Dauda tə Ngyar Saul na Pi
24
1 Ahir Saul tə ɓəl shi hya'atə tə mbwar gədlə njir Filisti, ngə nja nar nyi, <<Wula Dauda hyo dadil takə Engedi.>> 2 Ngə Saul tə ɗəmtsə nji 3,000 ku huɗa dəhə njir Isra'ila ga təra ki gwa'a Dauda kə'i nji nyi ləhə dza mə nda njo nga Mə Kua Takəu.3 Ngə cha shili ku dangal kətəng a nya laku, tləl da tangnda, ngə Saul tə gwa ka cha gwa ɓəliyasar. Dauda kə'i nji nyi kwa da gwa tə ɓəlkər tləl nda. 4 Ngə nji nə Dauda inda tə nar nyi, <<Nənnə ngə pəchi nda Tlakə tə ɓwanya təkəri nda cha na bəra, <Yo nə nghə njir dawa nghə ku cha ka, ka ga ka mər sə nda ka i na nda.> >> Ngə Dauda tə hya'atə saməu, ga yi tlatsə nyachira ləkutə Saul.
5 Ahir ənga jigadəma nyi tə char nyi ənda bikə ngə cha mər na tlatsə nyachira ləkutə Saul nda. 6 Ngə cha nar nyi nə nji nyi, <<Ga Tlakə kanda ya mər chul nəna sə nə tlakə ɗa, ndara ya ha cha ya ka ya tsəya ndə nda Tlakə tə dzəviya.>> 7 Ana ɓwanya inga Dauda tsə nji nyi, a da cha ngyar nda pah Saul wa. Ngə Saul tə ngyar tləl nda ga tərata nyi.
8 Ngə Dauda tsə'u tə biya ku tləl nda ga nga Saul, <<Aləvari!>> Nda Saul tə sha biyahi nyi, ngə Dauda tə uzhi ana huɗəmacha hu'i. 9 Ngə cha nar nyi nə Saul, <<Mya gwa'atə ka səhimi da ɓwanya nji inda tə na bəra, <Dauda kwa gwa'a cha takasiya ngha>? 10 Ənya a la'a tə kə na lya ka ənda Tlakə tə na'a nghə ku cha ya ku tləl nda. Alenya nji tə nar ɗa ya tsəya ngha, kəl ja, ya ngya ngha, ya na, <A da yo ha cha ya ka tlakə ɗa wa, aka ndə nda Tlakə tə dzəviya cha.> 11 Ada, la'a, janə nyachira ləkutə nghə ku cha ya! Ya tlatsə nyachira ləkutə ngha, kəl ja, a da ya tsəya nghə wa. Sakan ja, ka zəndə ka ngabiya, ənda a da ya ndər bikə nə mər sə ɗimi ndara ndər tləmwali wa. A da ya zandə nghə sə wa, ya janə ko gwa'a ɗa ka ga ka tsəya ɗa. 12 Ga Tlakə tlanda nəuma ku pama ma na ka. Ga Tlakə tsə'u cha kibiya səkur sə ɗimi nda ka mərtə ɗa, kəl ja, a da yo fəndzə nghə chi wa. 13 Wi nda nji inda haaɗa kwa na, <Ɗimkur kwa shili təwa nji ɗimi,> aka ənga, a da yo fəndzə nghə chi wa.
14 <<Aka wa təl tə biya? Wa ko gədla? Həya tətə ya? Aa pəndachil ya? 15 Ga Tlakə ɗa ka ndər tla nəuma ku pama ma na ka. Ga Tlakə ndzama, cha ta'i tə ya ya, cha dləuya ɗa ku cha ka.>>
16 Nda Dauda tə wur na ɓwanya inga, ngə Saul tə jau Dauda, <<Zər ɗa Dauda, kuraka kə ngaa?>> Ngə cha tiwi 'ual'ualəu. 17 Ngə cha nar nyi nə Dauda, <<A ndiya ɗa tə kə Tsa'atsa'akur, ka char ɗa mənakəkur, ngə ya kinda nghə na ɗimikur. 18 A chabiya ɗa tə ka ənda ka char ɗa mənakəkur. Tlakə tə tləɗanda ɗa nə ngha, kəl ja, a da ka tsəya ɗa wa. 19 Ma ndə tə uya ndər dawa nyi ya, kwa ngya nyi cha cho təra na dza cha shishi'u ya? Ga Tlakə nə nghə wazəba mənakə aka mənakəkur nda ka char ɗa ənya. 20 A zəndətə ya ənda kəpal da wa ko ɗa ka təl, ya təlkur njir Isra'ila kwa chiya dza təwa ngha. 21 Səmnda ɗa fəla na Tlakə sakana, ənda a da ko kuɗənda nyandəla ya ahir ya təta ɗa wa, məlna a da njo far na tləmə ɗa ndara tləmər ada ɗa wa.>>
22 Ngə Dauda tə səmnda nyi fəla nə Saul. Ngə Saul tə ɓəl ta nyi kyo ki, kəl ja, Dauda kə'i nji nyi tə təra kya tə mbwar mbu kənda.