Joshuwa tə Kura Təl inda Təwa Vwa
11
1 Nda Jabin təl Hazor tə ngatə sənga, ngə cha sətə nyi kurakə nə Jobab təl Madon, ana nə təl njir Shimron, ana nə təl njir Akshaf, 2 ana nə təl inda təwa vwa inda ku lya məa, avu Araba təwa holma nə Kineret, a tə sara dəgəl inda təwa təɗərpəchi, ana mətla Dor nda təwa təɗərpəchi. 3 Əts'əu cha sətə nyi kurakə nə njir Kana'ana inda təwa zədərpəchi ana təɗərpəchi, nanda ingə njir Amori, njir Hiti, njir Periz ana njir Jebusi ku mələm inda kya tə dəgəl, ana nə njir Hivi səya mar Harmon ku mətla nə Mispa. 4 Nda zəbiya ana dəhə ləvaləva kənda ɗang gagaɗa wi mishishi'ua nya dəl, ana taku i'i ana charkaina taku ɗang gagaɗa. 5 Dəhə təl ina tə daɓtəkər ga tsəmtədzə nya dlələm Merom ka nda pah njir Isra'ila.6 Ngə Tlakə tə nar nyi nə Joshuwa, <<Ngwa ka da ləvər nda wa, aka tə bəji nənnə zəkəu, yo gwa'atə njir Isra'ila kwa kuɗənda nda. Hya ɓəɓəliya hya taku kənda i'i, ba'a nginda charkaina taku kənda i'i.>>
7 Ngə Joshuwa ka dəhə ləvaləva nyi tə yi ghahəya nda na pah kwa nya dəl Merom. 8 Tlakə tə gwa'atə njir Isra'ila tə kura nda. Nda kura nda ga gədlə nda kwa'a vu Sidon Dəgal, tsa'a vu Misrefot Mayim bətə yi təwa zədərpəchi nə dakə Mispa, a ndə da tə həyadzə na pi wa. 9 Ngə Joshuwa tə mərtə nda tang wi sə nda Tlakə tə nar nyi, cha ɓəɓəliya hya taku kənda i'i ga nginda charkaina taku kənda i'i.
10 Təma Joshuwa tə ɓəl ya hi, ga yi kwasə mələm Hazor ga tsəya təl nyi ana katsakər. Aku bəji nda, təl mələm Hazor ngə dəgal ku pama təl mələm ingə dəhəu. 11 Ngə nda kuɗənda dəhə njir mələm nda ana katsakər, a səpipi da nda tə mbəɗə na pi wa, ngə cha nginda mələm Hazor nda.
12 Joshuwa tə kura dəhə mələm nji təltəl ana təl kənda ga kuɗənda nda na katsakər. Cha mərtə nda tang wi nda Musa mava Tlakə tə tsau nda bar. 13 Kəl ja, a njir Isra'ila da nginda mələm inda nja hər kyatə dəgəl mada zhang wa, kəl nda Hazor nda Joshuwa tə nginda. 14 Njir Isra'ila tə fa'aya dəhə sə mənakəu ana sərshishi mələm inga, kəl ja, nda kuɗənda dəhə njir mələm inga ana katsakər kəl nda nda kuɗənda nda papatəu, a da nda ngyar mada ndə zhang na pi wa. 15 Wi nda Tlakə tə tsaunyi bar nə mava nyi Musa, əngə tanyi tsə'u Musa tə tsaunyi bar nə Joshuwa, ya ngə Joshuwa tə mərti, a cha ngyar mər mada zhang ku sə inda Tlakə tə tsaunyi bar təkəri nə Musa wa.
16 Əngə Joshuwa tə kwasə dəhə mələm nda, mələm nda kya tə dəgəl, dəhə mətla Negev, dəhə hə'i Goshen, mələm inda tə sara dəgəl təwa təɗərpəchi, ana Araba ana mə Isra'ila ana tə sara dəgəl. 17 Fwatə kyatə Dəgəl Halak nda təwa Seyir, ba'a nə Baal Gad ku dakə Lebanon səya mar dəgəl Harmon. Cha səya dəhə təl kənda ga kuɗənda nda. 18 A hətə tə bəji 'ualəu, Joshuwa kwa pah na ka təl ka təl inga. 19 A mada mələm zhang da tə mbandər ngya mənakə na Isra'ila wa, kəl nda njir Hivi inda na ngya vu Gibiyon. Dəhə alenya mələm inda tangnda, Joshuwa tə kura nda na pah. 20 Hyel na kərnyi tə mərtə ɗufwa nda ɓaɓaləu, ka ga nda pah ka njir Isra'ila, tsa'aka njir Isra'ila kuɗənda nda dəhə a da na təhuɗə wa, tang wi nda Tlakə tə tsau nyi bar nə Musa.
21 Aku bəji nda, Joshuwa tə təra ga gi kuɗənda njir Anak, hya'atə vu Hebron, Debir ana Anab, aku dəhə mələm shiɗəɗə nə Yahuda, Joshuwa tə kuɗənda nda dəhəu, ga nginda mələm kənda i'i. 22 A ndər Anak mada zhang da tə həyadzə na pi vu Isra'ila wa, kəl nda vu Gaza, Gat ana Ashdod. 23 Ana ənga Joshuwa tə kwasə dəhə hə'i nda, wi nda Tlakə tə nar nyi nə Musa, ngə cha nə nyi nə njir Isra'ila cha ɗa ka sərfa'aki kənda wi nda nda aku nyavi kənda i'i.
Ana ənga, nji inda tə ɓəliyasar tsa pah.