3
1 Ja'inə dzuku nji inda Tlakə tə ngyar ka ga cha dzə njir Isra'ila inda pa'a tə la'a pah inda nja pah vu Kan'ana. 2 Cha mər ənga ga cha dlədləɓətə nyi pah nə nyandəla njir Isra'ila inda pa'a tə la'a pah inda tərabiya. 3 Ja'inə dzuku nji inda həyadza, ka təl ka təl tufu nə njir Filisti, dəhə njir Kan'ana, njir Sidon, ana njir Hivi inda na ngya kya tə dəgəl Lebanon fwatə tə dəgəl Ba'al Harmon tsa'a tə lakur gwa Lebo Hamat. 4 Nja ngya nda ka nja dzə njir Isra'ila, nja la'a ndara ndo ɗa kəriwa nə tsaubar Tlakə nda cha nə nyi nə ka jival kənda təwa Musa.5 Njir Isra'ila tə ngya ku pama njir Kan'ana, Hitti, Amori, Perizi, Hivi ana njir Jebusi. 6 Nda həbiya ku'imahi'i kənda ka mala kənda, ga ɗəunda nyi ku'imahi'i kənda nə nguli shili kənda, ga həsəli nə katə kənda i'i.
Hyel tə Dləuya Njir Isra'ila təwa Cha Otniyel
7 Njir Isra'ila tə mər səɗimi tə lya Hyel Tlakən nda ga həsəli nə Ba'al ana Ashtoret. 8 Ngə huɗa Tlakə tə tla tsa njir Isra'ila ngə cha ngyar Kushaan-Rishatayim təl Aram tə kura nda, nda kura nda ga səm təlkur təkəra nda fa chisəu. 9 Kəl ja, nda nda tiwi nə Tlakəu, cha nə nda Otniyel zər Kenaz ndə nda kushə matsa Kalip ka ga cha dləuya nda. 10 Shanguɗə Tlakə tə səya təkəra Otniyel, ngə cha ɗa ka ndər nəuma kənda ga nəu na ləvaləva kyo pah ka Kushan Rishatayim təl Aram ga kura nda. 11 Ahir ənga, kəl ngə piyarɗufə tə ɗa tə hə'i nda nə fa fwaɗəkumnyi, ba'a nə bəji nda Otniyel zər Kenaz tə tah.
Hyel tə Dləuya Njir Isra'ila təwa Cha Ehud
12 Njir Isra'ila tə ɓəla mər sə ɗimi tə lya Tlakə səkəu, ya aka nda mər ngəna sə ɗimi Tlakə tə nə nyi gyalkur nə Eglon təl Mowab təkəra njir Isra'ila. 13 Eglon tə nga njir Amon ana njir Amalek nda ɗaɓtə ləvaləva ga pah njir Isra'ila, ngə nda dləuya mələm Jariko nda njo nga, <<Mələm debino.>> 14 Təl Eglon tə səm təlkur fa kwabəchisəu təkəra njir Isra'ila.
15 Ngə njir Isra'ila tə ɓəla tiwi nə tlakəu, ngə cha nə nda Ehud ndər matsal, zər Gera nyandəla Banyami. Njir Isra'ila tə lətə nyi ga'a nə Eglon təl Mowab təwa Ehud. 16 Ngə Ehud tə ɓatlətə katsakər nda na hira cha mətləu, dzəgamkuracha kwa ɗa hi mətlə na manyi. Ngə cha mbatə tə ea cha nə chisəm, ga pakəngər ləkutə nyi. 17 Ngə cha nə nyi ga'a nda nə Eglon təl Mowab ndəndə nyi na dzə gagaɗa. 18 Ahir Ehud tə nə nyi ga'a inda, ngə cha səu nji nda hə ga'a nda shili ku laku. 19 Kəl ja, manda nda shili dza hangu inda nja dzəɗəbiya ləhə dza Gilgal, ngə cha ɓəl yada Eglon ga nar nyi, <<Aləvari, mafakə da nda yo i ya nə nghə mətlə ta ma.>>
Ngə Təl tə nar nyi nə mavi'i nyi nda təra biya, ngə nda təra.
20 Ngə Ehud tə yada cha nda cha tə ngya zhang tanyi kyo vi nda kyatə kəra vanyi tə patla nyi ga na, <<Mafakə da tsa ya hya'atə tsa Hyel a nə ngha.>> Nda təl kwa hya'atə tə mbwar ngya nyi, 21 kəl Ehud tə ha matsala cha ga tsəbiya katskər nda cha mbatə tə ea cha nə chisəm nda ga təsəu nyi ku ta təl. 22 Katsakər nda tə təra gu ta cha dəhə ka hwihwi nyi, mal tə sanda ɓitir katsakər nda ya a cha təsə katsakər nda ku ta təl wa. 23 Kəl Ehud tə biya dla'abiya nyavi inda kya tə kəra vanyi inda ga haɗiya dəhəu.
24 Ahir cha təra, mavi'i Eglon tə shili ga la'a nyavi inda tə haɗa, ngə nda har bəra nda təl kwa nji kunyi. 25 Nda səkə ga həɗa, kəl ja, manda a təl da mbəɗiya nyavi inda wa, ngə nda hətə sər mbəɗə nyavi ga mbəɗiya. Tangnda nda la'a təl kənda tə piya tə huɗəvi, tətənyi.
26 Nda ngya səka ya Ehud hwitanyi ti, cha nəu təwa lya hangu dzəɗədzəɗə inda ga hwitanyi yi Seyira. 27 Manda cha yi nda ngə cha mbəɗiya papam bəzə mafakə ki dla'a kyatə dəgəl hə'i Ifərem, ngə njir Isra'ila tə təra səya kə'i cha hya'atə kyatə dəgəl nda, Ehud kwa nəuna nda.
28 Cha nar nda, <<Nəu ɗa ma, Tlakə nəmən tə Mowab njir dawa kəhi ku cha mən.>> Ngə nda nəu nyi səya, nda dləuya mbwa inda njir Mowab kwa nəuwa ka nda dləgəlbiya dəl Urdən. A nda ngyar madawa tə dləgəlbiya dəl nda wa. 29 Aku bəji nga nda kuɗənda njir Mowab 10,000, dəhə njir dunama ana njir nau pah a ndə da mbəɗə mada zhang wa. 30 Pəshinda, njir Isra'ila tə kura njir Mowab. Ya ngə nda uya piyarɗufə nə fa chisəkumnyi.
Shamgar tə Ɗa ka Təl Njir Isra'ila
31 Ahir Ehud kəl Shamgar zər Anat tə ɗa ka ndər nəu na nda, cha dləuya njir Isra'ila ga kuɗənda njir Filisti 600 ana wuɗa pal tla nya zwa.