SAMA'ILA
Dauda tə Ngatə Tər Saul
1
1 Ahir tər Saul, Dauda tə ɓəl shili hya'atə tə mbwar kura njir Amalek ga hanyi mətlə vu Ziklag. 2 Pəshir hanyi makərkunyi kəl janə vanya ndə tə shili hya'atə ku mbwar tsəmdzə ləvaləva Saul, ana ləkutə nyi tatanyi ana bərbər ku kəra cha. Nda cha shili dza Dauda ngə cha uzhi ga hətə nyi səli.3 Ngə Dauda tə jau nyi, <<Hya'atə manə ka?>>
Ngə cha wuma, <<Ya hwibiya hya'atə ku mbwar tsəmdzə njir Isra'ila na.>>
4 Ngə Dauda tə jau nyi, <<Mya ɗa? Par ɗa.>>
Ngə cha na, <<Nji tə hwibiya tə mbwar pah, nja kuɗənda nji ɗanghəu, ya ma'a Saul ana zər nyi Jonatan kuɗə ti.>>
5 Ngə Dauda tə nar nyi nə tlakala nda tə shili na mafakə nda, <<Aman ka ɗana zəndə ənda Saul ana zər nyi Jonatan kuɗə ta?>>
6 Ngə tlakala nda wum ga na, <<Tə ya kyatə Dəgəl Gilbowa, ya la'a Saul tə dəhətə kərnyi na masə nyi, ana charkaina taku ka njir dlə taku kwa shili kəra cha. 7 Nda cha sha ga la'a ɗa, ngə cha nga ɗa. Naya tsə'u ya na, <Mi ko i ya məra?>
8 <<Ngə cha jau ɗa, <Nakə wa ka?>
<<Ngə ya nar nyi, <Naya ndər Amalek na.>
9 <<Kəl ngə cha nar ɗa, <Anda ka tsəya ɗa, aka ku pama pi na tə nə ya, ya pya ya da taa biya wa.>
10 <<Kəl ngə ya yi tsəya nyi, aka a zəndə tə ya wi nda cha dla nda a tsə'u cho mbə wa. Ngə ya mbəɗəbiya pahuɗə kər nda ku kəra cha nda ana gyarakən nda tə patləka cha nda ga shili nə tangnə nə tlakə ɗa.>>
11 Kəl ngə Dauda ana dəhə nji nyi tə tətanda ləkutə dzən nda. 12 Ngə nda sə'ingu ga səmdzən ba'a akəu, aka Saul ana zər nyi Jonatan, ana aka ləvaləva Tlakəu ana ki Isra'ila, aka nja kuɗənda nda ku pah.
13 Ngə Dauda tə nar nyi nə tlakala nda tə shili na mafakə nda, <<Hya'atə man ka?>>
Ngə cha wuma, <<Naya zər ndə shilishili ya, ndər Amalek.>>
14 Ngə Dauda tə jau nyi, <<Mya gwa'atə a da ka ləvər fəndzə nyi chi ga tsəya ndə nda Tlakə tə dzəviya wa?>>
15 Kəl ngə Dauda tə nga zhang ku huɗa nji nyi ga nar nyi, <<Ma'i, ka yi tsəya nyi!>> Ngə cha gəga ndər Amalek nda, ngə cha tah. 16 Aka Dauda wurta nar nyi nə ndər Amalek nda, <<Bikər pənda mashi nghə cha ɗa təkəra ka. Nya kə nə tə na ənda, <Naya ngə tə tsəya ndə nda Tlakə dzəviya.> >>
Dauda tə Sə'ingu Saul ana Jonatan
17 Kəl ngə Dauda tə tiwi məsazau sə'ingu Saul ana zər nyi Jonatan, 18 ga na nja dlədləɓətə nyi miya məsazau na nə njir Yahuda. (Tsəftsəfənyi cha ku likatəkatə nə Jashar.)
19 <<Isra'ila, a tsəya tə njir səli nghə kya tə dəgəl ngha.
Ləvaləva kwalkwal nghə kuɗəti!
20 <<Ngwa nja dəkə vu Gat wa,
ngwa nja bəzə ku laku Ashelon wa,
tsa mahi'i njir Filisti da mər hirgyaɗi,
tsa ku'imahi'i nji kəla tlatla bədzang da mər hirgyaɗi.
21 <<Ətsəu, ngwa par ndara kuchikəpa da ɗa kyatə dəgəl i'i nə Gilbowa wa,
ya ngwa fa nyi i'i da mər sakəda wa,
aka kinda ngə ləgə nji kwalkwal tə ɗa ka sər həyati.
A tsə'u njo tsakətə ɓəsə mal nə ləgə Saul tsə'u wa.
22 Laga Jonatan da kwa tyatənda sə wa,
katsakər Saul tsə'u da kwa ngatə təhuɗə wa,
kwa tsa njir gyalkur,
ya kwa tsa njir dawa.
23 <<Ka Saul na Jonatan tə nyidatə kərnənda aku pi ana tah, a ndiya tə nda dəukəu na kusa, ya a ndiya tə nda ləvari na dunama.
24 <<Nahi tsə'u ku'i Isra'ila, tiwi ma ka Saul, ndə nda tə handzə hi kari dəzə gumaguma, ga ɓatlətə hi ɓatlə tə ləkutə kəhi na kata bəjingha.
25 <<Nji kwalkwal tə dla nya pah! Janə Jonatan bəraɓə tətə nyi kya tə dəgəl. 26 Ya mər huɗatla gagaɗə ka kə zamə ɗa Joanatan, yo nyida nghə gagaɗa. Nyida nghə na'a sər məngəl cha, a ndiya tə nyidar mala.
27 <<Nji kwakwal dla ti! balmi pah səwa ti.>>