32
1 Səya ma himi da sənda yo na huɗamələm,Səya ma himi da ɓwanya ɗa dunəya.
2 Əngwa dlədləɓə ɗa səya təkəra hi wi par,
ɓwanya ɗa i'i tsə'u wi kuchikəpa,
wi par shafshafə təkəra sar təka tsəa,
wi par nda kwa təɗə təkəra sə təka tsəa.
3 Yo bəzə tləmər Tlakəu.
Yo fal Hyel nda na səli!
4 Tlakə wi fafa cha, nacha ngə mbwar mbu ɗa,
ndər jiri ana ndə tsa'atsa'a cha ku kala səu.
Hyel ndər jiri cha, ndə nda pa'a kwa zandə səu,
tsa'atsa'a ya məlməl tanyi cho mər sə nyi.
5 Nda səwandə kərnənda huɗə nyi,
nda tyatənda laku nyi, a tsə'u nda nguli nyi wa,
nda ɗa ka zamin njir səpəla'a ana nji pəla'a.
6 Laku nda hyo kinda Tlakə nə ngə ja?
Kara nahi nji kəkəng ana nji kəla dəma
A da nacha ngə Adan hi ana ndər ɓatlə hi ma?
Nacha mər hi ga fiya hi ka jul nji.
7 Ɗənghatə ma bəji nda parakəu,
zamin nji inda haaɗa nda.
Jawar ma adan hi, ndo dəkar hi,
jawar ma njirawawa'a kəhi, ndo dəkəbiya hi.
8 Ndə Nda Ndiya na Səli tə nə nyi sərfa'aki nə hə'i i'i,
ku bəji nda cha mər jul nji i'i,
nacha fiya gəl i'i ku pama nji
məlməl na ɗangkura nguli shili Isra'ila.
9 Mbaɗə Tlakəu, nacha ngə nji nyi,
Nyandəla Jakop ngə nənyi na sərfa'aki.
10 A tə dadil takəu cha uya nda,
a tə hamham ya jwajwa'a, kəl majugwal ngə kwa sə ti.
Cha ɓəlatə nda ga tsamartə nda,
cha ɓəlatə nda wi nda ndə kwa ɓəlatə ɓitir lya kərnyi.
11 Wi ngə dəukəu kwa dlədləbə fəl nə nguli nyi,
wi nda cho zhuli təkəra nguli nyi,
wi nda cho wuniya babəka cha ka cha tsa'utə nda,
cho fa'atə nda tə babəka cha tsa ndo pəpa.
12 Tlakə zhang tanyi ngə tə nəu na nda,
a vanya hyel da tə vala nyi wa.
13 Nacha gwa'atə nda kura nji inda kyatə dəgəl i'i,
ga nyandə nda na sə zwazwa nə hə'i nda.
Cha nyandə nda na mwamwa chiɗi zəbiya ku məa,
ana mal nda tə zəbiya ku lyalya.
14 Nda uya kəndirim tla kənda i'i ana 'ua ku kənda i'i,
cha nə nda kətəng ana ku inda yiyinghəu,
ana alkama nda jwarasəu,
ana ɓitir anap nda ndiya na mənakəu.
15 Njir Isra'ilaa tə ngətla ga tlə mwali,
nda nyi na sərsuma ga ngətla.
Nda shandə nyi dagəryi nə Hyel Ndər Ɓatlə nda,
ngə nda ngyar Ndər Dləuya nda.
16 Nda gwa'atə cha mər sələkəkur na nda təwa katə kənda i'i,
nda tla huɗa cha na sərhəɗə inda nda kwa məra.
17 Nda hatəmachi nə kwadzaɓi i'i, ya a da nanda ngə Hyel wa,
hyel inda a da nda nda zəndə wa,
mihiɓir hyel i'i,
hyel inda kə'i jival kəhi da zəndə wa.
18 Hya far na Fafa nda tə ɗa ka mbwar mbu kəhi,
hya far na Hyel nda tə yabiya hi.
19 Nda Tlakə tə la'a ngəna səu, ngə cha ngya nda,
aka nguli shili kə'i ku'i nyi tə tliya nyi huɗa cha.
20 Cha na, <<Yo mbunda huɗəma ya tsa nda,
ga ya la'a ndara aman ndo ɗa,
aka nanda njir zamin tləmwali nda,
ngulisha'a kəla jiri nda tsəu.
21 Nda fəu ɗa ku sələkəkur təwa sə nda pa'a hyel,
ga tliya huɗa ya, ana katə kənda inda kəla sakəda.
Yo gwa'atə ndo ngatə shishir sə inda pa'a nji,
yo tliya huɗa nda təwa nji inda pa'a da na ngabiya.
22 Aka huɗatla ɗa ɗatə wi hu'u gəɗəgəɗa,
hu'u nda kwa ngi səu kwa'a səyo mbəla hə'i.
Yo nginda dunəya dəhə ka sakəda nyi
ba'a ya dəgətə nyi hu'u nə hya mə i'i.
23 Yo ɓukə nda təmachi i'i
ba'a ya wurandə hafə ɗa təkəra nda.
24 Yo tliya huɓə ndo kuɗənda nda,
təmachi ana məwuvə ndo kuɗənda nda,
Yo sətə nda hira sərshishi takəu,
ana kəlpə tsapəu inda kwa təɗə na ta kwa dadil takəu.
25 Katsakər kwa mərtə nda nji kəla ngulisha'a ku yauraki,
njir dawa kənda kwa shili dləuya ki kənda.
