Saul tə Tsəya Kərnyi
31
1 Njir Filisti tə pah ka njir Isra'ila, njir Isra'ila tə hwi tsa njir Filisti, nja tsəya nji ɗang kya tə Dəgəl Gilbowa. 2 Njir Filisti tə ɓandə Saul ka nguli shili nyi, nda kuɗənda nguli shili nyi Jonatan, Abinadab ana Malkishuwa. 3 Pah nda tə ɗa dza'u nə Saul, tə ɗa njir dawa tə həya nyi na hafə i'i, ga takasiya nyi 'ual'ualəu. 4 Ngə Saul tə nar nyi nə ndər hə kar pah nyi, <<Tsəbiya katsakər nghə ka tsəya ɗa ni, ma'a əngə wa nji kəla tlatla bədzang inə kwa shili tsəya ɗa, ba'a gyaɗənda ɗa.>> Kəl ja, ndər hə kar pah nyi nda kwa ləvəra, a da cho nau mər ənda wa, aka ənga Saul tə tsəbiya katsakər nyi ga dla səya kəri. 5 Nda ndər hə kar pah nyi nda la'a tə tə cha, nacha ma'a cha dla səya kəra katsakər nyi ga tə wi nə Saul nda. 6 Təwa ənga Saul ana nguli shili nyi makərəu ana ndər hə kar pah nyi ana dəhə nji nyi tə kuɗə pəchi zhang. 7 Nda njir Isra'ila inda ku dakəu ana inda biyatiya Urdən təwa bana ana inda banada tə la'a ənda ləvaləva njir Isra'ila hwi ta nda ti, ya Saul ka nguli shili nyi kuɗəti, ngə nda ngyar mələm kənda ga hwi ta nda. Ngə njir Filisti tsə'u tə shili ngya ta nda tangnda. 8 Vanya zəkə nda njir Filisti tə shili ka fa'aya kar nji kuɗəkuɗa, ngə nda həya Saul ana nguli shili nyi makər kuɗəkuɗə nyi a kyatə Dəgəl Gilbowa. 9 Ngə nda tlanda kəra cha ga fa'atə kar pah nyi, ngə nda sə changhabal ku dəhə hə'i njir Filisti, ka nda ki bəziya mafakə ngə ku vi katə kənda i'i ana nə njikə nda. 10 Ngə nda piya kar pah Saul nda ku vi katə nə Ashtoret, ga mbiya gundəbər dza cha tə ɓangtili nə Bet Shan. 11 Nda njir Jabesh Giliyad tə ngatə sə nda njir Filisti tə mərtə nyi nə Saul, 12 dəhə nji kwalkwal tə hya'atə ga ma'i həmhanyi a yi Bet Shan. Nda fa'aya gundəbər dza Saul ana nə nguli shili nyi inda kya tə ɓangtili Bet Shan nda ga təra yi Jabesh, tangnda nda yi nginda. 13 Ngə nda fa'atə ɗihi kənda ga haɗiya da kiɗa wur mbəla a vu Jabesh, ngə nda səmdzən hanyi məɗəfa.