Njir Isra'ila tə Kura ga Zhazhinda Mələm Ai
8
1 Ngə Tlakə tə nar nyi nə Joshuwa, <<Əngwa ka da ləvər wa, ngwa ɗufwa kə da tsəyadzə wa. Fa'atə dəhə ləvaləva hya yi dla'a njir Ai. Aka a nə nghə tə ya təl Ai, ana nji nyi ana mələm nyi ana hə'i nyi ku cha ka. 2 Tang wi nda hya mərtə nyi nə njir Jariko, əngə tanyi hyo mərtə nyi nə njir Ai, kəl ja, hyo fa'aya kwazhalɓi sərshishi kənda ka kərnəhi. Hya mbuya nda mwabu biya tə ya mələm.>>3 Ngə Joshuwa ana dəhə ləvaləva tə biya ka ki dla'a njir Ai. Cha ɗəmətsə ləvaləva 30,000 inda kwa nau pah gagaɗa, ga mbəlatə nda biya əvu'i 4 cha nar nda, <<Səya ma himi mənakəu. A biya tə ya mələm hyo mbuya nda mwabu. Ngwa hya da ɗa naɗə tsa mələm wa. Dəhə hi hya ngya na ɓəla. 5 Naya ana nji inda ya kə'iri kwa təra gu ta mələm, ma nji inga zəbiya kəra ea, wi nda nda ɗaka mər nda, eo hwi tsa nda. 6 Ndo gədlə ea kəl ea təɗənda nda naɗə tsa mələm, aka ndo na, <Jan ndo hwi tsa mən wi nda nda ɗaka mər nda.> Ma eo hwi tsa nda, 7 nahi tsə'u ba'a hya hya'atə ku mwabu kəhi nda, ba'a hya kwasə mələm ngə Hyel Tlakən hi kwa nə hi nga. 8 Ma hya kwasə mələm nga, hya handzə nyi hu'u. Hya mər sənda Tlakə tə tsau hi bar təkəri. Hya ɓəlatə sə inə ya nar hi ina.>>
9 Ngə Joshuwa tə səu nda ku laku, nda təra kyatə mbwar mwabu kənda, nda mbuya nda mwabu ku pama Betel ana Ai təwa təɗərpəchi nə Ai, kəl ja, Joshuwa kə'i nji tə hənda hanyi tə mbwar tsəmdza.
10 Ngə Joshuwa tə hya'atə tsəɗakə mbudla ga tsəmtə ləvaləva nyi, ngə Joshuwa kə'i njirawawa'a Isra'ila tə təra biyama, ndo nəuna ləvaləva a yo mələm Ai. 11 Dəhə ləvaləva tə təra yi Ai, ngə nda ngya təwa vwa nə Ai, ba'a dakə ku pama nda kə'i mələm Ai. 12 Joshuwa tə ɗəmətsə ləvaləva kwa ɗa 5,000 ga piya nda ku mwabu ku pama Betel ana Ai, təwa təɗərpəchi nə Ai. 13 A tənda tə nji ləvaləva inda ka pah, dəhə ləvaləva inda ku mbwar tsəmdzə təwa vwa nə mələm nda, ana nji inda ku mwabu təwa təɗərpəchi nə mələm nda. Əvu'i nda Joshuwa tə təra gu dakə nda.
14 Nda təl Ai tə la'a ənga, ngə kərnyi ana dəhə njir mələm nyi tə biya tsəɗakə mbudla na kusa ka nda ɓə ka njir Isra'ila ka ga nda pah, a tə vanya mbwa təwa Araba. Nda təra təwa vwa, kəl ja, a da nda na zəndə ənda ləvaləva Isra'ila mbuya nda tə mwabu biyahir mələm wa. 15 Ngə Joshuwa ana dəhə nji nyi tə mərtə kərnənda wi nji inda ləvər tə səya nda ga ghəya hwi tsa njir Ai, nda hwi gwa təwa dadil takəu. 16 Ngə nja nga dəhə njir Ai zəbiya ka nda gədlə njir Isra'ila, nda gədlə nda, ana ənga njir Isra'ila tə təɗənda nda tsa mələm nda. 17 A vanya ndə da tə həyadzə vu Ai ndara Betel nda pa'a tə biya ka gədlə njir Isra'ila wa. Nda ngyar nya mələm kənda banghəu, ga biya ka gədlə njir Isra'ila.
