Joshua tə Dləutsə Cha Musa
31
1 Kəl ngə Musa tə tsakətə ɓwanya inən nə njir Isra'ila ga na, 2 <<Fa ɗa sakana 120, ya a haltə ya, tsə'u yo nau nəu na hi wa. Tlakə tə nar ɗa, <A da ko dləgəlbiya Dəl Urdən ngə wa.> 3 Hyel Tlakən hi na kərnyi ngə kwa dləgəlbiya təvi nahi. Cho zhazhinda jul nji ingə biyaman hi inga, ya hyo dləuya hə'i kənda. Joshua ngə ndə nda kwa biya nahi biya nga, wi nda Tlakə tə na. 4 Tlakə kwa mərtə nda wi nda cha mərtə nyi nə Sihon ana Og, kya'a nda təl njir Amori inga, cha zhazhinda nda dəhə ka hə'i kənda. 5 Tlakə kwa gwa'atə hyo kura nda, hya mər na nda wi sənda ya tsau hi bar. 6 Hya ɗa na dunama ana hya tsətədza, ngwa hya ləvər nda ndara nda ndzamətə hi huɗə wa, aka Hyel Tlakən hi tsa'a cha kə'i hi, a da cho ngya hi ndara cha shandə hi dagəryi wa.>>7 Ngə Musa tə ngabiya Joshua zəbiya mar dəhə njir Isra'ila ga nar nyi, <<Ka ɗa na dunama ana ka tsətədza, aka nakə nə kwa nəu na nji inə gwa tə hə'i nda Tlakə tə səmnda fəla cho nə nyi nə kə'i jival kənda, nakə ngo gwa təkəya nda ka sərfa'aki kənda. 8 Tlakə na kərnyi kwa biya manə hi ya cho ngya tsa'a kə'i hi, a da cho ngya hi ndara cha shandə hi dagəryi wa. Ngwa hya da ləvər wa, ya ngwa ɗufwa hi tsəyadzə wa.>>
Njo Kəratsəntə Gadlagadla Kala Fa Məɗəfa
9 Ngə Musa tə tsəfətə gadlagadla inənnə ga nə nyi nə nyandəla Levi inda pərist, nji inda kwa hə gwarara mbandər Tlakəu, ana a nə dəhə njirawawa'a Isra'ila. 10 Ngə Musa tə tsau nda bar, a bəra, <<A tə batəbatər kala fa məɗəfa, ku fa nə far na məl, ku bəjir Ladər Madləɓa i'i, 11 ma dəhə njir Isra'ila tə tsəmtədzə mar Hyel Tlakən hi tə mbwa nda cho tabiya ka həsəli nə nyi ti, hyo kəratsəntə nyi gadlagadla nə mar nji məlna ndo ngati. 12 Hya tsəmiya nji; shili, ka mahi'i ka ngulisha'a, nji shilishili inda na ngya ku mələm kəhi i'i, ka ga nda ngati, ya ndo dlədləɓətə ləvər Hyel Tlakən hi ana nda ɓəlatə dəhə ɓwanya inda ku gadlagadla na. 13 Nyandəla nda inda a da kwa zəndə gadlagadla nə wa, kwa ngatə ya ndo dlədləɓətə ənda ndo ləvər Hyel Tlakən hi, matə wur ɗa ana pi hi tə hə'i ngə hyo dləgəlbiya Dəl Urdən ka hyo biya dləuya nga.>>
Batəbatər Tsaubar Tlakə a nə Musa
14 Ngə Tlakə tə nar nyi nə Musa, <<Sakanə ja, bəjir tə nghə ɗatə ləhəu. Sər ka nga Joshua hya shili kya'a hi ku Madləɓa Tsəmdza, mbwa nda yo dzəviya nyi ti.>> Ana ənga, ngə Musa ana Joshua, tə shili ta'i ku Madləɓa Tsəmdzə nda.
