Njir Gibiyon tə Shandənyi Kər nə Joshuwa
9
1 Kura inda njir Isra'ila tə kura, tə gu hima dəhə ka təl ka təl inda təwa zədərpəchi nə Dəl Urdən, ana inda təwa sara dəgəl təwa zədərpəchi, ana dəhə nya Fa'a Dəgal kwa'a nə Lebanon. Nanda ingə təl njir Hitti, njir Amori, njir Kan'ana, njir Perizi, njir Hivi ana njir Jebusi. 2 Nda nda ngatə sə inda tə ɗa, ngə nda tsəmtədzə ka ga nda shili pah Joshuwa ana njir Isra'ila.3 Kəl ja, nda njir Gibiyon tə ngatə sənda Joshuwa tə mərtə nyi nə Jariko ana Ai, 4 ngə nda ɓatliya kwakunakur ka nda shandənyi kər nə Joshuwa. Nda ɓatliya kərnənda wi nja sə nda, nda ɓatləya sərsuma, ga mbatənyi mbəl halhalə nə kwara kənda i'i, ana salakam anap halhalə inda tə ta nja ɓəla mbəti. 5 Ngə nda hau ɓiɓi halhala hipahipa nyi i'i ga handzə dzaki 'utlə'utla. Dəhə sərsum kənda inda a 'ulti ga tlətə pəruru. 6 Ngə nda ya da Joshuwa ana njir Isra'ila tə mbwar tsəmdzə kənda vu Gilgal ga nar nda, <<Ea hya'atə tə hə'i naɗəu, eo gwa'a məna mbandəra.>>
7 Ngə njir Isra'ila tə nar nyi nə njir Hivi, <<Kustanyi ləhə hi ndzən ea na ngya, aka mi eo mbandər kə'i hya?>>
8 Ngə nji inda nar nyi nə Joshuwa, <<Na ea mavi'i nghə ea.>> Kəl ja, Joshuwa tə jau nda, <<Nahi wa ina, hya'atə man hya?>>
9 Ngə nda ɓəlakə nyi, <<Mavi'i nghə tə hya'atə tə hə'i naɗə gagaɗa, aka dəgalkura tləmər Hyel Tlakə ngha. Aka a ngatə ea dəhə sə inda cha mər vu Masar, 10 ana dəhə sə inda cha mərtə nyi nə təl njir Amori mətlə inda təwa təɗər pəchi nə Urdən, Sihon təl Heshbon, ba'a Og təl Bashan, inda tə səm təlkur vu Ashtarot. 11 Ngə njirawawa'a kəea ana dəhə nji inda na ngya ku hə'i kəea tə nar ea, <Uyatsə ma sər həlaku hya ɓatləya ka ma'i, ma'i ma hya yi nar nda, <<Naea mavi'i kəhi ina, eo i məna mbandəra.>> > 12 Gwazhilakə inə hyo la'a ina, tsə'u nda kwakwaɗə ea pəu ku mbəl ma'i kəea nda ea ngyar ki ka ea shili da hi. La'a ma ənda nda 'ulə ga tlətə ma'a pəruru. 13 Salakam ina, taɗə nyi inə ma ea nyandə nda, la'a chul ta nda nda ta. Janə dzaki kəea ana ɓiɓi kəea 'utlə tə tə vir ma'i naɗəu.>>
14 Ngə njir Isra'ila tə uyatsə sərsum nji inda, kəl ja, a na nda jau tsa Tlakə wa. 15 Ngə Joshuwa tə mbandər ngya mənakə kə'i nda, ngə njirawawa'a Isra'ila tə ɓəltə kər təkəri təwa səmfəla.
16 Hanyi makər ahir nda mbadnər kə'i njir Gibiyon, ngə njir Isra'ila tə ngabiya ənda təwul kənda inda, ana ngya ləhə dzən nda. 17 Aka ənga, njir Isra'ila tə biya pəshir hanyi makərkunyi ga shili ku mələm kənda i'i, Gibiyon, Kefira, Birot ba'a Kiriyat Jeyarin. 18 Kəl ja, a njir Isra'ila da pah nda wa, aka njirawawa'a tsəmdzə kənda wurtə səmnda fəla na tləmər Tlakəu, Hyel nə njir Isra'ila.
Dəhə daɓdzər njir Isra'ila tə huhuni təkəra njirawawa'a inda. 19 Kəl ja, njirarawa'a inda tə wuma ga na, <<A wurtə ea səmfəla nənda ana tləmər Tlakəu, Hyel njir Isra'ila, a da məno nau tsəka nda sakanə wa. 20 Janə sə nda məno mərtə nda, məno ngya nda na pi, tsa'aka a huɗatla Hyel da kwa səya təkəra mən, aka məna ɓəlda mbandər wa. 21 Ngya nda nji na pi. Kəl ja, na nda ingə kwa ɗa ka njir gəga shilu'u ana njir gwadəl nə dəhə daɓədzər njir Isra'ila.>> Ana ənga njirawawa'a inda da ɓəlnda mbandər nda nda mər wa.
22 Ngə Joshuwa tə nga njir Gibiyon ga nar nda, <<Aka mi hya shandə ea kər ga na, <Naɗə ea gagaɗə na ngya dzən hi,> ya jan hi ləhə ta hi dzən ea? 23 Sakan ja, shi'u kwa ngyatə təkəra hi. Hyo ɗa ka njir gwa shilu'u ana njir gwadəl shili ku ki Hyel ɗa ba'anawa.>>
24 Ngə nda wumə nə Joshuwa, <<A nar nyi tə nji nə mavi'i nghə təkəɗəu, ənda Hyel Tlakə nghə tə tsau nyi bar nə mava nyi Musa ənda cha nə nghə dəhə hə'i inda biyama ngha ka zhazhinda dəhə nji inda kwa. Aka ənga, ləvər tə səya ea tsa hya da kuɗənda ea, nacha gwa'atə ea mər ənga. 25 Nəchanə ja, jan ea ku cha ka, mər tə ea dəhə sənda ka la'a tə ɗa mənakə nə ngha.>>