Dlar Jariko
6
1 Nja haɗənda lakur gu Jariko ga piya njir ɓəla tsa njir Isra'ila da gwa. A ndər nau gwa, ndara biya da wa.2 Ngə Tlakə tə nar nyi nə Joshuwa, <<La'a, jan ya nə nghə tə mələm Jariko ana təl nyi ba'a ləvaləva nyi ku cha ka. 3 Hya ɓandə mələm nga nahi ka ləvaləva ngha zhang kala pəchi, hya mər əngə hanyi kwah. 4 Ka nar nyi nə pərist məɗəfa, nda ta'i mar Gwarara Mbandər ana tələm ku cha nda. Pəshir məɗəfəkunya hanyi, hyo ɓandə mələm nda zhaka məɗəfa, pərist inda kwa mbəɗə tələm inda. 5 Ma hya ngatə nja mbəɗəya tələm 'ual'ualəu, ka nar nyi nə dəhə nji nda pə kurakəu, ana ənga ɓangtili mələm nda kwa dla, ləvaləva kəhi kwa təra gu ta mələm nda, ətsə'u kala ndə cha gwa tangnda tə cha ti.>>
6 Ngə Joshuwa zər Nun tə nga pərist i'i ga nar nda, <<Hətə ma Gwarara Mbandər Tlakəu, hya ɗəmtsə pərist məɗəfə na tələm ku cha nda, a biyamar Gwarara Mbandər nga.>> 7 Ngə cha nar nyi nə nji, <<Hya'atə ma, hya ɓandə mələm ngə na ma'i, ləvaləva inda na kar pah nda ɗa biyamar Gwarara Mbandər Tlakə nga.>>
8 Nda Joshuwa tə ndər na nji, pərist məɗəfə inda na tələm məɗəfə ku cha nda inda tə təra biyama, ndo mbəɗə tələm, Gwarara Mbandər Tlakə kwa nəu nda. 9 Ləvaləva inda na kar pah kwa ma'i biyamar pərist inda kwa mbəɗə tələm inda, ana alenya dzuk ləvaləva kwa nəu hir Gwarara Mbandər nda. Ku dəhə bəji nga, tələm tanyi njo mbəɗa. 10 Kəl ja, Joshuwa tə tsau nyi bar nə nji bəra, <<Ngwa hya da pə kurakər pah wa, ngwa hya har kuraka hi wa, ngwa hya da ɓwanya wa, kəl bəji nda ya nar hi, ba'a hya pə kurakəu.>> 11 Ngə cha na nja hətə Gwarara Mbandər Tlakəu, nja ɓandə mələm nda ni, zhaka zhang. Ahir ənga, ngə nji tə ɓəl ga shili hənda hanyi tə mbwar tsəmdza.
12 Joshuwa tə hya'atə tsəɗakə mbudla vanya zəkəu, ngə pərist inda tə hətə Gwarara Mbandər Tlakəu. 13 Ngə pərist məɗəfə inda na tələm məɗəfə ku cha nda inda tə təra biyama, nda kwa ma'i mar Gwarara Mbandər Tlakəu, ndo mbəɗə tələm inda. Ləvaləva inda na kar pah inda tsəu, kwa ma'i biyamar pərist inda kwa mbəɗə tələm inda, ana alenya ləvaləva inda na kar pah kwa nəu hir Gwarara Mbandər nda, ku dəhə bəji ngə kəl tələm tanyi njo mbəɗa. 14 Pəshir mətləkunya pəchi, nda ɓandə mələm nda zhaka zhang, ga ɓəl kya tə mbwar tsəmdza. Əngə tanyi nda mər hanyi kwah.
15 Pəshir məɗəfəkunya pəchi, nda hya'atə tsəɗakə mbudla, ga ɓandə mələm nda wi nda parakəu, kəl nda pəshi nda zhaka məɗəfa nda ɓandi. 16 Nda ndo ɓa mələm nda nə məɗəfəkunyi, nda pərist inda tə mbəɗiya tələm kənda, ngə Joshuwa tə nar nyi nə nji, <<Pə ma kurakə ja! Aka Tlakə nə hi tə mələm na! 17 Tuku nja nginda mələm nga ana dəhə sə inda kwa, aka sər hatəmachi nə Tlakəu. Kəl ja, hya ngyar Rahap zawar nda, ana dəhə nji inda ku ki nyi na pi, aka cha mbunda njir gwa'a hya mələm inda məna sə inda. 18 Kəl ja, ngwa hya da tsəkar kala sə inda nja na nja zhazhinda wa, hya da ba'a təɗəkənyi təmachi nə daɓdzər njir Isra'ila. 19 Dəhə azurfa, bəjingha ana sə inda nja mər na ndzəa ana lyang nə Tlakə inga, ya tuku nda ngya ku məɗəwa nyi.>>
20 Nda nja mbəɗiya tələm inda, ngə nja pə kurakəu, ya nda nja ngatə kuraka tələm nda, ana nda nja pə kurakəu gagaɗa, təma ɓangtili nda tə dla, aka ənga kala ndə tə gwa tangnda cha ti, ngə nda gwa dləuya mələm nda. 21 Ngə nda kuɗənda dəhə səpipi inda ku mələm nda na katsakər, mahi'i ka shili, ngulisha'a ka nji halala, tla i'i, kətəng i'i ana kwara i'i.
22 Ngə Joshuwa tə nar nyi nə njir gwa'a hya mələm mətlə inda, <<Ma'i ma yo ki zawar nga, hya gwa zəbiya na cha ana dəhə nji inda nə nyi, tang wi nda hya mərtə nyi alkawal.>> 23 Ngə njir gwa'a hya mələm inda təra ga gwa zəbiya na Rahab, ada nyi ana ama nyi, ka zamə nyi ana ka kwamə nyi ana dəhə nji inda nənyi. Nda fa'abiya dəhə njir ki nyi ga piya nda tə vanya mbwa, a biyahir mbwar tsəmdzə njir Isra'ila.
24 Ngə nda nginda dəhə mələm nda ana dəhə sə inda kwa, kəl nda azurfa, bəjingha ana sə inda nja mər na ndzəa ana lyang ngə nda fa'atə ga ki pəu ku məɗəwa aku ki Tlakəu. 25 Ngə Joshuwa tə ngyar Rahap zawar nda ana pi, nacha kə'i njir ki ada nyi ana dəhə nji inda nənyi, aka cha mbunda njir gwa'a hya mələm inda nja sə yi Jariko inda. Rahap tə ngya ku pama njir Isra'ila ba'a tə bəji nə ənya na.
26 Atə bəji nda, Joshuwa tə ɓwanya nə nda ana səmfəla ga na, <<Shi'u ngyatə təkəra kala ndə nda ɓəla gwa'a cha hərti mələm Jariko:
Ana pya zər tangərma nyi
cho səya hyavi,
ana pya hir nyi
cho haɗənda nyavi nyi i'i.>>
27 Əngə Tlakə tə ngya tsa'a na Joshuwa, ya tləm nyi tə tiwi ku dəhəkura hə'i nda.