Mafakə Tlakə nə Njir Isra'ila
2
1 Chama Tlakə tə hya'atə vu Gilgal a gi Bokim ga na, <<Ya həbiya hi zəbiya vu Masar ga nəu na hi gwa tə hə'i nda ya mər alkawal yo nə nyi nə jival kəhi. Ya na, <A da yo ɓəlnda mbandər ɗa nda ya mər kə'i hi wa, 2 ya a da yo mbandər ka njir hə'i nə wa, kəl ja, yo huɓənda dzəgana kənda.> Dəhə ka ənga hya ngyar nəu nya ya. Mya gwa'atə hya mər sə na? 3 Ya a na tə ya, <A da yo gədlənda nda man hi wa, ndo ɗa ka shikəɗi nə hi, ya katə kənda kwa ɗa ka ləbam nəhi.> >>4 Nda Chama Tlakə tə par nyi ɓwanya ngə nə njir Isra'ila, nji tə tiwi 'ual'ualəu ana kurakə dzəgamdzəgaməu. 5 Aka ənga nda nga mbwa nda Bokim. Tangnda nda handa təmachi nə Tlakəu.
Joshuwa tə Tah
6 Ahir Joshuwa tə wiɗənda njir Isra'ila, kala ndə tə təra kyatə mbaɗə fa'aki nə hə'i nyi. 7 Njir Isra'ila tə həsəli nə Tlakə ku dəhə ngyar Joshuwa ana njirawawa'a inda tə la'a sə inda Tlakə tə mər nə njir Isra'ila.
8 Fa Joshuwa zər Nun mava Tlakə 110, təvi cha tah. 9 Ya ngə nda haɗiya nyi tə hə'i nda cha fa'atə ki ni, a vu Timnat Heres, hə'i nda tə dəgəl nə Ifərem, təwa holma nə Ga'ash.
10 Ahir dəhə njir zamin nda tə kuɗa, Alenya nji inda pa'a kwa zəndə Tlakə ndara sə inda cha mər nə njir Isra'ila tə həa. 11 Njir Isra'ila tə mər sə ɗimi tə lya Tlakəu ga həsəli nə Ba'al. 12 Nda ngyar Tlakəu, Hyel nə jival kənda, nda tə həbiya nda zəbiya vu Masar. Nda həsəli ga nəu katə nji inda nda na ngya tə hə'i kənda. Ngə huɗa Tlakə tə tla. 13 Nda ngyar Hyel kənda, nda gwa ku həsəli nə Ba'al ana Ashtoret. 14 Aka huɗa Tlakə tə tla tsa njir Isra'ila ngə cha ngyar alenya nji tə fa'aya nda. Cha ngyar njir dawa kənda inda tə ɓandə nda tə kura nda, tə ɗa njir Isra'ila da nau dləuya kərnənda wa. 15 Kala bəji nda njir Isra'ila tə biya ka pah, kəl Tlakə kwa mər dawa na nda ba'a nja kura nda, tang wi nda cha səmnda nda fəla. Aka ənga nda gwa ku ɓwaɓwatə 'ual'ualəu.
16 Kəl ngə Tlakə tə hya'andə njir nəuma, inda tə dləuya nda ku cha njir fa'a kar kənda inda. 17 Kəl ja, a da nda səhimi da njir nəuma kənda inda wa, nda nə nyi kərnənda nə nəu katəu ga həsəli nə nda. Ɗəɗəu tanyi nda shatanda tsa nəu laku nda jival kənda tə nəuwa, lakur ɗa kəriwa nə tsaubar Tlakəu. 18 Kala bəji nda Tlakə tə fiya nda ndər nəuma, cho ngya tsa'a na ndər nəuma nda ya kəl cho dləuya nda tsa njir dawa kənda, kəda ga cha ɗa ndər nəuma nda na pi, aka Tlakə tə ngatə təhuɗə kənda ku bəji nda nda ngi'i, ku cha nji inda kwa izza nda. 19 Kəl ja, ma ndər nəuma tə tah, kəl nji kwa ɓəl yo laku ɗimi ndiyamatsa ma'a nə ka jival kənda, ndo nəu katəu ndo mər tlər ana həsəli nə nda. A da nda ngyar mər sə ɗimi ana kərangatəndərkur kənda inda wa.
20 Aka ənga, huɗa Tlakə tə tla tsa njir Isra'ila gagaɗa, ngə cha na, <<Aka nji inə ɓəlnda tə mbandər nda ea mər ka jival kənda, ga ngyar səhimi da ya, 21 a tsə'u yo gədlə mada zhang ku huɗa jul nji inda tə həyadzə man nda hir tər Joshuwa wa. 22 Yo mər tlər na nda ka ya dzə njir Isra'ila ndara ndo nəu ɗa wi nda jival kənda tə nəu ɗa.>> 23 Tlakə tə ngyar jul nji inda nda tə ngya ku hə'i nda, a da cha gədləbiya nda ku bəji zhang wa, ya a da cha ngyar Joshuwa tə kura nda wa.