Pəchi tə Ta'i Hinghəu
10
1 Nda Adonizedek təl Urshalima tə ngatə ənda Joshuwa tə kura Ai ga nginda kəɗətsəu, ana ənda cha mərtə nyi nə mələm Ai ana təl yi tang wi nda cha mərtə nyi nə Jariko ana təl nyi, ana ənda njir Gibiyon tə mbandər ngya mənakə ka njir Isra'ila inda na ngya ləhə ndzə nda. 2 Ngə ləvər tə səya təl Urshalima ana nji nyi, aka Gibiyon mələm dəgal cha, wi mələm nji təltəl, a ndəya tə nda ma'a mələm Ai, ya dəhə shili inda kwa, njir nau pah. 3 Aka ənga, Adonizedek təl Urshalima tə gədiya Hoham təl Henron, Piram təl Jarmut, Jafiya təl Lakish and Debir təl Eglon. 4 Cha nar nda, <<Anda ma, hya vala ɗa na pah njir Gibiyon, aka nda mbandər ngya mənakə na Joshuwa kə'i njir Isra'ila.>>5 Kəl ngə təl tufə njir Amori inda, təl Urshalima, Hebron, Jarmut, Lakish ana Eglon tə daɓtəkər. Ngə nda hya'atə kə'i ləvaləva kənda ga dla'a njir Gibiyon.
6 Njir Gibiyon tə sə nji ya da Joshuwa hi Gilgal bəra, <<Ngwa ka da ngyar mavi'i nghə wa. Shili da ea kuskus ka dləuya ea! Vala ea, aka dəhə ka təl ka təl njir Amori tə mbatə nya ka nda pah ea.>>
7 Ngə Joshuwa tə hya'atə vu Gigal ana dəhə ləvaləva nyi, dəhə ka nji inda kwa nau pah gagaɗa. 8 Ngə Tlakə tə nar nyi nə Joshuwa, <<Ngwa ka da ləvər nda wa, a nə nghə nda təya ku cha ka. A mada ndə zhang kənda da kwa nau ta'i ka pah nghə wa.>>
9 Ahir Joshuwa ka ləvaləva nyi tə ma'i vu'ivu'i hya'atə vu Gilgal, ngə nda shili ghahəya njir Amori na pah. 10 Tlakə tə gwazhiya jigadəma njir Amori nda nda la'a ləvaləva njir Isra'ila. Njir Isra'ila tə kura nda ga kuɗənda nji ɗang ku huɗa nda. Nda gədlə nda tahə laku nda kwa gi Bet Horon, ndo kuɗə nda ku laku təmatəma, tsa'a vu Azeka ana Makeda. 11 Nda ndo hwi tsa njir Isra'ila ku lakur hya'atə vu Bet Horon yi Azeka, ngə Tlakə tə pəkə nda hangu wawa'a hya'atə kya huɗamələm, nji ɗang tə kuɗə na hangu nda matsa nji inda tə kuɗə təwa katskər njir Isra'ila.
12 Pəshinda Tlakə tə gwa'atə njir Isra'ila tə kura njir Amori, ngə Joshuwa tə nar nyi nə Tlakə a tə lya njir Isra'ila.
<<Nakə pəchi, ta'i hing kya təkəra Gibiyon,
Nakə tsə'u hya, ta'i hing kya təkəra dakə Aijalon.>>
13 Ngə pəchi tə ta'i hinghəu, hya tsə'u tə ta'i, kəl nda nda wur na kisəkur təkəra njir dawa kənda. Wi nda cha tsəftsəf nyi ku likatkatə Jashar. Pəchi tə ta'i kyatə ghadar huɗamələm, ga shivi tsa cho təɗa gəɗaka hanyi zhang. 14 A chul ngəna pəchi da taa ɗa pa'a təvi pəchi na, ndara ahir ngəna pəchi wa, pəchi nda Tlakə tə səhimi da ndə wi ngə wa. Kəpal da wa, Tlakə ngə tə pah tə dəbar njir Isra'ila!
15 Ngə Joshuwa ana dəhə njir Isra'ila tə ɓəl yi Gilgal.
Joshuwa tə Kuɗənda Təl njir Amori Tufəu
16 Sakanda njo pah, ngə təl tufəu inda tə hwi ga buta nda ku vanya tləl ahi Makeda. 17 Nda nja nar nyi nə Joshuwa ənda nja uya təl tufəu inda tə mbu ku tləl vu Makeda, 18 ngə cha na, <<Dangəltə ma hangu wawa'a, hya haɗənda nya tləl ngə ni, hya fiya alenya nji ka ɓəla nya cha. 19 Kəl ja, ngwa hya da ta'i wa! Gədlə ma njir dawa kəhi, hya kuɗə nji inda biyahi, ngwa hya ngya nda nda həya mələm kənda i'i wa, aka Hyel Tlakən hi, nə hi tə kura təkəra nda.>>
20 Ana ənga, Joshuwa ana njir Isra'ila tə kuɗənda nda dəhəu, madangə alenya nji da tə mbəɗa ga gwa ku mələm inda na ɓangtili. 21 Dəhə ləvaləva inda tə ɓəla shili da Joshuwa tə mbwar tsəmdzə vu Makeda, ya ndə da na ɗufə nə dlənyar njir Isra'ila wa.
