ɗa a hi wa. 14 Ngwa hya da tyatənda gadlagadla inə yo nə hi ənya nə na, ndara təwa matsal ndara chisəm wa, ndara hya həsəli nə katə i'i ndara hya mər mavakur nə nda wa.
Wazəbar Tar Ɓəlatə Gadlagadla
15 Kəl ja, ma a da hya nəu nya Hyel Tlakən hi wa, ya a da hya ɓəlatə gadlagadla nyi i'i ana tsaubar nyi i'i inda ya kwa nə hi ənya wa, dəhə shi'u inənə kwa səya təkəra hi, kwa zhaliya hi: 16 Hyo ɗa ka nji shi'ushi'u ku mələm kəhi ana biya tə takə kəhi. 17 Njo shi'unda tsəla ana təm upə kə'i. 18 Njo shi'unda ngulisha'a kəhi, sə zwazwa kəhi, tla kəhi, kətəng ana ku kəhi i'i. 19 Ana shi'u hyo biya, ya ana shi'u hyo shili.
20 Tlakə kwa sətə hi shi'u pampaməu, kər bəlabəla ana mər sə bəbatləbəbatlə təkəra dəhə sə inda hyo məra, tsa'atə bəji nda hyo kuɗa ana njo zhazhinda hi pa'apa'a tə dəbar sə ɗimi inda hya mər ga shar nyi yi nə Tlakəu. 21 Tlakə kwa shili na shiləkə təkəra hi a tə vanyi a tə vanyi kəl bəji nda cha kuɗənda hi tə hə'i ngə hyo gwa kwa nga. 22 Tlakə kwa dla'a hi na utla vyang, gyang, mbələkə ɗimi, dza hi kwa ɗa kwaɗəkwaɗə gagaɗa, sə zwazwa kəhi kwa kəuwa ana tumbusu, sə ingə tanyi kwa shili kəra hi tsa'atə bəji nda hyo kuɗə ti. 23 Par do təɗə wa, ya hə'i kwa ɗa ɓaɓal wi lyang. 24 Atəvira par, Tlakə kwa sətə bərbər ana kuputa, nacha ngə sə nda kwa səya kəra hi tsa'atə bəji nda hyo kuɗə ti. 25 Tlakə kwa fa'anda chi təkəra hi, ba njir dawa kəhi kura hi. Hyo shili təkəra njir dawa kəhi təwa laku zhang, kəl ja, hyo hwibiya təwa laku pampam məɗəfa, ləvər kwa səya dəhə njir dunəya, ma nda ngatə sənda tə ɗa na hi. 26 Hyo kuɗə dəhəu, eakə ka kum takə kwa shili səm kumur dza hi, ya ndə do uya mada ndə zhang ndo gədlənda nda wa. 27 Tlakə kwa pəkə hi mbələkə ɗimi Masar nda, kəti, gadza ana ɓəɓa, inda a do hyo mbə nə wa. 28 Tlakə kwa dla'a hi na tləka, wulfəu ana kər bəlabəla. 29 Pechi tangkər hyo tətəɓə sə wi ndər wulfə nda ku kutla. A da hyo uya biyama ku dəhə sə inda hyo mər wa, kala bəji njo ɗa məndzau na hi, njo fa'a hi, ya a da hyo uya ndər vala wa.
30 Hyo kinda gəna gadlə nə mala nda hyo həa, ba vanya sal shili dləuya ba'a piya nacha na hatləu. Hyo həriya ki, ya a da hyo ngya kwa wa. Hyo zuya fa anap, ya a da hyo hanya wa. 31 Njo tlakər wulya təkəra tla kəhi tə lya hi, ya a da hyo hanya kumkumnyi wa. Njo guratsəya kwara kəhi tsa hi, ya nji do ɓəlandə hi wa. Njo fa'aya kətəng kəhi ba'a nə nyi nə njir dawa kəhi, ya a da hyo uya njir dləutsə hi səkə wa. 32 Njo fa'atə nguli shili kə'i ku'i kəhi kyatə vanya hə'i a tə lya hi, ya hyo ndzam laku ka ndo ɓəl shili, ya shwanghəu. 33 Nji inda pa'a hyo zəndə kwa shili səmnya sə inda hya zuya na vituku kəhi tə hə'i kəhi, nahi nəkəhi sə da hyo ta wa, kəl məndzau ɗimiɗimi tanyi njo ɗa na hi ku dəhə ngya kəhi. 34 Məndzau ɗimiɗimi nda njo nə hi, kwa bəlatə kəra hi.
