SAMA'ILA
Yar Sama'ila
1
1 Vanya ndə da hya'atə ku nyavi njir Ifərem ana tləm nyi Elkana zər Jeroham, zər Elihu zər Tohu zər Zuf ndər Ifərem. 2 Mahi'i Elkana mətləu, zhang tləm nyi Hanatu vanyi tləm nyi Penina. Ngulisha'a da tsa Penina, kəl nda Hanatu a ngulisha'a da tsa cha wa.3 Kala fa Elkana kwa maka hya'atə ku mələm kənda kwa təra yi Shilo ka hatəmachi nə Tlakə Ndər Gyalkur, tangnda nguli shili Eli ka Hofni ana Finehas ngə pərist i'i nə Tlakəu. 4 Kala bəji nda Elkana kwa hatəmachi, kəl cho həbiya nyi mbaɗə ku kum nda nə mala nyi Penina ana dəhə nguli shili nyi ka ku'i nyi. 5 Kəl ja, cho nə nyi mbaɗə ku kum nda zhaka mətləu nə Hanatu aka cho i nyi, ya a Tlakə da nə nyi yah wa. 6 Kəl maɗə nyi kwa maka dlinya nyi ga huɗa cha tla, aka a Tlakə da nə nyi yah wa. 7 Əngə tanyi sə nda kwa ɗa kala fa. Kala bəji nda Hanatu tə gyo ki Tlakəu, maɗə nyi kwa dlinya nyi, kəl Hanatu kwa tiwi, ya a da cho i səm sə wa. 8 Salnya Hanatu Elkana tə nar nyi, <<Hanatu mi ko tiwa? Mya gawa'atə a ko səm sərsum wa? Mya gwa'atə huɗa kə tlatlanyi wa'atanya? A ya ndiya nguli shili kumə nə nghə ma?>>
9 Vanya pəchi ahir wurandə tə nda səma ana sa vu Shilo, ngə Hanatu tə hya'ati. Ku bəji nda tsəu, Eli pərist tə ngya tə hwakəu a nya nyavi mbwa'alə Tlakəu. 10 Aku huɗatla Hanatu tə tiwi 'ual'ualəu ga pətlənya nə Tlakəu. 11 Cha səməfəla ga na, <<Yawa Tlakəu, Ndər Gyalkur Dəhəu, ma ka ndzamar mava nghə ku ɓwaɓwatə nyi ga ɗənghatə ɗa, a da ka far mava nghə wa, kəl ja, ka nə nyi zər sal, yo nə nyi nə Tlakə ka cha mər tlər nənyi tsa'a tə ɓəlkər pya cha, ya a pyaɗakə do tsəkar kəra cha wa.>>
12 Nda cha biyama na pətlənya nə Tlakəu, Eli kwa ndzam ənda nya cha kwa mbəɗa. 13 Hanatu kwa pətlənya ku ɗufwa cha, nya cha kwa mbəɗa, kəlnda a da njo ngatə kuraka cha wa. Eli tə har ənda wi nda cha wi 14 ngə cha nar nyi, <<Kəl sakamanə ko ngyar wi na badla? Təkəbiyadzə na sa ɓitir anapəu.>>
15 Ngə Hantu tə wuma, <<Kəma maləməu, A da ya wi na badlə ndara ɓitir anap wa, a da yo sa badlə wa, naya mala nda ku huɗatla 'ual'ual na, ya sə nda ku ɗufwa ya nə ya dəkəbiya nə Tlakəu. 16 Ngwa ka har ənda mala shi'ushi'u ya wa, yo pətlənya təkəra ɓwaɓwatə ɗimiɗimi ana huɗatla ɗa na.>>
17 Ngə Eli tə wuma, <<Ma'i ku piyarɗufu, ga Hyel njir Isra'ila cha nə nghə sə nda ka gədi tsa cha.>>
18 Ngə cha na, <<Ga mava ngha uya kwambiyakur tə lya ka.>> Ngə cha təra ga ki səm sərsuma, ya huɗəma cha da zhaka ɗa ndalndal nyi wa.
19 Kaɗə mbudla vanya zəkəu nda hya'atə ga hətə nyi səli nə Tlakə ga ɓəl yo ki kənda vu Rama. Ngə Elkana tə piya na mala nyi Hanatu, ya ngə Tlakə tə ɗənghatə na cha. 20 Ngə Hanatu tə hətə huɗə ga yiyah zər sal. Cha fəndzə nyi tləm Sama'ila, cha na, <<Aka ya gədi nyi tsa Tlakəu.>>
Hanatu tə Nə Nyi Sama'ila nə Tlakəu
21 Nda Elkana ana dəhə njir ki nyi tə təra gi hatəmachi ka fa ka fa nə Tlakə ana ga cha nyabiya alkawal nyi, 22 kəl ja, Hanatu da ma'i wa. Cha nar nyi nə sal nyi, <<Ahir ya katə nyi 'ua nə zər na, yo hətə nyi yo gi nə nyi nə Tlakəu, ka cha ngya hinda wa'atanyi.>>
23 Ngə sal nyi Elkana tə na, <<Mər sə nda mənakə nə ngha, ngya tangna səkətə kəl ka katə nyi 'ua, kəl ga Tlakə nyabiya ɓwanya nyi.>> Kəl ngə mala nda tə ngya ku ki ga handə zər nyi kəl nda cha katə nyi 'ua.
24 Ahir cha katə nyi 'ua, ngə cha hətə zər nda, ga hətə gyal tla fa makərəu, ana upə tasau zhang, ana salkam zhang na ɓitir anapəu, ga shili na cha ku ki Tlakə vu Shilo. 25 Nda nda tlakənyi wulya nə gyal tla nda, ngə nda shili na zər nda nə Eli, 26 ngə cha nar nyi, <<Maləm, tsə'u tanyi ko ɗənghatə ɗaa? Naya nda mala nda tə ta'i tangnə kwa pətlənya nə Tlakə nda. 27 Ya gədi zər nə tsa cha, ya ngə Tlakə tə na'a sə nda ya gədi nyi. 28 Aka ənga sakana, yo nə nyi nə Tlakə ku dəhə ngya nyi. Cha ɗa ka nə Tlakəu.>> A hi nda cha hətə nyi səli nə Tlakəu.