Akish tə Ɓəlandə Dauda Yi Ziklag
29
1 Njir Filisti tə tsəmtə dəhə ləvaləva kənda vu Afek, njir Isra'ila tsə'u tə tsəmtədzə nya dlələm nda vu Jezrel. 2 Ma njirawawa'a njir Filisti kwa tərabiya na ləvaləva kənda gharu gharu ka dəbu dəbu ku kala dzuku, Dauda tsə'u kə'i nji nyi kwa nəu hin nda na nda kə'i Akish. 3 Ngə kə'i gau ləvalava njir Filisti tə jawa, <<Mi njir Ibrani inə kwa mər tangna?>>Ngə Akish tə nar nyi nə kə'i gau ləvaləva njir Filisti inda bəra, <<Dauda nga, mava Saul təl njir Isra'ila, a səkar tə cha dzə na ya. Fwatə ku bəji nda cha shili da ya, a da ya taa uya nyi na bikə pa'a wa.>>
4 Kəl ja, huɗa ləvaləva njir Filisti tə tla na cha, ngə nda na, <<Ɓəlandə ndə nə kya tə mbwa nda ka fiya nyi ti. A da cho wuriya ma'i kə'i ea kyo pah wa, cho nau shakə mən ku bəjir pah. Cho nau mər tlər na laku nə ka nə nyi nə cho tlanda kəra mən ga cha mərtə ɗufwa tlakər ki nyi twasəu. 5 A da Dauda nə nda ndo na miya təkəra cha ndo utsə ndo na <Saul tə kuɗənda dəbu dəbu, Dauda tsə'u tə kuɗənda dəbu dəbu zhaka kumə ma>?>> 6 Ngə Akish tə nga Dauda, ga nar nyi, <<A səmda tə ya fəla na tləmər Tlakəu, naka ndər jiri ka, tsa'atsa'a tanyi ka ma'i kyo pah nə tsa'a na ya, aka fwatə tə pəchi nda ka shili da ya ba'aka ənya, a ya taa uya nghə na bikə pa'a wa, dəhə ka ənga, a njirawawa'a inə da dləukər nakə wa. 7 Aka ənga, ɓəlta ngha, ka həya ki ku piyarɗufəu, ngwa ka da mər sə ndo tləya huɗa njirawawa'a njir Filisti wa.>> 8 Ngə Dauda tə nar nyi nə Akish, <<Mi ya məra? Mi bikə nda ka uya tsa mava nghə fwatə tə pəchi nda ya shili da kə nda tsa'a tə pəchi nə ənya na? Mya gwa'atə a da yo ki pah njir dawa tlakə ɗa təl wa?>> 9 Ngə Akish tə wuma, <<A ku la'a ɗa ndə kəla bikə ka wi chama Hyel, dəhə ka ənga, kə'i gau ləvaləva tə na, <A da cho ma'i kə'i ea kyo pah wa.> 10 Ka hya'atə kaɗə mbudla nahi ka mavi'i tlakə nghə inga shili da kə inga, ma vu'i kwa wura hya gu laku.>> 11 Kəl ngə Dauda kə'i nji nyi tə hya'atə kaɗə mbudla ka nda ɓəl ya tə hə'i njir Filisti, njir Filisti tsə'u tə təra yi Jezrel.