Dauda, Nabal ana Abigel
25
1 Sama'ila tsə'u tə tah, ngə dəhə njir Isara'ila tə tsəmtədzə ga sə'ingu nyi, ngə nda haɗiya nyi ku ki nyi vu Rama.Kəl ngə Dauda tə təra gwa tə dadil takə Mawon. 2 Vanya ndər Mawon da kwa tsəɗə shishi dza kətəng nyi i'i a vutə hə'i Karmel, ndər gəna cha gagaɗa. Kətəng da tsa cha 3,000 ana kua 1,000. 3 Tləm nyi Nabal tləmər mala nyi tsə'u Abigel. Mala nda na dəma cha, ya gumaguma, kəl ja, sal nyi nyandəla Kaleb, ndə dza'u cha, ya təhuɗə da nya ta cha wa.
4 Ku sakanda Dauda kwa dadil takəu, ngə cha ngatə ənda Nabal kwa tsəɗə shishi dza kətəng nyi i'i. 5 Kəl ngə cha sə nguli tlakala kuma, cha nar nda, <<Ma'i ma gya da Nabal a vu Karmel hya gi usa nyi tə nya ɗa. 6 Hya nar nyi, <Pya ka təɗardza! Piyarɗufəu a nə ngha ana njir ki ngha! Piyarɗufəu tsə'u nə dəhə nji nda nə ngha!
7 << <Ya ngatə ko tsəɗə shishi dza kətəng ngha. Ku bəji nda ea ka njir ɓəla kətəng nghə i'i, a na ea ɗiya nda wa, ya ku dəhə ngya kənda vu Karmel sə kənda da sa wa. 8 Jawar kadakaliya nghə ndo dəkar ngha. Aka ənga kaɗa na kwambiyakur nə nguli tlakala ɗa inga, aka ea shili tə bəjir ladər. Maki, nə nyi kala sə nda ka uya nə mavi'i ngha ana nə zər nghə Dauda.> >>
9 Nda nguli tlakala Dauda inda tə dzəva, ngə nda dəkar nyi mafakə nda nə Nabal tə nyar Dauda. Ngə nda ngya ga səka.
10 Ngə Nabal tə wum nə mavi'i Dauda inda, cha na, <<Wa ngə Dauda nga? Wa ngə zər Jessi nga? Mavi'i ɗang tanyi inda tə hwibiya tsa tlakən nda ku hanyi ina. 11 Mya gwa'atə yo hətə gwazhilakə ɗa ana ɓiti ɗa, ana sərshishi ɗa nda ya tlakər wulya ka njir tsəɗə shishi dza kətəng ɗa, ya nə nyi nə nji inda pa'a ya zəndə mbwa nda nda hya'atə ta?>>
12 Ngə mavi'i Dauda inda tə sha ga ɓəl yada Dauda, ga yi dəkar nyi dəhə sə nda Nabal tə na. 13 Ngə Dauda tə nar nyi nə nji nyi, <<Hawulya ma katsakər kəhi!>> ngə nda hawulya katsakər kənda, ngə Dauda tə hawulya nənyi. Nji kwa ɗa 400 Dauda tə təra kə'i nda, nji 200 tsə'u tə ngya dza kar kənda.
14 Ngə zhang ku huɗa mavi'i Nabal tə nar nyi nə Abigel mala Nabal, bəra <<Dauda tə sə changhabal nyi hya'atə ku dadil takə nda usar tlakər ki kəea, kəl ja, tlakər ki kəea tə ngəlnda nda. 15 Ya nji ingə char ea tə mənakəkur gagaɗa. A da ea uya ɓwaɓwatə wa, ya ku dəhə bəji nda ea kə'i nda ku dadil takə nda, a sə kəea da sa wa. 16 Tsa'a nda kə'i ea vu'i na puchi, nda ɗa wi ɓangtili nda tə ɓandə ea ku dəhə bəji nda eo ɓəla kətəng tə ləhə dzən nda. 17 Saka ngə ja, ka jigadəma təkəri ka la'a ndara vanya sə da ko nau məra, aka təmachi ɗa tə ləhə nya vi tlakər ki kəea ana dəhə njir ki nyi. Ya jan cha dza'u nda a ndə da kwa nau ɓwanya nə nyi wa.>>
18 Abigel da zhaka ɗə bəji wa. Cha hətə gwazhilakə 200, ana salakam mətlə na ɓitir anap kwa, ana kətəng tufəu nda nja tagu, ana səuhiuhi nda nja səlti tasau kwabə makərəu, ana yayar anap gharəu, ana kaɓəkaɓər yayar kanda 200, cha fa'atə tiya kwara i'i. 19 Ngə cha nar nyi nə nguli tlakala nyi, <<Ma'i ma, janə yo nəu hi.>> Kəl ja, a da cha nar nyi nə sal nyi Nabal wa.