18 Ngə Tlakə tə nar nyi nə Joshuwa, <<Har masə ngə ku cha kə ngə yakəra Ai, aka a nə nghə tə ya mələm ngə ku cha ka.>> Ngə Joshuwa har masə nyi yakəra mələm Ai. 19 Tərkus cha mər ənga, ləvaləva inda ku mwabu inda tə kusa hya'atə ga təra biyama na hwi. Nda gu ta mələm Ai ga gwa kwasa ga kusa handzə nyi hu'u.
20 Nda njir Ai tə sha ga la'a ear mələm kənda kwa təra shi huɗamələm, kəl ja, a tsə'u lakur mbəɗə da pa'a wa, aka njir Isra'ila inda kwa hwi tsa nda inda shatə shili kəra njir gədlə nda inda. 21 Aka sakanda Joshuwa ana dəhə njir Isra'ila tə la'a ənda nji inda ku mwabu inda kwasə tə mələm nda, ana ear nda kwa hya'atə ku Ai, ngə nda sha ga ghəya pah njir Ai. 22 Nji inda kwasə mələm nda tsə'u, tə zəbiya hya'atə ku ta mələm ga zəbiya ndzəm kəra nda na pah, tə nda ɗa njir Ai tə ɗa tə ghada. Njir Isra'ila tə kuɗənda nda dəhəu, a ndə da hwibiya ndara cha mbəɗə wa. 23 Kəl ja, nda səya təl Ai na pi ga shili na cha nə Joshuwa.
24 Nda njir Isra'ila tə wur na kuɗə dəhə njir Ai inda biya tə ya mələm ana inda kwa tə dadil takəu, mbwa nda nda gədlə nda ti, ngə njir Isra'ila tə ɓəl go mələm Ai ga kuɗənda nji inda kunda. 25 Pishinda, nji inda tə kuɗə vu Ai, nji 12,000 mahi'i ka shili. 26 Aka a Joshuwa da ɓəlandə masə nyi nda cha har yakəra mələm Ai nda wa, kəl nda cha kuɗənda dəhə nji inda na ngya vu nda. 27 Kəl ja, njir Isra'ila tə fa'aya sərshishi ana kwazhalɓi nə kərnənda wi nda Tlakə tə tsau nyi bar nə Joshuwa.
28 Əngə ngə Joshuwa tə nginda mələm Ai, ngə a ɗa ka huɗəfi jwajwa ba'atə bəjin ənya na. 29 Ngə cha hakəya təl Ai kya tə wua, ga ngya nyi pa'a pəchi. Nda pəchi kwa təɗa, ngə Joshuwa tə na nja həya gundəɓər dza cha kya tə dza wu nda, nja vakənda nyi ku lakur gu mələm. Ngə nja ɓukənyi hangu duməu, ya tsə'u tanyi hangu inda ba'a tə bəji nə ənya.
Taɗər Mbandər kyo Mə Ebal
30 Ngə Joshuwa hərtə dzəgana nə Tlakəu, Hyel njir Isra'ila kya tə Mə Ebal. 31 Cha ɓatlətə tang wi nda Musa mava Tlakə tə nar nyi nə njir Isra'ila. Cha hərtə tang wi nda cha tsəftsəfənyi ku likatkatə gadlagadla Musa bəra, <<Dzəgana hangu inda pa'a nja dzəɗa, inda pa'a nja tsəkar na lyang.>> A kya tə dzəgana nda, nda hatəmachi nə Tlakəu, nda hatəmachi nə nginda ana nə daɓkər. 32 A tangnda, atə lya njir Isra'ila, Joshuwa tə ɓəla tsəfəbiya gadlgadla Musa atə hangu i'i. 33 Dəhə njir Isra'ila, njir hə'i ana nji shilshili, ba'a nji halhal kənda, njirawawa'a kənda, njir tla nəuma kənda, tə ta'i təwa chisəm ana matsala Gwarara Mbandər Tlakəu, ndo dzam nji inda kwa ha, nanda ingə pərist nyandəla Levi. Mar njir Isra'ila tə ta'i kya nya Mə Gerazim, ma nda tsə'u kya nya Mə Ebal, wi nda Musa tə ɗaka na nja ta'i ku bəji nda njo səkənda papa'akur ti.
34 Ahir nga, Joshuwa tə kəratsətə dəhə ɓwanya gadlagadla, papa'akur ana shi'u i'i, tang wi nda cha tsəftsəfənyi ku Likatlikatə Gadlagadla. 35 A vanya sə da nda Musa tə tsəfəbiya nda pa'a Joshuwa tə kəratsəntə mar dlama njir Isra'ila wa, dəhə ka mahi'i ka ngulisha'a ka mihiɓi inda kwa ngya ku huɗa nda.