5
1 Manda dəhə ka təl ka təl nə njir Amori ana dəhə ka təl ka təl nə njir Kan'ana, inda nya dəl, tə ngatə ənda Tlakə tə shi'ubiya Dəl Urdən mar njir Isra'ila, kəl nda nda dləgəlbiya, ngə ləvər tə səya nda, a tsə'u da nda na ɗufə nə ta'i mar njir Isra'ila wa.Tla Bədzang vu Gilgal
2 Aku bəji nda, Tlakə tə nar nyi nə Joshuwa, <<Ɓatləbiya ngəhya i'i ku hangu, ka tlanda nyi bəndzang nə shili Isra'ila.>> 3 Ngə Joshuwa tə ɓatləbiya ngəhya hangu, ga tlanda nyi bəndzang nə njir Isra'ila a vu Gibiyat Ha'aralot.
4 Jan sə nda tə gwa'atə nja tla bəndzang nə nda, dəhə shili, inda tə ɗa ka dla'a, tə kuɗə kwa tə dadil takəu ahir nda ngyar hə'i Masar. 5 A tlanda nyi tə nji bəndzang nə dəhə nji inda tə zəbiya vu Masar, kəl ja, a da nja tlanda nyi nə dəhə nji inda nja yah ku dadil takə ku lakur ma'i kənda hya'atə vu Masar nda wa. 6 Fa fwaɗəkumənyi njir Isra'ila tə məra, ndo zhuli tə dadil takəu, tə nda ɗa, dəhə shili inda pəlakər ki dla'a tə bəji nda nda ngyar Masar tə nda, a kuɗə ti, aka a da nda nəu nya Tlakə wa. Aka Tlakə tə səmnda nda fəla ənda, a da ndo la'a hə'i nda cha mər alkawal cho nə nyi nə jival kənda wa, hə'i nda 'ua ana mwamwa kwa hwi kwa. 7 Aka ənga ngə cha hya'andə nguli shili kənda tə nyanə nda, nanda ingə Joshuwa tə tlanda nda bəndzang. Aka ba'aka saka nga nji kəla tlatla bəndzang nda, aka a da nja tlanda nda bədzang ku laku wa. 8 Ahir nda nja tlanda nyi bəndzang nə dəhə jul nji, nda ngya ku mbwar tsəmdza, kəl nda nda mbəa.
9 Ngə Tlakə tə nar nyi nə Joshuwa, <<Ənya, a hənda hi tə ya həyatəvi nə mavakur nda hya mər vu Masar.>> Aka ənga, njo nga mbwa nda Gigal ba'a ənya.
10 Aba akə pəshir kwabəfwaɗukunya pəchi nə hya nda, nda njir Isra'ila tə tsəmtədzə vu Gilgal tə babal Jariko, nda mər Ladər Dləgəlnda. 11 Vanya zəkəu, nda səm ku sə inda nja zwa tə hə'i nda, gwazhilakə kəla tləlam ana uhi tsatsa. 12 Vanya zəkəu ahir nda səm sərsum nə hə'i nda, a njir Isra'ila da zhaka uya Manna wa, kəl ja, a ku fa nda, nda səm sə zwazwa nə hə'i Kan'ana.
Gau Ləvaləva Tlakə ana Joshuwa
13 Nda Joshuwa tə ɗa ləhə dzər Jariko, kəl cha la'a vanya ndə ta'i na katsakər ku cha cha. Ngə Joshuwa tə gi ga gi jau nyi, <<Nə kəea kə zəma, aa nə njir dawa kəea?>>
14 Ngə ndə nda na, <<A da ya shili ka hi ndara ka njir dawa kəhi wa, naya gau ləvaləva nə Tlakə ya, nacha gwa'atə ya shili.>> Nda Joshuwa tə ngatə ənga, ngə cha uzhi huɗə nyi ga hətə nyi səli ga jau nyi, <<Mi mafakə nda Tlakə ɗa tə shili nə ka mavanya?>>
15 Ngə gau ləvaləva Tlakə nda tə wum ga na, <<Səɗəbiya ɓiɓi ngha, aka mbwa nghə kə tə nga, mbwa karti nga.>> Ngə Joshuwa mər ənda.