Rahap tə Vala Njir Gwa'a hya Mələm
2
1 Ngə Joshuwa zər Nun tə sə njir gwa'a hya mələm mətlə hya'atə vu Shitim tə ɗəwa. Cha nar nda, <<Ma'i ma, hya gwa ndzamar mən hə'i nga, a da wi Jariko ma'a wa.>> Ngə nda təra ga yi go ki vanya zawar na tləmə nyi Rahap ga gwa ngya ku nda. 2 Kəl ja, nja nar nyi nə təl Jariko bəra, <<Janə alenya njir Isra'ila da tə shili ka gwa'a hya hə'i na.>> 3 Aka ənga təl Jariko tə sətə nyi mafakə nə Rahap bəra, <<Zəbiya na nji inda shili ku ki nghə inda, aka nda shili nga, ka ga nda gwabiya hya mələm nə dəhəu.>>4 Rahab wurtə ɗəwanda nji inda, ngə cha wum ga na, <<Jiri, nji ingə shilitə tangna, kəl ja, a da ya zəndə mbwanda nda hya'atə tə wa. 5 Aba akə nda ngyar mələm na, aku bəji nda kaɗə nja haɗəya nya mələm. A da ya zəndə banda nda təra tə wa. Ma hya kusa, kustanyi hyo həya nda.>>
6 Kəl ja, a wur təcha təra nanda gyo kəra pakəu, ga gi ɗəwanda nda da kiɗa chiva inda cha piya kya təkəra pakə nda. 7 Ngə nji inda tə biya ka gədlə njir gwa'a hya mələm inda tahə laku nda kwa gwa nya Urdən, biyakura nda ngə nja haɗənda nya mələm nda.
8 Təvi njir gwa'a hya mələm inda piya vu'i nda, ngə Rahap tə gya da nda kyo kəra pakə nda. 9 Cha nar nda, <<A zəndə tə ea Tlakə nə hi tə hə'i na, ya ləvər səya tə dəhə nji inda na ngya tə hə'i na tsa hi. 10 Aka a ngatə tə ea ənda Tlakə tə mərtə Fa'a Dizə tə shi'u man hi, ku bəji nda hya ngyar hə'i Masar tə nda, ana ənda hya kuɗənda ka Sihon ana Og təl njir Amori mətlə inda təwa zədərpəchi nə Dəl Urdən, hya kuɗənda nda papatəu. 11 Nda ea ngatə ngə ləvəra səya ea, kəl dəhə ea dza ea tə tsəyadza. Aka Hyel Tlakən hi ngə Hyel nda ki huɗamələm ana tangnə tə dunəya.
12 <<Sakan ja, səmda ɗa ma fəla na tləmər Tlakə ənda hyo char nyi mənakəkur nə ki ada ɗa, tang wi nə ya char hi na. Chabiya ɗa ma təkəɗəu 13 ənda a da hyo kuɗənda ka ada ɗa na ama ɗa, kə'i zamə ɗa ka kwamə ɗa, ana dəhə sənda nəkənda wa.>>
14 Ngə nji inda nar nyi nə Rahap, <<Ga Hyella kuɗənda ea, ma a da ea nyabiya sə ngə ea dəkə ngə wa! Ma a da ka chuɗəbiya ənda tangnə ea wa, ma Tlakə tə nə ea hə'i na, eo char nghə mənakəkur.>>
15 Aka ənga Rahap tə lənda nda na sə'i səya təwa kagapəu, aka ki nyi kyatə kəra ɓangtili mələm nda. 16 Ngə cha nar nda, <<Ma'i ma hya gi mbuta hi kya tə hə'i dəgəl dəgəl inga tsa njir gədlə hi da ba'a uya hi. Hya mbuta hi kinda hanyi makərəu, kəl manda ɓələu ba'a hya tərata hi.>>
17 Təvi nda təra, nda nar nyi, <<Səmfəla nda ka nar ea ea mər nə nghə nda, a do ngya təkəra ea wa 18 kəl nda ma ea da səgwa ku mələm na, tuku ka mbiya sə'i dizə na, ku kagapə nda ka lənda ea təwari nda, ya kəl ka shili na ada ngha, ama ngha, kə'i zamə nghə ana dəhə njir ki kəhi shili ku ki ngha. 19 Ma nda biya tə kəra laku nja kuɗənda nda, a da bikə kə ea ngə wa. Kəl ja, ma vanya ndə tə səgwa tsəka nda kuna, yau ba'a mashi kənda ngya tə wulya ea. 20 Ma ka tləɗa nda ea tsəu, a səmfəla ngə do mbiya ea wa.>>
21 Ngə Rahap tə na, <<A dləukər tə ya, cha ɗa tang wi ngə hya na nga.>> Aka ənga cha səu nda ku laku ngə nda təra. Ətsəu, cha mbiya sə'i dəzə ku kagapə nda. 22 Nda nda təra, nda gyo hə'i dəgəl dəgəl nda ga gi ngya kinda hanyi makərəu, kəl nda njir gədlənda inda wi na gwa'a nda təkəra laku i'i, nda a da nda uya nda wa, ngə nda ɓəlta nda. 23 Ngə njir gwa'a hya mələm inda səya kyo hə'i dəgəl dəgəl nda, ga tahəya dəl nda, ga yi nar nyi dəhə sənda tə ɗa na nda nə Joshuwa zər Nun. 24 Ngə nda nar nyi nə Joshuwa, <<Vəlvələu, Hyel nə mən tə dəhə hə'i nda ku cha mən, aka ləvər səya tə dəhə nji tsa mən.>>