Dauda tə Mbəɗandə Mələm Kaila
23
1 Nda nja nar nyi nə Dauda bəra, <<La'a, njir Filisti kwa pah ka njir Kaila, ndo fa'a səuhiuhi kənda tə lar,>> 2 Ngə cha gədi Tlakəu cho na, <<Ya ma'i ya ki pah njir Filisti ya?>>Ngə Tlakə tə wumə ga na, <<Ma'i, ka ki pah njir Filisti ka mbəɗandə njir Kaila.>>
3 Kəl ja, nji nda nə Dauda tə nar nyi, <<Tangnə vu Yahuda məno ləvəra, abiyakata məna yi Kaila məna pah ləvaləva njir Filisti!>>
4 Ngə Dauda ɓəla gədi Tlakə səkəu, ngə Tlakə tə wumə nə nyi ga na, <<Ma'i səya Kaila, aka yo nə nghə njir Filisti ku cha ka.>> 5 Ngə Dauda ka nji nyi tə təra səya Kaila, ga səya pah njir Filisti ga fa'atə sərshishi kənda. Cha kuɗənda nji ɗanghəu ga mbəɗandə njir Kaila. 6 Ku bəji nda Abiyatar zər Ahimelek tə hwi yada Dauda vu Kaila, cha shili na efod nda ku cha cha.
Saul tə Gədlə Dauda
7 Ngə nja nar nyi nə Saul ənda Dauda təra tə yi Kaila ngə cha na, <<Yawa! Hyel na'a nyi tə ku cha ya, aka Dauda fəu tə kərnyi ku jarum, təwa gwa ku mələm nda na nyaki, nda njo haɗə na zəwa lyang.>> 8 Ngə Saul tə tsəmtə dəhə ləvaləva nyi ka ki dla'a, ka ga nda səya Kaila nda səya ɓandə Dauda kə'i nji nyi. 9 Nda Dauda ngatə ənda Saul kwa haɓə ɗimikur ka cha, ngə cha nar nyi nə Abiyatar pərist, <<Anda na efod nga.>> 10 Ngə Dauda tə na, <<Yawa Tlakəu, Hyel njir Isra'ila, mava nghə ngatə tə ənda təkəɗəu Saul kwa haɓə ka shili Kaila ka cha shili wazənda mələm na tə dəbar ɗa. 11 Ndara njir Kaila kwa tləɗanda ɗa nə nyi ya? Saul kwa shili wi nə mava nghə tə ngatə nə ya? Tlakəu, Hyel njir Isra'ila, par nyi nə mava ngha.>> Ngə Tlakə tə na, <<Cho shili.>> 12 Ngə Dauda tə ɓəla jawa, <<Njir Kaila kwa tləɗanda ɗa kə'i nji ɗa nə Saul ya?>> Ngə Tlakə tə na, <<Ndo tləɗanda hi.>> 13 Kəl ngə Dauda ka nji nyi kwa ɗa nji 600, tə ngyar Kaila ga go ma'i hya'atə tə vanyi mbwa ya tə vanyi. Nda nja nar nyi nə Saul ənda Dauda hwibiya tə ku mələm Kaila, ngə cha ngyar yi nda.
14 Dauda tə ngya tə mbu kya tə dəgəl nə dadil takə nə Zif. Kala pəchi Saul kwa gwa'a nyi, kəl ja, Hyel da tləɗanda nyi Dauda wa. 15 Ku bəji nda Dauda vu Horesh ku dadil takə nə Zif, ngə cha uya mafakə ənda Saul biya tə ka gwa'a pya cha. 16 Ngə Jonatan zər Saul tə yada Dauda vu Horesh ga yi tsətə nyi ɗufə cha ta'i ka Hyel. 17 Cha nar nyi, <<Ngwa ka da ləvər wa, ada ɗa Saul do uya nghə wa. Ko ɗa ka təl təkəra njir Isra'ila, naya tsə'u yo ɗa ləhə dzə ngha. Mada ada ɗa Saul ma'a zəndə tə ənga.>> 18 Nanda mətlə nda nda mbandər huɗə Tlakəu, ngə Jonatan tə ɓəl kyo ki, kəl ja, Dauda tə ngya vu Horesh. 19 Ngə njir Zif tə gya da Saul vu Gibiya ga gi nar nyi, <<Dauda mbuta nyi tə ku hə'i kəea ku mbwar mbu a vu Horesh, a kya tə dəgəl Hakila təwa holma nə Jeshimon. 20 Sakən ja aləvari, kala bəji nda ka i ti, ka səya da ea, naea tsə'u eo tləɗanda nyi nə ngha.>> 21 Ngə Saul tə wuma, <<Tlakə səkə hi papa'akur aka hya ɗəngha na ya. 22 Ma'i ma hya ki gwa'abiya mbwa nda Dauda tə mbuta nyi ti, ana ndə nda la'a nyi tangnda, aka nja nar ɗa ənda ndər dəma cha gagaɗa. 23 Gwa'abiya ma dəhə mbwar mbu nyi hya shili na ɗa təkəɗər mafakəu. Kəl ba'a ya ma'i kə'i hi, macha ku hə'i ngə cha, yo gwa'a nyi mada amanə ku dəhə hə'i Yahuda.>> 24 Kəl ngə nda hya'atə ga təra yi Zif təvi Saul yi nda. Dauda tsə'u kə'i nji nyi ku dadil takə Mawon nda, a vu Araba təwa holma nə Jeshimon. 25 Saul ka kə'i nji nyi tə ghəya gwa'a Dauda, nda Dauda tə ngatə ngəna mafakəu, ngə cha səya kyo mə nda ga səya ngya tə dadil takə Mawon. Nda Saul tə ngatə ənga, ngə cha nəu Saul go dadil takə Mawon. 26 Saul kwa ma'i kwa hir mə bananda, Dauda kə'i nji nyi bangətiti, cho kusa ka cha hwita nyi tsa Saul. Ma Saul kə'i nji nyi kwa kusa ka nda səya nda, 27 kəl janə vanya changhabal tə shili da Saul cho na, <<Anda ma kusəkusəu! Janə njir Filisti shili tə na pah ku hə'i kəmən.>> 28 Kəl ngə Saul tə ngyar gədlə Dauda ga təra ka cha ki pah njir Filisti. Nacha gwa'atə ndo nga mbwa nda, Sela Hamalekot. 29 Dauda tsə'u tə hya'atə tangnda ga təra gyo mbwar mbu nə Engedi ga gi mbuta nyi.