Dauda tə Ɓəla Ngyar Saul na Pi
26
1 Vanya pəchi njir Zif tə yada Saul vu Gibiya ga na, <<A jangə Dauda tə mbu kya tə dəgəl Hakila nda kwa ndzamə dzə na Jeshimon ma?>>2 Ngə Saul tə təra səya ku dadil takə Zif, nanda kə'i ləvaləva 3,000 inda cha ɗəmtsə ku Isra'ila, ka nda ki gwa'a Dauda. 3 Saul tə fiya mbwar tsəmdzə nyi a nya laku kya tə dəgəl Hakila nda kwa ndzamdzə na Jeshimon, kəl ja, Dauda tə ngyata nyi ku dadil takəu. Nda cha ngatə ənda Saul shili tə ka gwa'a nyi, 4 ngə cha sətə nji nda gwa'abiya ndara vəlvəl Saul dzəva ti.
5 Ngə Dauda tə hya'atə ga təra yi tangnda Saul tə fiya mbwar tsəmdzə nyi tə nda. Ngə cha la'a mbwa nda Saul ana Abna zər Ner, dəgalər ləvaləva tə piyata nda. Saul tə piya ta nyi ku mbwar tsəmdzə nda, ana ləvaləva tə ɓandə nyi.
6 Kəl ngə Dauda tə jau Ahimelek ndər Hiti ana Abishai zər Zeruya, zamənya Joab, <<Wa kwa ma'i tsa'a naya səyo mbwar tsəmdzə ngə səya da Saula?>>
Ngə Abishai tə na. <<Yo ma'i na ka.>>
7 Kəl ngə Dauda ana Abishai tə ya ku mbwar tsəmdzə ka Saul nda əvu'i, kəl janə Saul ku hanyi ana masə tsaku ku hə'i ləhə dza kəra cha. Abna ka alenya ləvaləva inda tə ɓandə nyi ndo nji hanyi.
8 Ngə Abishai tə nar nyi nə Dauda, <<Hyella nə nghə ndər dawa nghə ku cha kə ənya. Sakana ngya ɗa ya kukwau nyi go hə'i zhaka zhang tanyi ana masə ɗa na, a yo dzavə nyi zhaka mətlə wa.>>
9 Kəl ja, Dauda tə nar nyi nə Abishai, <<Ngwa ka tsəya nyi wa! Wa kwa nau tsəkar ndə nda Tlakə tə dzəviya? 10 A səmnda tə ya fəla na tləmər Tlakəu, Tlakə na kərnyi kwa tsəya nyi, ndara cha tah ku pah, ma'a əngə wa, tsə'u bəji nyi kwa gəla. 11 Kəl ja, ga Tlakə kanda ya tsəkar ndə nda Tlakə tə dzəviya. Sakana hətə masə nga ana pəla ɓiti ngə dzər kəra cha ngə ma təra.>>
12 Əngə Dauda tə hətə masə nda ana pəla ɓiti nda dzər kəra cha nda, ngə nda təra. Ndə da zəndi, ndara la'a nda wa, ya a ndə da sha ku hanyi wa. Dəhə nda kwa njihanyi, aka Tlakə tə mərtə nda gu hanyi tlaɓətlaɓəu.
13 Ngə Dauda tə dləgəlbiya dakə nda ga biya ta'ita nyi kyo kəra dəgəl nda, pama nda naɗa'a tanyi. 14 Cha nga ləvaləva ana Abna zər Ner, cha na, <<Abna kwa ngatə ɗa kə ya?>> ngə Abna tə ɓəlakə nyi, <<Wa ngo nga ndəu, kwa hya'a təl ku hanya?>>
15 Ngə Dauda tə na, <<A da kə sal ma? Wa wi nakə ku Isra'ila? Mya gwa'atə a da ka ɓəla tlakə nghə təl wa? Vanya ndə da tə shili ku mbwar tsəmdzə kəhi, ka cha tsəya tlakə ngha, təl. 16 Sə ngə ka mər ngə da mənakə wa. Səmnda tə ya fəla na tləmər Tlakəu, naka ana nji ngha, a ki tə nja kuɗənda hi, aka a da hya ɓəlatə tlakən hi, ndə nda Tlakə tə dzəviya wa. Ndzamari, aman masə ana pəla ɓiti təl nda ləhə dzər kəra cha nda?>>
17 Ngə Saul tə ngabiya kuraka Dauda ngə cha na, <<Dauda zər ɗaa, kuraka kə nə ya?>> Ngə Dauda tə ɓəlakə nyi, <<Ah kuraka ya nə tlakə ɗa, tələu.>> 18 Ngə cha tsakətə na, <<Mya gwa'atə tlakə ɗa kwa gədlə mava nya? Mi ya məra? Mi bikə ɗa? 19 Tlakə ɗa təl ɗa, səyahimi da ɓwanya mava ngha. Macha Tlakə ngə tə tsukutə nghə ka mər dawa na ya, əngwa cha dləutsə sər hatəmachi. Macha tsə'u nji ngə tə məra, nda ɗa shi'ushi'unyi mar Tlakəu! Aka nda gədlənda ɗa tsa ya da uya mbaɗə ɗa ku sər fa'aki Tlakəu, nda na, <Ma'i ki həsəli nə katəu.> 20 Ngwa ka da tsəya ɗa ku mihiɓir hə'i nda naɗə tsa Tlakə wa. Mya gwa'atə təl Isra'ila tə biya ka gwa'a ɗa wi ndər gəhi eakə taka?>>
21 Kəl ngə Saul tə na, <<A mər tə ya səpəla'a. Zər ɗa Dauda, ɓəl shili. Aka la'a tə kə səlir pya ya ənya, a tsə'u yo gwa'a ya takasiya nghə səkə wa. Kəpal da wa, a mər tə ya kəkəngkur, a mər tə ya bikə 'ual'ualəu.>>
22 Ngə Dauda tə na. <<Janə masə təl, sə ndə zhang ku huɗa nguli tlakala nghə cha shili dləutsi. 23 Tlakə kwa nə nyi wazəba nə kala ndə məlməl na tsa'atsa'akur nyi ana jirikur nyi. Tlakə tə na'a nghə ku cha ya ənya, kəl ja, a da yo tsəkar ndə nda Tlakə tə dzəviya wa. 24 Wi nə pya ka tə ɗa na səli na'a ənya na, ga Tlakə mərtə pya ya cha ɗa na səli cha dləuya ɗa ku dəhə ɓwaɓwatəu.>>
25 Kəl ngə Saul tə nar nyi nə Dauda, <<Ga Tlakə səkə nghə papa'akur zər ɗa Dauda, ko uya biyama ku dəhəkura sə nda ko məra.>>
Ngə Dauda tə ma'i tanyi, ga təra kyo ki nyi.