Tər Musa
34
1 Ngə Musa tə hya'atə tə ɓya'ar hə'i Mowab ga təra gyo Mə Nebo, kwa'a gyo gachikəɗa Pisga, nda kwa ndzamdzə na Jariko, 2 ana dəhə hə'i nda kwa ɗaka nə Naftali, mətla Ifrem ana Manasa, dəhə hə'i Yahuda bətə gwa təwa zədərpəchi nə Fa'a Məditereniya, 3 ana Negev ana dəhə mətla nda fwatə ku dakə Jariko, Mələm Dabino, kwa'a yi Zoar. 4 Ngə Tlakə tə nar nyi nə Musa, <<Hə'i nə ngə ya mərtə nyi alkawal təwa səmfəla nə Ibrahim, Ishaku ana Jakop ənda yo nə nyi nə nyandəla nda. Jan ya ngya nghə tə ka la'a na lya ka, kəl ja, a da ko gwatə wa.>>5 Təma ngə Musa mava Tlakə tə tah ku hə'i Mowab wi nda Tlakə tə na. 6 Ngə Tlakə tə haɗiya nyi tə hə'i Mowab, ku dakə nda kwa ndzamədzə na Bet Peyor, kəl ja, ba'aka ənya, a ndə da zəndə mbwa nda hu nyi tə wa. 7 Fa Musa 120 ma cha tah, dəhə ka ənga, a dunama nyi da təutə wa, ya a mada lya cha da təutə wa. 8 Njir Isra'ila tə sə'ingu Musa tə babal Mowab hanyi makərkumnyi, kəl nda bəjir tiwi ana sə'ingu nyi tə tərabiya.
9 Sakan ja, Joshua zər Nun nyitə na shanguɗə dəma aka Musa fəkə nyi tə chi. Njir Isra'ila tə nəu nya Joshua ga mər sə nda Musa tə tsau nda bar. 10 Fwatə tə bəji nda, ndə da uya vanya ndər mətakər wi Musa, ndə nda Tlakə tə ɓwanya nə nya na nya wa. 11 Vanya ndər mətakər da nda a ɓəla mərtə chulkə səshinshin ana sər məngəl wi nda Tlakə tə mər vu Masar, anə Fir'auna, njirawawa nyi ana dəhə hə'i nda wa. 12 Ya a vanya ndə da nda nau char gyalkur dəgal ndara sər ləvər wawa'a nda Musa tə mərtə tə lya dəhə njir Isra'ila wa.