Njir Isra'ila tə Dləgəlbiya Dəl Urdən
3
1 Vanya zəkə tsəɗakə mbudla, Joshuwa kə'i njir Isra'ila tə ngyar Shitim ga təra yi Urdən, tangnda nda tsəmtədzə təvi nda dləgəlbiya. 2 Ahir hanyi makərəu, njirawawa'a njir Isra'ila tə zhulitə mbwar tsəmdzə nda, 3 nda kwa tsau nyi bar nə nji ndo na, <<Ma bəji nda hya la'a Gwarara mbandər Hyel Tlakən hi, ana Pərist inda njir Levi kwa hə gwarara nda, kəl hya ngyar mbwa nda hi ti, hya nəuwa. 4 Təwa ənga hyo zəndə laku nda hyo nəuwa, mana a da hya ta nəu laku ngə wa. Kəl ja, hyo ngyar babal ku pama hi kwa ɗa jiga hi 3,000, ngwa hya da ləhətə nyi wa.>>5 Ngə Joshuwa tə nar nyi nə nji, <<Chinda ma ma kərnəhi, aka əzəkəu Tlakə kwa mər sər məngəl ku pama hi.>>
6 Ngə Joshuwa tə nar nyi nə Pərist i'i, <<Hətə ma Gwarara mbandər hya tərabiya biyamar nji.>> Aka ənga, nda hətə Gwarara mbandər nda ga tərabiya biyamar nji.
7 Ngə Tlakə tə nar nyi nə Joshuwa, <<Ənya na yo ghəya mərtə nghə ko ɗa na səli mar dəhə njir Isra'ila, tsa'aka ndo zəndəbiya ənda tsa'a ya na ka, tang wi nda ya ngya tsa'a na Musa. 8 Ka nar nyi nə ka Pərist ingə kwa hə Gwarara mbandər nga, <Ma hya həya nya Dəl Urdən, ba'a hya gwa ta'i ku dəl nda.> >>
9 Joshuwa tə nar nyi nə njir Isra'ila, <<Shili ma tangna, hya səndzə himi da ɓwanya Hyel Tlakən hi. 10 Əngə ngə hyo nau zəndəbiya ənda Hyel nda na pi ku huɗa hi cha, ya a da na kərmətlə wa, cho gədləbiya njir Kan'ana, njir Hiti, na njir Hivi, ana njir Periz, ana njir Girgash, ana njir Amori, ana njir Jebusi a biyaman hi. 11 Hya zəndi, Gwarara mbandər Tlakə nə dəhə dunəya kwa ghəya dləgəlbiya Dəl Urdən təvi nahi. 12 Hya ɗəmtsə shili kwabəmətlə ku dəhə nyavi njir Isra'ila, zhang ku kala nyavi. 13 Ɗəɗəu tanyi, ma pərist inda kwa hə gwarara mbandər Tlakə nə dəhə dunəya kwa fəu hyanda go ɓiti nda, kəl ɓiti nda kwa ta'i, kəl ɓiti nda kwa səya kwa ɓutədzə dum tə mbwarzhang.>>
14 Aka ənga, nda nji tə hya'atə tə mbwar tsəmdzə nda ga ghəya dləgəl Urdən, pərist inda kwa hə gwarara mbandər nda tə tərabiya biyaman nda. 15 Ya a tə bəjir fwakəu, dəl Urdən kwa nyi tsa'a biya nyabam. Dəhə ka ənga, tərkus pərist inda kwa hə gwarara mbandər nda kwa ləhətə Urdən, ngə hya nda tə tsəkar ɓiti, 16 kəl ɓiti nda kwa hwi səya kwa ta'i. Kəl kwa ɓutədzə dum naɗəu, ku vanya mələm nda njo nga Adam, ləhə dzər Zaretan, ɓiti nda kwa hwi da səya tsəu, kwa təra səyo fa'a Arabah (Fa'a Wuna) tə ta'i pa'apa'a. Ngə nji inda tə dləgəlbiya dəl nda, a tə vanya mbwa nda kwa ndzamdzə na Jariko. 17 Pərist inda kwa hə gwarara mbandər Tlakə nda, tə ta'ita nda tə hə'i ulul tə ghada Urdən, dəhə njir Isra'ila tsə'u tə tərabiya, kəl nda dəhə jul nji inda tə tərabiya papatəu tə hə'i ulula.