28
1 Aku hanyi inda njir Filisti tə tsəmtə ləvaləva kənda ka nda pah njir Isra'ila. Ngə Akish tə nar nyi nə Dauda, <<Ka zəndə ənda nahi kə'i nji ngha, hyo ma'i tsa'a na ea kə'i ləvaləva ɗa ki pah na.>>2 Ngə Dauda tə na, <<Ko la'a sə nda mava nghə kwa mər tsəu.>>
Ngə Akish tə wuma, <<A ɗa tə mənakəu, yo fiya nghə ka ndər ɓəla kəra ya ba'anawa.>>
Saul ana Ndər Tsakəza
3 Sama'ila wurtə tah, dəhə njir Isra'ila tə sə'ingu nyi ga haɗiya nyi ku mələm nyi a vu Rama. Saul tsə'u gədlənda tə njir tsakəza kə'i mutiya ku mələm nda.
4 Njir Filisti tə daɓə ga tsəmtədzə vu Shunem, ngə Saul tsəu, tə tsəmtə dəhə njir Isra'ila a vu Gilbowa. 5 Nda Saul tə la'a ləvaləva njir Filisti, ngə ləvər tə səya nyi, ngə shanguɗa cha tləa. 6 Ngə cha jau Tlakəu, kəl ja a Tlakə da wum nə nyi ku shi'uni ndara təwa Urim ndara təwa njir mətakər wa. 7 Ngə Saul tə nar nyi nə kə'i kadakaliya nyi, <<Gwa'arə ɗa ma mala nda kwa tsakəza, cha tsar ɗa kəza.>> Ngə nda na, <<Vanya mala da vu Endor.>>
8 Ngə Saul tə handzə dzaki nda məlna a nji do ngabiya nyi wa, nacha ana nji mətləu tə təra yada mala nda əvu'i. Cha yi na, <<Ndzamar ɗa təwa hakəza, ka zəbiya na ɗa ndə nə yo nga tləm nyi na.>>
9 Kəl ja, mala nda nar nyi, <<Kəpal da wa, a zəndə tə kə sə nda Saul tə məra, cha kuɗənda njir hakəzə ka mutiya tə hə'i na. Mya gwa'atə ko gwa'a ka ngəya ɗa ləbam ka nja tsəya ɗa?>>
10 Ngə Saul tə səmnda fəla na tləmər Tlakə ga na, <<A səmnda tə ya fəla na tləmər Tlakə nda na pi, a da njo tlanda nghə nəuma wa.>>
11 Ngə mala nda jawa, <<Wa nə yo ngabiya ngha?>>
Ngə cha na, <<Ngabiya ɗa Sama'ila.>>
12 Nda mala nda la'a Sama'ila, cha lələ na kurakə dzəgamdzəgamə ga nar nyi nə Saul, <<Nakə təl Saul na! Mya gwa'atə ka shandə ɗa kəra?>>
13 Ngə təl tə nar nyi nə mala nda, <<Ngwa ka ləvər wa. Mi ka la'a?>>
Ngə mala nda tə na, <<Ya la'a vanya mambəl kwa zəbiya ku hə'i.>>
14 Ngə cha nar nyi nə mala nda, <<Aman ngyakəngya nya?>>
Ngə mala nda na, <<Vanya ndə halhal ana ləkutə dzəgam dzənyi kwa zədi.>>
Ngə Saul tə ngabiya ənda Sama'ila nda, ngə cha uzhi ana huɗəma cha səya hu'i.
15 Ngə Sama'ila tə nar nyi nə Saul, <<Mya gwa'atə ka wendə ɗa ga hya'andə ɗa?>>
Ngə Saul tə na, <<A ku ɓwaɓwatə dəgal na ya, njir Filisti kwa pah ɗa, ya Hyel təkə tə na ya. A tsə'u cho wum na'a, ndara təwa njir mətakər ndara təwa shi'uni wa. Nacha na gwa'atə ya ngabiya nghə ka ga ka dəkar ɗa sər məra.>>
16 Ngə Sama'ila tə na, <<Mya gwa'atə ko jau ɗa ya Tlakə təkə tə na ka, ga ɗa ka ndər dawa ngha? 17 Sə nda Tlakə tə na təwa ɗa təkəra kə nda ngə cha mərti. Tlakə dləuya tə təlkur ku cha ka, ga nə nyi nə təwul nghə Dauda. 18 Aka a da ka nəu nya Tlakə wa, ya a da ka kuɗənda njir Amalek wa, nacha gwa'atə Tlakə tə mərtə nghə ənga ənya. 19 Tlakə kwa gwa'atə njir Filisti kwa kura ngha, nahi ka njir Isra'ila, ya əzəkə hyo shili həya ɗa kuna. Tlakə tsə'u kwa gwa'atə njir Filisti kwa kura ləvaləva njir Isra'ila.>>
20 Ɗəɗəu tanyi kəl Saul tə dla səya hu'i na ləvəra aka ɓwanya Sama'ila nda. Dunama nyi wurti, aka a da cha səm sə ku dəhə ɓupəchi ana vu'i wa.
21 Nda mala nda tə shili dza Saul ga la'a ənda ləvər tə səya nyi ngə cha nar nyi, <<Ndzama, janə kwar mava nghə nəutə nya ka. Ana pya ya taɓə ku cha ya, ya mərtə nghə sə nda ka nar ɗa ya məra. 22 Sakan ja, səhimi da kwar mava ngha, əngwa ya nə nghə sərsum ka səma, ga ka uya dunamar ma'i.>>
23 Ngə cha ngyar ga na, <<A da yo səm sə wa.>>
Kəl ja, nji nyi inda tə daɓətəkər ka mala nda ndo gədi nyi, ngə cha dləukə nda. Cha hya'atə hu'i nda ga ngyata nyi nya gangər.