Hangu kwabəmətləu
4
1 Nda dəhə nji tə dləglbiya Dəl Urdən, ngə Tlakə tə nar nyi nə Joshuwa bəra, 2 <<Ɗəmtsə nji kwabəmətləu zhang ku kala nyavi, 3 ka nar nda, nda ɗəmtsə hangu kwabəmətləu, kwa tə ghada Urdən təwa chisəma mbwa nda kə'i pərist tə ta'i tə nda, hya təra nə hya yi piya tə mbwa nda hyo hanyi tə ənya.>>4 Ngə Joshuwa tə nga nji kwabəmətlə inda cha ɗəmtsə ku Isra'ila, ndə zhang ku kala nyavi nda, 5 ngə cha nar nda, <<Ma'i ma biyamar Gwarara Tlakəu, gwa tə ghadar Urdən. Kala ndə cha tabiya hangu cha hətə tə patləka cha, məlməl na ɗangkura nyavi njir Isra'ila. 6 Ana hangu inga məno hərtə sər ɗənghatə na sə nda Tlakə tə məra. Ma ngulisha'a kəhi tə da jau hi, <Mi ngə hangu inə təkəra?> 7 Kəl hyo nar nda, ənda ɓitir Urdən tə ta'i, nda Gwarara Mbandər Tlakə kwa dləgəl dəl Urdən. Hangu ina kwa ɗa ka sər ɗənghatə nə njir Isra'ila ba'anawa.>>
8 Aka ənga, njir Isra'ila tə mər tang wi nda Joshuwa tə nar nda. Nda fa'atə hangu kwabəmətləu, kwa tə ghadar Dəl Urdən, məlməl na ɗangkura nyavi njir Isra'ila, tang wi nda Tlakə tə nar nyi nə Joshuwa. Ngə nda təra nə kya tə mbwar tsəmdzə kənda, ga yi piya tangnda. 9 Ngə Joshuwa tə bərdliya hangu kwabəmətlə inda nda fa'atə kwa tə ghadar Dəl Urdən nda, tangnda pərist inda kwa hə Gwarara Mbandər nda tə ta'i. Ya tsəuta nda tangnda ba'a ənya.
10 Pərist inda kwa hə Gwarara Mbandər nda tə ta'i kwatə ghadar Urdən, kəl nda nja wurandə mər dəhə sə inda Tlakə tə nar nyi nə Joshuwa, tang wi nda Musa tə tsau nyi bar nə Joshuwa. Ngə nja tərabiya ku dəl nda ana kusa, 11 ya ahir nda dəhə nji tə dləgəlbiya dəl nda, ngə pərist inda kwa hə Gwarara Mbandər nda, tə dləgəlbiya nji kwa dzama. 12 Nyandəla Roben, Gad ba'a mar nyandəla Manasa tə təra biyamar njir Isra'ila, ga ɓatliya ka dla'a, wi nda Musa tə tsau nda bar. 13 Nji kwa ɗa 40,000 inda tə ɓatliya kərnənda biyamar Tlakəu ka ki dla'a, tə dləgəlbiya biya tə babal inda ləhə dza Jariko.
14 Pəshi nda ngə Tlakə tə mərtə Joshuwa cha ɗa na səli mar njir Isra'ila, ya ndo la'a nyi na səli ku dəhə ngya nyi ku huɗa nda, tang wi nda nda la'a səlir Musa.
15 Ngə Tlakə tə nar nyi nə Joshuwa, 16 <<Nar nyi nə pərist ingə kwa hə Gwarara Mbandər nga, nda zəbiya ku Dəl Urdən nga.>> 17 Ngə Joshuwa tə nar nda. <<Biyama ku Urdən nga.>>
18 Ngə pərist inda kwa hə Gwarara Mbandər Tlakə nda tə biya ku Dəl nda, tərkusə hyanda kwa tsəkar bwa 'ul'ula, təma ɓitir Dəl Urdən nda tə ɓələu ga ghəya hwi winda cha ɗakaɗa.
19 Njir Isra'ila tə dləgəbiya Dəl Urdən pəshir kumkunya hanyi nə tangərmar hya. Ngə nda tsəmtədzə vu Gilgal təwa zədərpəchi nə ɓəlkər Jariko. 20 A hinda ngə Joshuwa tə bərdliya hangu kwabəmətlə inda nda ɗəmtsə ku Dəl Urdən nda. 21 Cha nar nyi nə njir Isra'ila, <<A biyama, ma ngulisha'a kəhi tə jau hi bəra, <Mi ngə ba'adar hangu ina?> 22 Hya nar nda bəra, <Njir Isra'ila tə dləgəlbiya Dəl Urdən a tə hə'i 'ul'ula.> 23 Aka Hyel Tlakən hi tə shi'ubiya Dəl Urdən, kəl nda hya dləgəlbiya. Hyel Tlakən hi tə mərtə nyi nə Urdən, tang wi nda cha mər nə Fa'a Dizə man mən nda. 24 Cha mər ənga aka ga dəhə njir dunəya nda zəndəbiya gyalkur dəgal nə cha Tlakəu, ana ga hya ləvər Hyel Tlakən hi ba'anawa.>>