35 Tlakə kwa dla'aya undya hi ana hya hi ana mbələkə ɗimi inda kwa təa, ya a do wur wa, fwatə kyo huɗə hya hi gi tsa'a kyo pabaɗər kəra hi.
36 Tlakə kwa gədləbiya hi kə'i təl kəhi kyatə vanya hə'i nda nahi ndara kə'i jival da kwa zəndə wa. Hinda hyo ki həsəli nə katə i'i, katə wua ndara nə hangu. 37 Hyo ɗa ka sər ləvəra, karapəu ana sər gwa'a gyaɗi ku huɗa nji inda Tlakə kwa mbəlatə hi kya kwa. 38 Hyo tləkanda chuli gwanghəu, kəl ja, kush tanyi sə nda hyo məriya, aka ndzukwa kwa ɗənya. 39 Hyo chitə fa anap ba'a zwabiya jugwal kwa, kəl ja, a da hyo tlaɗiya yayanyi wa, abiyakata hya satsə ɓitiɓitinyi, aka hwa'ami kwa ɗənya. 40 Wur zaitun kwa ɗa tə hə'i mada təwabari, kəl ja, a da hyo uya malmalnyi wa, aka ndo pənda nguli kəla nəa. 41 Hyo yiyah nguli shili kə'i ku'i mahi'i, kəl ja, hyo tar nda, aka njo fa'atə nda ka mavi'i kyatə vanya hə'i. 42 Ndzukwa kwa ɗənya wu kəhi ka sə zwazwa kəhi dəhəu.
43 Nji shilishili inda na ngya ku huɗa hi kwa uya biyama a tə vanyi a tə vanyi, nahi nəkəhi kəl ka yahi ka yahi. 44 Ndo tlə məl nə hi, ya a da ndo tlə məl tsa hi wa. Ndo ɗa ka wurkər, kəl ja, nahi nəkəhi hyo ɗa wi shiu. 45 Dəhə shi'u inə kwa səya təkəra hi. Ndo səya təkəra hi, ya kwa zhaliya hi tsa'atə bəji nda hyo kuɗə ti, aka hya ngyar nəu nya Hyel Tlakən hi ga ngyar ɓəlatə gadlagadla nyi i'i ana tsaubar nyi i'i inda ya nə hi. 46 Sə inə kwa ɗa ka səshishin ana sər məngəl nə hi ana nyandəla hi ka ba'anawa. 47 Aka a da hya hətə nyi səli nə Hyel Tlakən hi ana hirgyaɗi ba'a ɗufu twasə ku bəji nda hi na sə nyaɓə tsa hi wa, 48 aka ənga, ana huɓwa, hili, durakur ana ɗali ɗimiɗimi hyo ki mər mavakur nə njir dawa kəhi inda Tlakə kwa sətə hi. Tlakə kwa dlakətə hi gang lyang tə wulya hi tsa'atə bəji nda cho kuɗənda hi ti.
49 Tlakə kwa shili na vanya hə'i hya'atə naɗə inda kwa shili mər dawa na hi, hya'atə tə mbwa nda pa'a hyo zəndi, ya a da hyo ngatə nya nda ndo pə wa, abiyakata hya ngabiya, ndo shili tsətə hi wi ngə dəukəu kwa tsə səu, 50 hə'i nda nda pa'a kwa ngatə tuhuɗə nji, nda pa'a kwa la'a səlir njirawawa'a, abiyakata təhuɗə təkəra ngulisha'a. 51 Ndo shili ɗənya sərshishi kəhi ba'a səmnya sə zwazwa kəhi. A da ndo həya hi sə uhihuhi, taɗər ɓitir anap ndara mal zaitun, nguli daləu, nguli kətəng ndara nguli ku wa, tsa'atə bəji nda hyo kuɗə ti. 52 Ndo ɓandə mələm kəhi i'i tə dəhə hə'i kəhi, ɓangtili kəhi inda dzəgamdzəgamə nda hyo la'a wi kwa kanda hi kwa waza. Ndo shili dla'a kala mələm inda tə hə'i nda Hyel Tlakən hi kwa nə hi.