Nguli duwal ka ku'imahi'i kwa kuɗa,
əngə tanyi tsə'u nguli dizəu ana nji halhal kwa kuɗa.
26 Ya na, yo wiɗənda nda
ba'a zhazhibiya tləmən nda ku huɗa səndəndəu,
27 kəl ja, a da yo ngyar njir dawa kənda kwa bu kərnənda wa,
a tsa njir dawa kənda da ba'a na,
<Na ea na kura nda,
a da Tlakə nga mər dəhə sə inə wa.> >>
28 Isra'ila nji kəla dəma nda,
a da nda na ngabiya pa'apa'a wa.
29 Macha dəma ana ngabiya da tsa nda,
ndo nda zəndəbiya sə ndo nda ɗa na nda.
30 Aman ndə zhang kwa nau gədlənda nji 1,000,
ndara nji mətlə kwa nau gədlənda nji 10,000,
kəlnda ma Hyel kənda tə tləɗanda nda,
kəlnda ma Tlakən nda tə ngya nda.
31 Aka hyel kənda da na gyalkur wi nəkəmən wa,
məlna njir dawa kəmən kwa nda kura mən wa.
32 Aka hya'atə vu Sodom anap kənda kwa zəbiya,
hya'atə tə takə Gomora.
Yayar anap chaɓə na kəlpa,
ya ɗəuwatə ma tə nəa.
33 Ɓitir anapə kənda wi kəlpə pwabu,
kwa tsa ndə wi kəlpə pwabur vu'i.
34 <<A ɗəwanda tə ya ku val ɗa,
ga nyi'unda nya cha ku məɗəwa ɗa.
35 Na'a ngə kisəkur, ya yo kinda.
Tə bəji tsa'atsa'a, hya nda kwa tsaɗa,
bəjir təmachi kənda ɗatə ləhəu
bəjir zhazhinda nda kwa shili təkəra nda kuskusəu.>>
36 Tlakə kwa mərtə nyi nəuma nə nji nyi
ya cho ngatə təhuɗər mavi'i nyi
macha la'a dunama kənda təutə ti
ya ndə da nja tsahi wa, dimu ndara mava.
37 Tlakə kwa jau nji, <<Aman hyel kənda inda,
inda hyo har wi kwa dləuya nda inda?
38 Hyel inda kwa səm mbwa malmal nə sərhatəmachi kənda
ana inda tə sabiya sərhatəmacha səsasa kənda?
Sər nda hya'atə nda dləuya nda ja!
Cha ɓatlətə nda madləɓa!
39 Ndzamar ɗa ma, naya na!
A vanya hyel da dzə ɗa wa.
Naya ngə ndə nda kwa tsəya ana kwa shili na pi
Naya ngə kwa shili na shiləka ya naya ngə kwa mbandi,
ya vanya ndə da nji ka cha dləuya ndə ku cha ya wa.
40 Janə yo har cha ya shi huɗamələm ana yo bəziya,
ya səmnda fəla na kərɗa,
41 ma ya tsəltə katsakər ɗa nda kwa mbəla
ngə ya gəziya na cha ya ma yo nəuma,
yo kisəkur təkəra njir dawa ɗa
yo kinda səkur təkəra nji inda kwa ɗa tsa ya.
42 Yo gwa'atə hafə ɗa i'i kwa nyi na mashi kənda,
katsakər ɗa kwa njinjiɗiya kum kənda,
mashi nji inda nja kuɗənda ana nə mavi'i,
ana yo tsətsəɗənda kəra njirawawa'a njir dawa kənda.>>
43 Mər ma hirgyaɗi, hə'i i'i ana nji,
aka cho kisəkur mashi mavi'i nyi,
cho kisəkur təkəra njir dawa nyi
ba'a cha farbikər nji nyi ana nə hə'i kənda.
44 Musa ana Joshua zər Nun tə nabiya ɓwanya inda ku miya na, njir Isra'ila kwa səhimi. 45 Nda Musa tə wurandə na nabiya ɓwanya inə dəhə nə njir Isra'ila, 46 ngə cha nar nda, <<Gəziya ma dəhə ɓwanya inə ya bəziya hi inə ku ɗufwa hi, ga hya nau tsau nyi bar nə ngulisha'a kəhi nda nəubiya gadlagadla inə mənakəu. 47 Tsaubar ina a da sə ɓwatanyi inə wa, nanda ingə pi a nə hi. A təwari ngə pya hi kwa təɗardzə tə hə'i ngə hyo biya dləuya biyamar Urdən nga.>>
Hyel Dləukərti Musa La'a Hə'i Alkawal
48 Tlakə tə nar nyi nə Musa pəshinda tanyi, 49 <<Ma'i gyo Mə Abarim inga, nacha ngə Mə Nebo nda tə hə'i Mowab, nda kwa ndzamdzə na Jariko, ka ndzamətə Kan'ana, hə'i nda yo nə nyi nə njir Isra'ila ka sərfa'aki kənda. 50 Ko gi tə kyo mə ngə ko gya kwa nga, ko nəu hir njikə hi, tang wi nda Haruna tə tah kyo Mə Hor ga nəu hir njikə nda. 51 Aka kya'akura hi tə tləɗanda nda amar njir Isra'ila tə mbwar ɓiti vu Meriba Kadesh tə Dadil Takə Zin, ana tsə'u a da hya char nyi ngya kartikur nə njir Isra'ila wa. 52 Aka əngə ja, Ko la'a hə'i ngə naɗəu, kəl ja, a da ko gwa tə hə'i ngə yo nə nyi nə njir Isra'ila ngə wa.>>