Musa tə Səkə nyi Papa'akur Nə Nyavi Isra'ila i'i
<<Tlakə tə səya kyo Mə Sinai ga ɓwanya nəmən,
wi nda pəchi kwa zədə vu Seyir təkəra mən,
cho mbəl kyo Mə Paran.
Cha shili na nji karti nyi 10,000
hya'atə təwa holma, tə sara məa.
3 Təkəɗəu, kwa nyida cha nji nyi,
dəhə nji karti nyi ku cha cha.
A huɗə ngha ndo uzhi,
a tsa kə ndo dləu tsaubar i'i.
4 Gadlagadla inda Musa tə nə ea,
nanda ingə məɗəwa mənakə nə Jakop.
5 Cha ɗa ka təl təkəra Jeshuruna,
ma nda nji ana njirawawa'a tə tsəmtədza,
təkəra njir Isra'ila dəhəu.
6 Nyandəla Roben kwa ngya na pi, a ndo kuɗa,
ndara nda həyadzə tsaɗə wa.>>
7 Atəkəra nyandəla Juda cha na,
<<Maki Tlakəu, səhimi da tiwi Juda,
daɓtə nda kə'i njikə nda.
Sər ka pah tə ya nda ana cha kərngha,
Maki, vala nda nda kura njir dawa kənda!>>
8 Atəkəra nyandəla Levi cha na,
Nə nda tə kə Tummim ana Urim
nə nji inda char nda kwambiyakur.
Ka dzətə nda vu Massa;
aka ga ka la'a ndara chul nji manə nda nya ɓiti Meriba.
9 Nda nar nyi nə kə'i adan nda ana aman nda,
<<A da eo zəndə hi wa.>>
A da nda la'a səlir kə'i zamən nda kə'i kwamən nda,
ndara nda ɗəngha na nguli kərnənda wa,
kəl ja, nda ɓəlatə gadlagadla ngha
ga mər sə inda ko i.
10 Nda dlədləɓtə nyi ɓwanya nghə nə Jakop
ana gadlagadla nghə nə Isra'ila.
Nda ngi ɓurdi nə ngha
ga nginda dəhə sərhatəmachi tə dzəgana ngha.
11 Maki Tlakəu, səkər papa'akur nghə təkəra sə ingə dəhəu,
dləutsə sə inda nda mər na cha nda.
Kuɗənda dəhə njir dawa kənda,
kuɗənda njir dawa kənda pa'apa'a.
12 A təkəra nyandəla Banyami cha na,
<<Nyavi nənnə ngə Tlakə kwa nyida ana ɓəlati,
cho ɓəla nda pa'a pəchi,
ana cho ngya ku huɗa nda.>>
13 A təkəra nyavi Yusufu cha na,
Ga Hyel cha səkər papa'akur təkəra hə'i kənda,
ana kuchikəpa mənakə nda kwa səya ki huɗamələm
ana ɓiti nda kyo ndəla hə'i.
14 Ana dəhə sə mənakə nda pəchi kwa shili ni,
ba'a dəhə sə nda ndiya mənakə nda njo uya tə hya.
15 Ana dəhə sə mənakə nda njo uya kyo mə inda ɗəɗəməu,
ana sə inda dəgəldəgəl inda ba'anawa kwa biyandi,
16 ana dəhə sə mənakə inda ku hə'i ana sə inda hə'i kwa biyandi
ana kwambiyakur nə ndə nda tə la'a takə kwa ngia.
Ngwa dəhə sə inə səya təkəra nyandəla Yusufu,
ana səya təkəra nji inda kwa səm təlkur ku huɗa nda.
17 Nyandəla Yusufu kwa ɗa na dunama wi tla,
tələma nda kwa ɗa wi nə fur.
Ana tələma nda ndo dzavənda alenya hə'i,
mada alenya hə'i inda tə ɓəlkər dunəya.
Əngə ma'a nə nyandəla Efrem kwa ɗa dəbu kumə kuma,
nə Manasa tsə'u kwa ɗa dəbu dəbu.
18 A təkəra nyandəla Zebulun ana Ishaka cha na
<<Ga nyandəla Zebulun uya biyama ku shafəli kənda tə fa'a,
ana nyandəla Ishaka mər gəna ku ki.
19 Ndo tsəmtə nji gyo məa
kinda ndo gi hatəmachi tsa'atsa'akur,
ndo gi mər ladər ana sə inda nda uya nyaɓə ku fa'a,
ana gəna nda ɗəuwaɗəuwanyi ku məshishi'ua.>>
20 A təkəra nyandəla Gad cha na, <<Falə ngyatə nə Hyel nda tə mərtə hə'i kənda dlaɓəu.
Gad tə səkə wi ngə tə ləvari kwa səka,
ka cha kutlanda chi ndara kəra alenya sərshishi.
21 Nda tabiya hə'i nda ndiya na mənakə nə kərnənda,
ngə nja fiya nda mbaɗə nda njo kina nə nyi nə gau.
Nda njirawawa'a tə tsəmtədza,
ngə nda mərtə sə tsa'atsa'a nda Tlakə kwa i,
ga nəubiya tsaubar i'i.>>
22 A təkəra nyandəla Dan cha na,
<<Wi zər ləvar nda,
inda kwa dləgəl zəbiya ku tləl vu Bashan ka pah njir dawa kənda.>>
23 A təkəra nyandəla Naftali cha na,
<<Nyandəla Naftali nyinyi nyi nda na kwambiyakur Tlakəu,
ya nyinyi nyi nda na papa'akur,
ndo fa'aki na hə'i inda təwa holma nə fa'a.>>
24 A təkəra nyandəla Asha cha na,
Njir papa'akur ngə nyandəla Asha matsa alenya ka zamə nyi,
əngwa nda ɗa ka sər nyida nə ka zamən nda,
ətsəu ga wur zaitun kənda ɗa na yayar zaitun nyaɓəu.
25 Ga mələm kənda i'i a ɗa ɓəlaɓəla nyi na nyaki lyang,
nda ɗa ɓəlaɓəla nyi tsəu.
26 <<A ndə da wi Hyel nə Jeshurun,
nda kwa səya kya huɗaməlləm ka cha dləuya nda, ku ləmbəkə ku səli nyi wa.
27 Hyel nda a ɓəlnyi da wa nacha ngə mbwar ngya kəhi,
a da kiɗa cha tsəu, cha cha nda ba'anawa kwa vala hi.
Cho gədlənda njir dawa kəhi man hi,
Yakubu sənyi kwa ngya ku hə'i nda na uhi ana anapəu,
mbwa nda kuchikəpa kwa səya tə kya huɗaməlləm.
29 Njir papa'akur hi njir Isra'ila,
wa nji inda,
Tlakə tə dləuya wi nahya?
Nacha ngə ləga ana ndər vala hi
ya nacha ngə katsakər kəhi nda na səli.
Njir dawa kəhi kwa shili piya huɗən hi,
ya hyo dərɓənda nda na hya hi.>>