53 Aka chulkə ɓwaɓwatə nda njir dawa kəhi kwa fəu hi kwa ku bəjir dla'a nga, hyo go ɗə nguli kəhi, nguli shili kə'i ku'i mahi'i inda Hyel Tlakən hi tə nə hi. 54 Mada sal nda ndiya na kwya'akur ana shishi'ur ɗufu ku huɗa hi, a do ngatə təhuɗər zamə nyi, ndara mala nyi nda cho nyida, ndara ngulisha'a nyi nda na pi wa. 55 A da cho ɗa nyi kumur ngulisha'a nyi nda cho ɗə nə mada ndə zhang lya nda wa. Kwa ɗa wuɗəkər sənda kwa həyadzə nga aka chulkə ɓwaɓwatə nda njir dawa kəhi kwa fəu hi kwa, tə bəji nda ndo ɓandə dəhə mələm kəhi i'i ti. 56 Mada mala nda ndiya na kwya'akur ana shishi'ur ɗufu ku huɗa hi, kwya'akura cha ana shishi'ukura cha kwa gwa'atə a cho i tsəkar hə'i na huɗə hya cha wa, a do təkə sə na sal nyi nda cho nyida, ndara ana mada zhang ku huɗa nguli ta cha wa. 57 Cho ɗəwanda mii nyi ana nguli nda cha yiyah. Aka cho nda ɗə tə ɗəwa tə bəjir ɓwaɓwatə ɗimiɗimi nda cho gwa kwa, tə bəji nda njo ɓandə mələm kəhi i'i na dla'a.
58 Macha a da hyo ɓəlatə ɓwanya inda ku gadlagadla nə mənakə wa, inda tsəfətsənyi ku likatəlikatə nə wa, ya a da hyo nəu nya Hyel Tlakən hi nda na səli ana sər ləvər wa, 59 Tlakə kwa sətə shiləkə a tə vanyi a tə vanyi səya təkəra hi ana ngulisha'a kəhi, təmachi nda pa'a kwa tərabiya ana shiləkə ɗimiɗimi nda pa'a hyo nau səsə'uti. 60 Cho pəkə hi shilikə inda tə ləvərnda hi vu Masar inda, ya ndo fa'akə hi dzə dələɓəu. 61 Ətsəu, Tlakə kwa pəkə hi kala shiləkə ana təmachi inda a da nja tsəfəu ku Likatəkatə Gadlagadla nə wa, tsa'atə bəji nda hyo kuɗə ti. 62 Nahi nda ɗang wi sasəlga inda ki huɗamələm, hyo həyadzə yiɗau, aka hya ngyar nəu nya Hyel Tlakən hi. 63 Wi nda tə ɗa mənakə nə Tlakə cha mərtə hya uya biyama ga yatəkər ɗanghəu, əngə tanyi tsə'u kwa ɗa mənakə nə nyi cho kuɗənda hi ba'a zhazhinda hi. Njo gədləbiya hi ku hə'i ngə hyo gwa dləuya nga.
64 Tlakə kwa wiɗəbiya hi kyo alenya hə'i, fwatə tə ɓələkər dunəya ba na yi tsa'a tə ɓələkər dunəya ba nanda. Hinda ngə hyo ki həsəli nə katə i'i, katə wua ana nə hangu i'i, katə inda mada nahi ndara jival kəhi da kwa zəndə wa. 65 Ku hə'i ingə hyo wiɗətəkər nga, a da hyo uya piyarɗufu wa, vanya mbwa a da hyo uya mada mbwa ka fiya huɗə hya hi wa. Tlakə kwa gwa'atə hyo ngya na ləvəra, kəla fəkər ana tar hirgyaɗi. 66 Wa'atanyi hyo ngya na kər jigədlanghəu, ləvər kwa tə hi vu'i na pəchi, hyo ləvər ndara mi kwa ɗa na pya hi. 67 A ba mbudla, hyo na, <<A vu'i ɗa wa.>> Ma akə tə ɗa tsəu, hyo na, <<A vu'i wur wa.>> Aka chulkə ləvər nda kwa taudzə ku ta hi, ana sə inda lya hi kwa la'a. 68 Tlakə kwa ɓəlandə hi yi Masar ku param i'i, ma'i nda ya na a tsə'u hyo tsakətə pa'a wa. Hinda hyo yi fətə kərnəhi tə suku ka mavi'i shili ka mahi'i, ya njir jawar hi da ka ɗəl wa.