20 Nda cho ma'i tə ya kwara nyi, cha həya vanya mə tangnda, kəl janə Dauda kə'i nji nyi kwa shili kəra cha, ngə cha ɓə kə'i nda. 21 Dauda wurta nanda ku ɗufwa cha, <<Ɓwa'atanyi nə ya ɓəla dəhə sər ndə na, nda a sə da nda nənyi tə sa tə dadil takə nə wa. Janə cha kibiya tə mənakəkur ana ɗimikur. 22 Ga Hyella tsəya ɗa, ma ya ngya nyi na ndə zhang təvi mbudla!>>
23 Nda Abigel tə la'a Dauda, cha kusa səya tə ya kwara nyi ga uzhi huɗə Dauda ana huɗəma cha hu'i. 24 Cha dla səya huɗə Dauda ga na, <<Tlakə ɗa, əngwa bikə ngə ɗa təkəra ya səɗa. Maki ngyar mava nghə ɓwanya nə ngha, səya himi da sə nda mava nghə kwa na. 25 Ngwa tlakə ɗa da səhimi da Nabal ndə pəla'a ngə wa. Aka ndə kəkəng cha wi ngə tə tləmə nyi, ya kəkəngkur tanyi ngə kwa nəu nyi. Naya mava ngha, a da ya la'a nji inda tlakə ɗa tə sə inda wa.
26 <<Sakana manə Tlakə ɓəlatə nghə tə tsa pənda mashi ana tsa kisəkur na kərnghə ja tlakə ɗa, a səmnda tə ya fəla na tləmər Tlakəu, ga njir dawa nghə ana dəhə ndə nda kwa gwa'a takasiya nghə cha ɗa wi Nabal. 27 Maka i, ta'i ka dləutsə ga'a nə mava nghə tə shili nə na, ka nə nyi nə nji ingə kwa nəu nghə inga. 28 Maki far bikər mava ngha, aka tlakə kwa mərtə ko ɗa ka təl, ana nyandəla kə tsəu, aka pah inda ko pah, nə Tlakə inga. Ngwa nja uya nghə na bikə ku dəhə ngya nghə wa. 29 Madangə vanya ndə kwa gədlə nghə ka cha tsəya ngha, pya tlakə ɗa kwa ngya ɓəlaɓəlanyi. Kəl ja, pya njir dawa ngha, njo vakənda wi hangu nda nja vakə na gavərndəng. 30 Ma Tlakə tə nyabiya dəhə sə mənakə inda cha mər alkawal təkəra tlakə ɗa, ga fiya nyi ka təl təkəra njir Isra'ila, 31 ngwa jigadəma tlakə ɗa nə nyi bikə ənda bikər pənda mashi da təkəra cha wa, ngwa cha kisəkur na kərnyi wa. Ma Tlakə tə nə nyi kura nə tlakə ɗa, ka ɗənghatə na mava ngha.>>
32 Ngə Dauda tə nar nyi nə Abigel, <<Fal ngyatə nə Tlakəu, Hyel njir Isra'ila, nda tə sə nghə ənya ka ga ka shili ɓə na ya. 33 Ga Tlakə səkə nghə papa'akur aka dəma ngha, ana aka ka katə ɗa tsa pənda mashi ənya, ana tsa kisəkur na kərɗa. 34 Vəlvəl Tlakəu, Hyel njir Isra'ila katə ɗa tə tsa takasiya ngha, ma a da ka nda shili kuskus ga shili həya ɗa wa, a vanya ndə da nda nə Nabal kwa nda həyadzə mada zhang təvi mbudla wa.>>
35 Ngə Dauda tə dləutsə sə inda cha shili nə inda ku cha cha ga na, <<Ma'i kyo ki na piyarɗufəu. A ngatə tə ya gədi ngha, ya yo mərtə wi nga.>>
36 Nda Abigel tə ɓəl yo ki cha yi həya Nabal tə ɓatliya ladər wi nə təl ku ki nyi. A wi tə cha gagaɗa cho ngatə məsəɗakəkur. Aka ənga a cha shau nyi wa, kəl nda vu'i tə wura. 37 Nda vu'i tə wura, Nabal shili tə ku jigadəma nyi, ngə mala nyi tə dəkar nyi dəhə sə inda, kəl shanguɗa cha tlə 'ual'ualəu, cha ma'a ɗa wi hangu, a tsə'u cho nau sha kəkətə wa. 38 Ahir hanyi kwa ɗa kuma, Tlakə tə dəgə Nabal ngə cha tah.
Dauda tə Həbiya Abigel ka Mala Nyi
39 Nda Dauda tə ngatə ənda Nabal tə ti, ngə cha na, <<Fal ngya tə nə Tlakəu, nda kisəkur na'a tə Nabal aka chul həyatə nda cha həyatə ya. Cha katə mava nyi tsa mər bikəu, ga həkə nyi bikə Nabal təkəra kərnyi.>>
Ngə Dauda tə sətə nyi kurakə nə Abigel, cho gwa'a cha ɗa ka mala nyi. 40 Ngə mavi'i Dauda tə yi Karmel ga yi na, <<Dauda tə sə ea da ka, ea hətə nghə yada cha ka ga ka yi ɗa ka mala nyi.>>
41 Ngə cha uzhi ana huɗəma cha hu'i ga na, <<Naya kwatəra nyi ya, a ɓatliya tə ya ka ya chinda nyi hya mavi'i nyi.>> 42 Kəl Abigel tə kusa gya tə ya kwara, cha fa'atə kwatəra nyi tufəu, nda təra kə'i changhabal Dauda inda, cha yi ɗa ka mala nyi. 43 Dauda tsə'u tə hə Ahinowam hya'atə vu Jezrel, kya'anda nda ɗa ka mahi'i nyi. 44 Kəl ja, Saul tə ɗəunda kwa nyi Mikal, mala Dauda nda, nə Paltiyel zər Laish, nda hya'atə vu Galim.