Njir Isra'ila kwa Ɓəl Shili Da Tlakəu
30
1 Ma bəji nda dəhə papa'akur ana dəhə shi'u inə ya piya hi manə hi na, tə shili təkəra hi, ngə hya ɗənghatə tə hə'i inda Hyel Tlakən hi tə wiɗəbiya hi kyati, 2 ngə nahi kə'i ngulisha'a kəhi tə ɓəl shili da Hyel Tlakən hi ga mər sə inda cho i ana dəhə ɗufwa hi dəhə ka jigadəma kəhi məlməl na kala sə inda ya tsau hi bar nə ənya, 3 sakanda ngə ja, Hyel Tlakən hi kwa ɓəlandə hi shili tə hə'i kəhi ana cho ngatə təhuɗə kəhi, ba'a cha tsəmiya hi hya'atə tə dəhə hə'i inda cha wiɗənda hi kya ti. 4 Mada nja gədlənda hi kyatə hə'i nda ndiya na naɗə tə dunəya, Hyel Tlakən hi kwa tsəmiya hi hya'atə hinda, ba'a ɓəlandə hi shili. 5 Cho ɓəlandə hi shili tə hə'i jival kəhi, hyo shili dləuya. Hyel Tlakən hi kwa gwa'atə hyo shili yatəkər, ya hyo mər gəna ndiya matsa nə kə'i jival kəhi. 6 Hyel Tlakən hi kwa nə hi ana nə nyandəla hi vanya ɗufu, məlna hyo nau nyida nyi na dəhə ɗufwa hi ana dəhə jigadəma kəhi, ka ga hya nau ngya tə hə'i nda. 7 Hyel Tlakən hi kwa shakə nyi dəhə shi'u inə nə dəhə njir dawa kəhi inda ɗa tsa hi kwa ɗa məndzau nahi. 8 Təwa əngə hyo nau ɓəla mər sə inda Tlakə kwa i ana ɓəlatə gadlagadla nyi inə yo nə hi ənya na. 9 Hyel Tlakən hi kwa gwa'atə hyo uya biyama gagaɗə ku dəhə tlər nda hyo məra, ngulisha'a kəhi kwa ɗa ɗanghəu, ya sərshishi kəhi kwa yatəkər, hyo fa'a sə zwazwa. Tlakən hi kwa ɗa na hirgyaɗə səkəu təwa mərtə hi njir gəna wi nda cha ɗa na hirgyaɗi nə kə'i jival kəhi. 10 Əngə sənda kwa ɗa, macha hyo mər sə inda Hyel Tlakən hi kwa i ana hyo ɓəlatə gadlagadla nyi i'i ana tsaubar nyi i'i inda nja tsəfətə ku Likatəkatə Gadlagadla na, ya ngə hya ɓəl shili da Hyel Tlakən hi na dəhə ɗufwa hi ana dəhə jigadəma kəhi.Tabiya Ma ku Pama Pi ana Tah
11 Gadlagadla inə yo nə hi ənya na, a da sə inda kwa ɗa dza'u nə hi ndara kwa ndəɗə dunama kəhi inə wa. 12 A da sə inda ki huɗamələm məlna hyo na bəra, <<Wa kwa nau gi huɗamələm ka ga cha gi səya ni, cha səya bəziya mən ga məna nəuwa?>> 13 Ya a da biya tiya fa'a, məlna hyo na bəra, <<Wa kwa nau dləgəlbiya fa'a ka ga cha biya zəbiya ni, cha zəbiya bəziya mən məna nəuwa?>> 14 Kəl ja, gadlagadla inə ləhə tanyi dzən hi, a ku nya hi, ya a ku ɗufwa hi cha, məlna hyo nau nəubiya. 15 Janə ya fiya hi tə pi ana gəna, tah ana ɗimikur a manə hi ənya. 16 Aka ənya yo tsau hi bar, hya nyida Hyel Tlakən hi, hya ma'i ku laku nyi, hya ɓəlatə tsaubar nyi ana gadlagadla nyi; hyo ɗa na pi, ya hyo yatəkər, Hyel Tlakən hi tsə'u cho səkə hi papa'akur ku hə'i ngə hyo gwa ka hya dləuya nga.
17 Kəl ja, ma ɗufwa hi tə ɗa ɓaɓaləu, ngə hya ngyar nəu ɓwanya nyi, ga nəu alenya katə ga uzhi ga həsəli nə nda, 18 yo nar hi ənya na, vəlvəl hyo kuɗa. A pya hi do təɗardzə ku hə'i ngə hyo dləgəl Urdən ka hyo biya dləuya ngə wa.
19 Ənya huɗamələm ana dunəya kwa ɗa ka matauli ɗa təkəra hi, janə ya fiya hi tə pi ana tah, papa'akur ana shu'ua, a manə hi. Sakan ja, hya tabiya pi, məlna pya nguli kəhi kwa təɗardza 20 tsa'aka hyo nau nyidatə Hyel Tlakən hi, səma hima da kuraka cha, hya gəziya nyi ɓaɓaləu. Aka Tlakə nacha ngə pya hi, cho nə hi fa ɗanghəu ku hə'i nda cha səmda fəla cho nə nyi nə kə'i jival kəhi, Ibrahim, Ishaku, ana Jakop.