22 Ngə Joshuwa na, <<Mbəɗiya ma nya tləl nda, hya zəbiya na ɗa təl tufə inda.>> 23 Ngə nja zəbiya na təl tufəu inda hya'atə ku tləl, təl njir Urshalima, Hebron, Jarmut, Lakish and Eglon. 24 Nda nja shili na təl inda nə Joshuwa, ngə cha nga dəhə njir Isra'ila ga nar nyi nə kə'i gau ləvaləva inda shili kə'i cha, <<Anda ma, hya chinda wulya təl inə na hya hi.>> Ngə nda zəbiya ga zəbiya chinda wulya təl inda na hya nda.
25 Ngə Joshuwa tə nar nyi nə gau ləvaləva inda, <<Ngwa hya da ləvər wa, ya ngwa ɗufwa hi da tsəya dzə wa. Hya ɗa na dunama, hya ɗa gangkər. Əngə Tlakə kwa mərtə nyi nə dəhə njir dawa inda hyo pah.>> 26 Ngə Joshuwa tə kuɗənda təl inda, ga hakəya dza nda kyatə wu pampam tufəu ba'a nə akəu.
27 Nda pəchi kwa təɗa, ngə Joshuwa tə na nja fa'aya dza nda nja pəu gu tləl nda nda mbu kwa nda. Ngə nja haɗənda nya tləl nda ana hangu wawa'a, tsə'u tanda ku nda ba'a tə bəji na.
28 Pəshinda ngə tsəu, Joshuwa tə kwasə mələm Makeda ana pah. Cha kuɗənda kala ndə ku mələm nda ana katsakər. A ndə da cha ngyar mada zhang wa. Ngə cha mərtə nyi wi nda cha mərtə nyi nə təl Jariko nda nə təl Makeda.
Joshuwa tə Biyama na Pah
29 Kəl Joshuwa ana dəhə ləvaləva nyi tə ngyar Makeda ga təra gi Libna ga gi pah mələm nda. 30 Tlakə tsə'u tə nə nyi mələm nda ana təl mələm nda nə njir Isra'ila ku cha nda. Ngə Joshuwa tə kuɗənda dəhə nji inda ku mələm nda ana katsakər. A da cha ngyar mada ndə zhang hinda wa. Ətsəu Joshuwa tə mərtə nyi tang wi nda cha mərtə nyi nə təl Jariko nda anə təl Libna.
31 Ngə Joshuwa ana dəhə ləvaləva nyi tə ngyar Libna ga təra yi Lakish ga yi pah mələm nda. 32 Ngə Tlakə tə nə nyi Lakish nə njir Isra'ila ku cha nda, ngə Joshuwa tə kura tə mətləkunya pəchi. Nja kuɗənda kala sə na katsakər tang wi nda nja mərtə nyi nə mələm Libna. 33 Aku bəji nda, Horam təl Geza tə zədə ka cha vala təl Lakish, kəl ja, Joshuwa tə kura nyi kə'i ləvaləva nyi a ndə da mbəɗə mada zhang wa.
34 Kəl ngə Joshuwa kə'i ləvaləva nyi tə ngyar Lakish ga təra yi Eglon ga yi pah mələm nda. 35 Pəshinda tanyi nda kwasə mələm nda ga kuɗənda dəhə nji inda kwa, tang wi nda nda mərtə nyi nə mələm Lakish.
36 Ngə Joshuwa kə'i ləvaləva nyi tə ngyar Eglon ga təra yi Hebron ga yi pah mələm nda. 37 Nda kwasə mələm nda ga kuɗənda dəhə nji inda kwa na katsakər, dəhə ka təl kənda, ana mələm shiɗəɗəu, ana dəhə nji inda kwa. A mada ndə zhang da tə mɓəɗə wa. Tang wi nda nda mər vu Eglon, nda zhazhinda mələm nda dəhə ka nji inda kwa.
38 Kəl ngə Joshuwa kə'i ləvaləva nyi tə sha ya hi ga yi dla'a Debir. 39 Nda kura mələm nda, təl mələm nda ana mələm shiɗəɗə inda dzəri, ga kuɗənda nda na katsakər, a mada ndə zhang da tə mbəɗə wa. Nda mərtə nyi nə Debir ana təl mələm nda, tang wi nda nda mərtə nyi nə Libna ana təl nyi ba'a Hebron.
40 Ana əngə Joshuwa tə kwasə dəhə hə'i nda, dəhə ka mələm inda kya tə dəgəl, Negev, mələm inda tə sara dəgəl təwa təɗərpəchi, ana inda kya tə sara məa, ana dəhə təl kənda i'i. A mada ndə zhang da mbəɗə wa. Cha kuɗənda kala sənda kwa səpi, tang winda Tlakəu, Hyel nə njir Isra'ila tə tsau nyi bar. 41 Joshuwa tə kura nda na pah fwatə vu Kadesh Barniya kwa'a nə Gaza, ana fwatə tə mətla Goshen bətə yi Gibiyon. 42 Joshuwa tə kura dəhə təl ina ana hə'i kənda ku biya pah zhang, aka Tlakəu, Hyel nə Isra'ila tə pah tə dəbar njir Isra'ila.
43 Kəl ngə Joshuwa ana dəhə ləvaləva nyi tə ɓəl shili tə mbwar tsəmdzə kənda vu Gilgal.