Dauda tə Kuɗənda Njir Amalek
30
1 Dauda kə'i nji nyi tə dzəva Ziklag pəshir hanyi makərkunyi. Njir Amalek shili tə ga panda njir Negev ana njir Ziklag. Nda pah Ziklag ga nginda mələm nda, 2 ga fa'atə mahi'i ka dəhə nji inda ku mələm nda ka mavi'i, ngulisha'a ka njirawawa'a. A da nda tsəya madawa wa, kəl ja nda fa'atə nda ga təra na nda. 3 Nda Dauda kə'i nji nyi tə dzəva Ziklag, ngə nda la'a a nginda tə nji mələm ga fa'atə nguli shili ka ku'imahi'i kənda ka mavi'i. 4 Ngə Dauda kə'i nji nyi tə tiwi 'ual'ualəu, tə nda ɗa tsə'u dunamar tiwi da tsa nda wa. 5 Nja səya mahi'i Dauda inda mətlə inda, Ahinoam kwa Jezrel ana Abigel mala Nabal ndər Karmel ɗakaɗa. 6 Dauda tə go ɗəngha gagaɗa, aka nji nyi kwa pə nyar vəvakənda nyi na hangu, aka huɗa dəhə nji tla tə təkəra nguli shili kənda ka ku'imahi'i kənda inda nja fa'atə inda. Kəl ja, Dauda tə uya dunama tsa Tlakəu, Hyel nyi. 7 Ngə Dauda tə nar nyi nə Abiyatar pərist, zər Ahimelek, <<Anda na ɗa efod.>> Ngə Abiyatar tə shili na nyi, 8 ngə Dauda tə jau Tlakəu, <<Ya gədlə njir shili na pah nə ya? Kwa həya nda ya ja?>> Ngə Tlakə tə wuma, <<Gədlə nda, kəpal da wa ko həya nda, ya ko dləuya sə inda nda fa'aya.>> 9 Kəl ngə Dauda kə'i nji nyi 600 tə hya'atə ga dləutsə laku, nda ya nya dəl Besor, tangnda nda ngyar alenya nji, 10 aka nji 200 həɗatə gagaɗə tsa dləgəlbiya dəl nda. Kəl ja Dauda kə'i nji 400 tə biyama na gədlə nji inda. 11 Ngə nda həya vanya ndər Masar ku fa, ngə nda shili na cha nə Dauda. Nda nə nyi ɓiti cha sa, ga nə nyi sərsum cha səma. 12 Nda nə nyi kaɓəkaɓər yayar kanda ana kaɓəkaɓər yayar anap tsəu. Ngə cha səma ga zhivəra, aka ɓupəchi makər na hanyi makərəu, a da cha səm sərsum ndara cha sa ɓiti wa. 13 Ngə Dauda tə jau nyi, <<Wa tlakər ki ngha? Hya'atə manə ka?>> Ngə cha na, <<Ndər Masar ya, mava njir Amalek. Nda shiləkə tə səya ɗa, hanyi makər nga tərabiya nga, ngə Tlakə ɗa tə ngya ɗa. 14 Ea ki panda njir Keret təwa Negev ana hə'i nda nə njir Yahuda ana hə'i nda nə nyavi Kaleb təwa Negev. Ngə ea nginda Ziklag.>> 15 Ngə Dauda tə jau nyi, <<Kwa nau ka ma'i na ya səya da njir pah nji ingə ya?>> Ngə cha nar nyi, <<Səmnda ɗa fəla mar Hyel ənda, a da ko tsəya ɗa ndara ka ɓəlandə ɗa yada tlakər ki ɗa wa, naya tsə'u yo ma'i na kə səya dzən nda.>> 16 Ngə cha nəu na cha səya, kəl janə nda wazaɓai mada amanə ku mələm nda, ndo səm ndo sa ndo utsa aka 'ualkura kwazhalɓi inda nda fa'aya ku hə'i njir Filisti ana Yahuda. 17 Ngə Dauda tə ghəya na kuɗə nda fwatə akəu tsa'a ba akə vanya zəkəu, a mada ndə zhang da mbəɗə wa, kəl nguli tlakala 400 inda tə hwita nda na dləgwam inda. 18 Dauda tə dləuya dəhə sə inda njir Amalek tə fa'aya inda, dəhə ka mahi'i nyi inda mətlə inda. 19 A sə da sa wa, kushi nyi ndara dəgal nyi zərsal ndara kwamalakəu, ndara kwazhalɓi ana dəhə sə inda nja fa'aya. Dauda tə ɓəlandə nda shili səkəu. 20 Cha dləuya kətəng i'i ka kua, ka tla, ngə nji nyi tə paltə ga təra biyamar alenya sərshishi inda, nda na <<Nənna, kwazhalɓi Dauda na.>> 21 Ngə Dauda tə ɓəl shili da nji 200 inda həɗa tsa nəu nyi biyatiya dəl nda. Ngə nda biya ka nda ɓə kə'i Dauda ana nji inda kə'i cha. Nda Dauda tə shili dzən nda ngə cha usa nda. 22 Kəl ja, dəhə nji ɗimi ka njir tabwal inda ku huɗə nji inda Dauda tə ma'i kə'iri inda tə na, <<A da məno təkə kwazhalɓi ingə məna fa'aya kə'i nda wa, aka a da nda ma'i ka mən wa. Kəl ja, kala ndə cha hətə mala nyi ana nguli nyi cha təra.>> 23 Ngə Dauda tə wuma, <<Ka zamə ɗa a da əngə wa, əngwa hya mər sə wi ngə na sə inda Tlakə tə nəmən wa. A ɓəlatə mən tə cha, ga nəmən kura təkəra ləvaləva inda fa'aya mən. 24 Wa kwa səhimi da hi təkəra ɓwanya nga? Ndə nda ma'i ki dla'a ana ndə nda ngya dza kari, wazəba kənda kwa ɗa məlmələu.>> 25 Dauda tə fiya ənga ka tsaubar ana gadladla, ya ba'aka ənya əngə njo mər tlər nə vu Isra'ila. 26 Nda Dauda tə dzəva vu Ziklag, cha gwa'arə kwazhalɓi nda ga lətə nyi nə njirawaw'a Yahuda inda bazhi nyi, cha na, <<Janə ma ga'a ku huɗa kwazhalɓi nda ea fa'aya tsa njir dawa Tlakəu.>> 27 Cha lətə nyi nə nji inda vu Betel, Ramot, Negev ana Jatir, 28 ana nə nji inda vu Arower Sifmot, Eshtemowa, 29 ana Rakal, ana nə nji inda ku mələm 'i'i nə njir Jeramel ana njir Kan'ana, 30 ana nə nji inda vu Horma, Bor Ashan, Atak, 31 ana Hebron, ana nə nji inda ku dəhə alenya mbwa tangnda Dauda ka nji nyi tə zhulti.