15 Ngə Tlakə tə səya ku ləmbəkə ndalndala ku Madləɓa nda, ləmbəkə nda tə ta'i tanyi tə lakur gwa ku Madləɓa nda. 16 Ngə Tlakə tə nar nyi nə Musa, <<A ɗatə kə ləhə nya hwa, ya kachanə nji inə kwa səwandə kərnənda təwa həsəli nə katə nji ingə ndo gwa tə hə'i kənda inga. Ndo shata nda tsa nəu ɗa, ba'a ɓəlnda mbandər nda ya mər kə'i nda. 17 Ma bəji ngə tə ɗa, yo pəkə nda huɗatla ɗa ba'a shandə nda dagəryi, yo ɗəuwanda huɗəma ya tsa nda, ba'a nja kuɗənda nda. Temachi pampam ana ɓwaɓwatə i'i kwa zhaliya nda, pəshi nda ndo na, <A da Hyel na shandə mən dagəryi nacha na gwa'atə təmachi inə kwa shili təkəra mən wa ya?> 18 Ya vəlvəl yo shanda ma ya tə ndawa bəji aka nda mər pəla'akur təwa ki həsəli nə katə i'i.
19 <<Sakanə ja, tsəfətə miya inənnə ba'a ka dlədləɓətə nyi nə njir Isra'ila, ka nar nda nda na, ka ga cha ɗa ka matauli təkəra nda. 20 Ma ya shili na nda ku hə'i nda mwamwa ana 'ua kwa hwi kwa, hə'i nda ya mərtə nyi alkawal təwa səmfəla nə kə'i jival kənda, ma nda səm ga nyi ga ngətla, ndo shata nda yakəra katə i'i ndo həsəli nə nda, ndo ngya ɗa ba'a ɓəlnda mbandər ɗa. 21 Ya ma təmachi i'i ana ɓwaɓwatə i'i tə shili təkəra nda, miya nə kwa ɗa ka matauli təkəra nda, aka nyandəla nda da kwa far nə wa. Aka zəndətə ya sənda nda haɓə ku ɗufwa nda təvi ya shili na nda tə hə'i nda ya mər alkawal yo nə nda.>> 22 Pəshi nda tanyi Musa tə dlədləɓətə nyi miya na, nə njir Isra'ila.
23 Ngə Tlakə tə tsau nyi bar nə Joshua zər Nun, bəra, <<Ɗa na dunama ka tsətədza, aka nakə ngo gwa na njir Isra'ila gwa tə hə'i nda ya mərtə nda alkawal təwa səmfəla, ya naya na kərɗa yo ma'i tsa'a na ka.>>
24 Nda Musa tə wurandə tsəfə dəhə gadlagadla inə ku likatəkata, 25 ngə cha tsau nyi bar nə nyandəla Levi inda kwa hə Gwarara Mbandər Tlakəu, bəra, 26 <<Hətə ma Likatəkatə Gadlagadla na hya fəndzə dzər Gwarara Mbandər Hyel Tlakən hi, aka ga cha ɗa ka matauli təkəra hi. 27 Aka a zəndə hi tə ya ənda nahi njir tləmwali ana nji kəla katəndər hi. Aka macha wi nə ya tsəuta ɗa na pi kə'i hi na, hyo tləmwali nə Tlakəu, a da ya zəndə ndara aman hyo ɗa ma ya tə wa! 28 Sakanə ja, tsəmətə ɗa ma dəhə gavərma nyavi kəhi ana njirawawa'a kəhi, ga ya par nda ɓwanya inə ku hima nda, ga huɗamələm ana hə'i nda ɗa ka matauli təkəra nda. 29 Aka a zəndətə ya ənda ma ya tah, hyo səwandə kərnəhi ba shandə nyi dagəryi nə sə inə ya tsau hi bar nə ina. Təmachi kwa da shili təkəra hi aka sə ɗimi nda hyo mərtə bəji nda kwa shili, hyo da tla huɗa Tlakə təwa sə inda hyo da ɓatliya nyi nə kərnəhi.>>
Miya Musa
30 Kəl ngə Musa tə nabiya nda ɓwanya miya nənna fwatə tə ghəya nyi biya shipatə tə udiya nyi, a mar dəhə daɓədzər njir Isra'ila.