Tlakə tə Mbandər kə'i Njir Isra'ila tə Hə'i Mowab
29
1 Ja'inə ɓwanya mbandər nda Tlakə tə mər kə'i njir Isra'ila təwa Musa tə hə'i Mowab, tsakə təkəra mbandər nda Tlakə mər kə'i nda vu Horeb. 2 Ngə Musa tə tsəmtə dəhə njir Isra'ila ga nar nda:A la'atə hi na lya hi dəhə sə inda Tlakə tə mər vu Masar nə Fir'auna, sə inda cha mər nə njirawawa'a nyi ana tə dəhə hə'i nyi. 3 A la'a tə hi na lya hi chul dzəa, səshinshin ana sər məngəl dəgal inda Tlakə mər nda. 4 Kəl ja, ba'aka ənya a Tlakə da taa nə hi ɗufu nə ngabiya, ndara li nda hyo la'a, ndara himi nə ngatə wa. 5 Dəhə ka ənga, ku bəjir fa fwaɗəkumnyi nda ya nəu na hi tə dadil takə nda, dzaki kəhi da utlə wa, ya ɓiɓi nda ku hya hi da hal wa. 6 A da hya kwasə gwazhilakə wa, ya a da hya sa ɓitir anap ana mbadlə wa. Ya mər ənga, ga hya zəndəbiya ənda naya ngə Hyel Tlakən hi.
7 Nda məna shili tangna, Sihon təl Heshbon ana Og təl Bashan tə zəbiya aka ndo pah mən, kəl ja, məna kura nda. 8 Məna dləuya hə'i kənda ga təkəya nyi nə nyandəla kə'i Roben, Gad ana mar nyandəla Manasa.
9 Ana əngə ja, hya ɓəlatə sə inda mbandər nə təkər mənakəu, ga hya uya biyama ku dəhə sə inda hyo məra. 10 Ənya, janə hi tə ta'i mar Hyel Tlakən hi, dəhə ka njir nəu na hi, njir zəwa nyavi kəhi, njirawawa'a kəhi, njirawawa'a patla kəhi, ana dəhə shili inda vu Isra'ila, 11 nahi ka mahi'i kəhi, nguli kəhi ana nji shilishili inda kwa huɓə shilə'u ana kwa tsa'a ɓiti nə hi ku mələm kəhi i'i. 12 Aka hya mbandər na Hyel Tlakən hi, mbandər nda Tlakə kwa mər na hi ənya ana səmfəla, 13 aka cho dzəviya hi ənya hyo ɗa ka nənyi na nji, ka ga cha ɗa ka Hyel kəhi wi nda cha mərtə nyi alkawal nə kə'i jival kəhi Ibrahim, Ishaku ana Jakop. 14 A da kəl ana nahi tanyi nə yo mbandər nə na səmfəla wa, 15 kəl ja, dəhə ka nji inda a da nda tangnə kə'i mən ənya wa, ana nyandəla nji inə tə ta'i tangnə ənya na.
16 Nahi na kərnəhi zəndətə ənda məna ngya vu Masar ana ənda məna tərabiya ku hə'i alenya nji i'i. 17 A la'atə hi sər həɗə inda tsa nda i'i, nacha ingə katə inda nja ɓatlə na wua, hangu, azurfa ana bəjingha. 18 Hya gəla ngwa nja da uya vanya sal, ndara mala, chuli alenya nji, ndara nyandəla alenya nji ku huɗa hi, inda kwa shanda ɗufwa nda tsa Hyel Tlakən hi, ka ga nda ki həsəli nə katə hə'i inda wa, hya gəla nja da uya vanya ngilangha wua nda kwa biyandə kəlpə ɗəuwatə ku huɗa hi.
19 Ma vanya ndə tə ngatə mbandər təwa səmfəla na, ngə cha kwa səkə nyi papa'akur nə kərnyi ku ɗufwa cha ga na, <<Sə da kwa uya ɗa wa, mada naya mər sə nda ɗufwa ya nda ɓaɓal kwa i.>> Kwa nau gwa'atə təmachi kwa shili zhazhinda nji inda kwa mər sə mənakə ana njir mər sə ɗimi dəhəu. 20 Tlakə da kwa far na səpəla'a chul ndə wi ngə wa, kəl nda huɗatla nyi ana sələkəkur nyi kwa bəbər na nda. Dəhə shi'u inda nja tsəfəbiya ku likatəkatə kwa səya təkəra nji nji nyi, ya Tlakə kwa zhazhinda tləmən nda tə dunəya. 21 Tlakə kwa gədləbiya nda ku huɗa nyavi njir Isra'ila dəhəu, ba cha pəkə nda dəhə shi'u inda ku mbandər nda nja tsəfətə ku Likatəkatə Gadlagadla na. 22 Ngulisha'a kəhi ku vanya zamin nda kwa da shili ana nji shilishili nda kwa hya'atə naɗəu, kwa shili la'a zabal inda tə shili təkəra hə'i na, ana shiləkə inda Tlakə tə pəkəri. 23 Dəhə hə'i kwa səwa na wuna ba'a solfa. Sə da kwa tsə tə wa, ya wu da kwa hə tə wa. Kwa ɗa wi Sadom ana Gomora, Adma ana Zeboyim inda Tlakə tə zhazhinda təwa huɗatla ɗimiɗimi. 24 Kəl dəhə alənya nji kwa na, <<Mya gwa'atə Tlakə tə mər sən na hə'i nə əna? Mya gwa'atə huɗa cha tla ɗimiɗimi əna?>>
25 Kəl nji kwa wum ndo na, <<Aka nji inga ngyar ɓəlatə mbandər Tlakə nga, Hyel nə kə'i jival kənda, mbandər nda cha mər kə'i nda ku nda ndo zəbiya vu Masar. 26 Atəvira ənga, nda shata nda ga ki həsəli nə katə i'i ga uzhi manə nda, katə inda pa'a ndo zəndi, inda Tlakə tə katə nda tsa həsəli nə nda. 27 Aka ənga, huɗatla Tlakə tə tsafə təkəra hə'i na, əngə ngə cha pəkər dəhə shi'u inda nja tsəfətə ku likatəkatə na. 28 Ku ɗimiɗimir huɗatla ana bəbər nda səsənyi tə bəbər Tlakəu, ngə cha gədlənda nda tə hə'i kənda ga uchəbiya nda kyatə vanya hə'i, wi nə cha ənya na.>>
29 <<Dəhə sə ɗəuwaɗəuwa nə Hyel Tlakən ea inga, kəl ja, sə inda nja chabiya nəkəmən inga, ana a nə ngulisha'a kəmən ba'anawa, məlna məno nau nəubiya ɓwanya inda ku gadlagadla na.>>