Dauda ku Huɗa Njir Filisti
27
1 Dauda tə jigadəma ku ɗufwa cha, cha na, <<Vəlvəl vanya pəchi Saul kwa da tsəya ɗa, ma ya ngya tangna. Sə nda ndiya ɗa vi, nacha ngə ya hwita ɗa ya tə hə'i njir Filisti. Saul kwa nda həɗa na gwa'a ɗa vu Isra'ila, ya yo mbəɗə tsa cha.>>2 Kəl Dauda kə'i nji 600 inda kə'i cha inda tə ngyar mbwa nda ga təra yada Akish, zər Mawok təl Gat. 3 Dauda kə'i nji nyi tə ngya kə'i Akish a vu Gat. Kala ndə na njir ki nyi tsa'a kə'i cha, Dauda tsə'u tsa'a kə'i mahi'i nyi mətləu, Ahinowam kwa Jezrel ana Abigel kwa Karmel, nda mala Nabal ndər Karmel haaɗa. 4 Nda nja nar nyi nə Saul ənda Dauda hwi tanyi tə yi Gat, ngə cha ngyar gwa'a nyi.
5 Ngə Dauda tə nar nyi nə Akish, <<Macha uya tə kwambiyakur tə lya ka, na'a vanya mələm ku huɗa mələm shiɗəɗə inda tə hə'i ngha, ya ngya ta ɗa kwa. Mya gwa'atə mava nghə kwa ngya ku mələm təl tsa'a na ka?>>
6 Ngə Akish tə nə nyi mələm Ziklag pəshinda, nacha gwa'atə mələm Ziklag tə ɗa ka nə təl Yahuda ba'a ənya. 7 Dauda tə ngya tə hə'i njir Filisti fa zhang ana hya fwaɗəu.
8 Kəl Dauda kwa maka ki pah njir Geshur, njir Girzi ana njir Amalek. Nanda ingə nji inda na ngya tə mbwa inga haaɗa, fwatə vu Shur tsa'a vu Masar. 9 Kala bəji nda Dauda tə biya ki pah mbwa inga, a da cho ngyar sal ndara mala na pi wa, cho fa'aya kətəng, tla, kwara, dləgwam ana dzaki. Ba'a cha ɓəl tanyi yada Akish.
10 Ma Akish tə jawa, <<Aman ka ki pah nji ənya?>> Dauda kwa na, <<A hi Negev tə hə'i Yahuda,>> ma'a əngə wa ba'a cha na, <<A hi Negev tə hə'i Jeramil,>> ma'a əngə wa, <<A hi Negev tə hə'i njir Keni.>> 11 A da cha ngyar sal ndara mala nda kwa shili na mafakə vu Gat wa, aka Dauda kwa har ku kəra cha ənda, <<Ndo nau dəkar sə nda cho mər ndo na, <Janə sə nda Dauda tə məra.> >> Sə nda Dauda tə ngya ka mər ngə ku bəji nda cha na ngya tə hə'i njir Filisti. 12 Akish tə dləukər na Dauda cha nar nyi nə kərnyi, <<A ɗa tə cha ka sər həɗə nə nji nyi, njir Isra'ila, cho ɗa ka mava ɗa ba'anawa.>>