Səpəla'a nda Akan tə Məra
7
1 Tlakə wurta tsau nyi bar nə njir Isra'ila ənda, ngwa nda da tsəkar dəhə sə inda Tlakə tə na nja nginda wa. Kəl ja, Akan zər Karmi zər Zimri, zər Zera, ku nyavi Yahuda tə fa'atə alenya sə inda. Aka ənga, huɗa Tlakə tə tla gagaɗa tsa njir Isra'ila.2 Joshuwa tə sə nji hya'atə vu Jariko a yi Ai, nda ləhə dza Betaven təwa zədərpəchi nə Betel, nja nar nda, <<Ma'i ma, hya ki gwa'abiya hya mələm nga.>> Ngə nji inda tə təra ga ki gwa'abiya hya mələm Ai.
3 Nda nda ɓəla shili da Joshuwa ngə nda nar nyi, <<A da kəl dəhə ləvaləva biya ka ki dla'a njir Ai wa. Nji 2,000 ndara 3,000 tanyi njo səa, ya ndo kura nda, a da kəl nja həɗandə dəhə ləvaləva wa, aka nji tsaɗə tanyi na ngya hinda.>> 4 Aka ənga, nji kwa ɗa 3,000 tə təra, kəl ja, njir mələm Ai tə gədlə nda, 5 ga kuɗənda makərkumnyi parnya kwah aku pama nda. Nda səma njir Isra'ila fwatə nya mələm tsa'a ya tə vanya mbwar huɓə hangu. Əngə ɗufwa nji tə tsəyadzə na ləvəra, ga ɗa wi ɓitir giɗa.
6 Ngə Joshuwa tə tətanda dzaki dzə nyi ga piya tsupətənya mar Gwarara Mbandər Tlakəu, cha ngya tangnda ba'a akəu, əngə tanyi tsə'u njirawawa'a Isra'ila tə məra, nda tsəkəu bərbər ku kəranda. 7 Ngə Joshuwa tə tiwi ga na, <<Miɗa Tlakə Ndər Gyalkur Dəhəu, aka mi ka zəbiya na ea tiya Urdən ga ka fəu ea ku cha njir Amori ka nda kuɗənda ea? Kwa nda ea ngyata ea biyatiya Urdən nda. 8 Mi yo nau na manə njir Isra'ila tə hwi tsa njir dawa kənda ja Tlakəu? 9 Aka njir Kan'ana ana alenya nji nda na ngya tə hə'i nda kwa ngati, ndo ɓandə ea ba'a zhazhinda tləmən ea tə dunəya. Yau, mi ko mər ka tləmə nghə nda na səli ja?>>
10 Kəl ja, Tlakə tə nar nyi nə Joshuwa, <<Hya'ati! Aka mi ko piya tsupətənya hu'i wi na? 11 Isra'ila mərtə səpəla'a ga ɓəlnda gadlagadla nda ya nə nda. Nda uyatsə ku sə'inda ya katə nda tsa nda da tsəkari, nda həl, ga daɓiya na sə inda nəkənda, nda tla gəzhi. 12 Nacha nga gwa'ati njir Isra'ila da nau ta'i ka pah njir dawa kənda wa, nda sha ga hwi tsa njir dawa kənda aka a ɗatə nda ka nji inda njo kuɗənda. A tsə'u yo ngya kə'i hi wa, kəl hya zhazhinda dəhə sə inda nja na hya nginda inda ku huɗa hi.
13 <<Hya'atə ka dzəviya nji ka nar nda, <Chinda ma kərnəhi hya ɗa chaməu aka zəkəu, aka Tlakəu, Hyel nə njir Isra'ila tə na, sə hiɗahiɗa da i'i ku huɗa hi. Kəl ma hya fa'abiya, hyo dzugwa nau ta'i mar njir dawa kəhi.
14 << <Zəbiya mbudla, hyo zəbiya ta'i mar Tlakəu ka jul ka jul. Jul nda Tlakə tə tabiya, kwa zəbiya ta'i ka nyavi ka nyavi, nyavi nda Tlakə tə tabiya tsə'u kwa ta'i ka ki ka ki, ki nda Tlakə tə tabiya kwa zəbiya kərzhang kərzhang. 15 Ma ndə nda nja səya na sə'inda nja katə hi tsa tsəkari inda, njo nginda nyi na hu'u, dəhə ka sə inda nənyi. Aka cha ɓəlnda mbandər Tlakəu, ana tsə'u, cha mər sər kuzhi gagaɗa a vu Isra'ila!> >>
16 Tsəɗakə mbudla Joshuwa tə nar nyi nə nji nda zəbiya ta'i ka jul ka jul, ngə nja tabiya jul Yahuda. 17 Dəhə nyandəla Yahuda tə zəbiya, ngə nja həbiya nyavi Zera. Ngə Joshuwa tə nar nyi nə nyavi Zera nda zəbiya, ngə nja həbiya ki Zimri. 18 Ngə Joshuwa tə nar nda, zəbiya ma kərzhang, kərzhang ja, ngə nja həbiya Akan zər Karmi, zər Zimri, zər Zera ku nyandəla Yahuda.
19 Ngə Joshuwa tə narnyi nə Akan, <<Zər ɗa, ləvər Tlakəu, Hyel nə njir Isra'ila ka hətə nyi səli. Par ɗa sənda ka məra, əngwa hiwanda ɗa wa.>>
20 Ngə Akan tə ɓəlakə nyi ga na, <<Vəlvəl, a mərtə ya səpəla'a huɗə Tlakəu, Hyel nə njir Isra'ila. Janə sənda ya məra: 21 Nda ya la'a ngamdəu gumaguma chul nə njir Babila ku huɗa kwazhalɓi nda nja fa'aya, ana shekel nə azurfa 200, ana bəjingha nda tədəɓəkura cha kwa ɗa shekel təfukumnyi, ngə ya fətə ɗufwa ya ti. Wula ya ɗəwanda ti ku madləɓa ɗa ana azurfa da kiɗi.>>
22 Ngə Joshuwa tə sə alenya nji, ngə nda hwi yo madləɓa nda, ga yi la'a sənda ɗəwaɗəwanyi, ana azurfa da kiɗi. 23 Ngə nda fa'abiya sə inda ku madləɓa nda ga shili nə mar Joshuwa ana dəhə njir Isra'ila, ga hyanda mar Tlakəu.
24 Ngə Joshuwa ana dəhə njir Isra'ila tə hətə Akan zər Zera, ana azurfa nda, ngamdə nda, azurfaxx nda, ngulii nyi shili ka mahi'i, tla nyi i'i, kwara nyi i'i, ana kətəng nyi, madləɓa nyi ana dəhə sə inda nənyi, ngə nda təra na nda dəhəu, a go dakə Akor. 25 Ngə Joshuwa tə na, <<Aka mi ka təɗəkə mən təmachi əna? Tlakə kwa shili na təmachi təkəra ka ənya.>>
Ngə dəhə njir Isra'ila tə vəvakənda Akan na hangu, nda vəvakənda njir ki nyi tsəu, nga nginda sə inda həyadza. 26 Ngə nda ɓukənyi hangu nə Akan, ya tsəutanyi hangu inda ba'atə bəji nə ənya na. Ngə ɗufwa Tlakə tə tatla. Aka ənga nja nga tləmər mbwanda dakə Akor, nacha ngə dakə ɓwaɓwatəu, ba'a tə bəji nə ənya.