Rut 1

Rut

Na'omi ana Rut

1 Aku bəji nda njir nəuma kwa mər təlkur, kəl huɓə tə tlə tə hə'i nda, kəl vanya ndər Baitalami ku Yahuda, nanda na mala nyi ana nguli shili nyi tsa'a mətləu, tə təra yi Mowab ka nda ngya nə bəji kushiu. 2 Tləmər ndə nda Elimelek, tləmər mala nyi Na'omi, tləmər nguli shili nyi inda tsə'u Mahlon ana Kiliyon. Nada njir Efrata nda hya'atə vu Baitalami ku Yahuda. Ngə nda təra yi Mowab ga yi ngya hinda.

3 Ngə Elimelek, sal Na'omi tə tah, ga ngya nyi na nguli shili mətlə inda. 4 Ngə nda həbiya ku'imahi'i Mowab ka mahi'i kənda, tləmər zhang Orpa tləmər vanyi tsə'u Rut. Ngə nda ngya hinda kwa ɗa fa kuma, 5 ngə Mahlon ana Kiliyon tsə'u tə kuɗa, ga ngyar Na'omi a nguli shili mətlə inda wa, ya a sal wa.

6 Nda Na'omi tə ngatə ənda Tlakə shili tə da nji nyi ga nə nda sərsuma, ngə Na'omi kə'i sələkə nyi tə ɓatliya ka ɓəl yi Baitalami. 7 Dəhə nda ka sələkə nyi inda tə ngyar mbwa nda ndo ngya tə nda ga go lakur ɓəl shili tə hə'i Yahuda.

8 Ngə Na'omi tə nar nyi nə sələkə nyi inda, <<Ɓəl ma kyo ki hya ki ngya kə'i aman hi. Ga Tlakə char hi mənakəkur, wi nda hya char nyi nə shili kəhi ana a na'a. 9 Ga Tlakə mərtə ənda kala ndə ku pama hi kwa uya ɓəlsar ku ki vanya sal.>>

Ngə Na'omi tə gapətə nda, ngə nda tiwi gagaɗa 10 ga nar nyi, <<Eo ɓəl kə'ika, a ya kə nji kəhi.>>

11 Kəl ja, Na'omi tə na, <<Ɓəlta hi ma kyo ki ku'i ɗa. Mya gwa'atə hyo gwa'a kəl hya ma'i tsa'a na ya? Yo nda ɓəla ki yah nguli shili inda kwa ɗa ka shili kəhi səkə ya? 12 Ɓəl ma kyo ki, ku'i ɗa, a hal tə ya tsa yo ɓəla ɗəu səkəu. Mada yo fəkər ka ya ɓəla ɗəuwa, mada əvu'i nə ya ɗəu ga yah nguli shili mətlə ma'a ya, 13 kwa nau hya səkətə ndo hə ya? Hyo ngyata hi tsa ɗəu ka nda ya? A da ku'i ɗa wa. Huɗətla ɗa ndiya tə nə kəhi, aka Tlakə nə tə fəkə ɗa ɓwaɓwatə na!>>

14 Nda ɓəla tiwi səkəu. Kəl ngə Orpa tə gapətə sələkə nyi ga nar nyi kəl vanya pəchi, kəlnda Rut nənyi a da cha ngya nyi wa.

15 Ngə Na'omi tə na, <<Ndzama, maɗə wadlə nghə kwa ɓəl kya da nji kənda ana hyel nyi. Ɓəl hya təra.>>

16 Kəl ja, Rut tə wuma, <<Ngwa ka gədi ɗa ya ngya nghə ndara ya ɓəl hi nghə wa. Ba nda ka ma'i ti, yo ma'i, ya mbwa nda ka ngya ti, yo ngya. Nji nghə kwa ɗa ka nji ɗa, Hyel nghə tsə'u kwa ɗa ka Hyel ɗa. 17 Tangnda ko tə ti, tangnda yo tah, ya tangnda njo haɗiya ɗa. Ga Tlakə na'a ɓwaɓwatə 'ual'ualəu, ma ya ngyar vanya sə cha təkəbiya ma naka, matsa tah.>> 18 Manda Na'omi tə ngabiya ənda Rut hətə tə ku ɗufwa cha kəl cha ma'i tsa'a na cha, ngə cha ngyar gədi nyi.

19 Kəl ngə kya'akura nda tə gəziya laku kəl nda nda dzəva Baitalami, kəl dəhə njir mələm nda tə mər hirgyaɗi na la'a nda, ngə mahi'i mələm nda tə na, <<Na'omi nə nganə ya?>>

20 Ngə cha nar nda, <<Ngwa hya nga ɗa Na'omi wa, nga ɗa ma Mara, aka Ndər Gyalkur mərtə tə ngya ɗa tə ɗa ɗəwatəu. 21 Ma ya təra tangna sə tsa ya, kəl ja, Tlakə tə ɓəl na ya shili twatwachi. Tlakə tə na'a ɓwaɓwatə ga shili na təmachi təkəra ya, mya gwa'atə hyo nga ɗa Na'omya?>>

22 Əngə Na'omi tə ɓəl shili hya'atə vu Mowab nanda na sələkə nyi Rut kwar mələm Mowab, nda shili vu Baitalami tsa'atsa'a na bəjir mər uhi nda njo nga bale.