Dauda vu Adulam ana Mispa
22
1 Ngə Dauda tə ngyar Gat ga hwi ta nyi gyo tləl Adulam. Nda ka zamə nyi ka njir ki nyi tə ngatə ənga, ngə nda təra yada cha. 2 Dəhə nji inda ku ɓwaɓwatəu ndara nji inda njo nəu nda məl, ndara nji inda pa'a na piyarɗufəu kwa ɗa nji 400 tə tsəmtədzə da cha, ngə cha ɗa ka gau kənda.
3 Hya'atə tangnda Dauda tə təra yi Mispa a vu Mowab, ngə cha yi nar nyi nə təl Mowab, <<Kwa ngyar kə ada ɗa ana ama ɗa nda shili ngya kə'i kə kəl bəji nda ya ngabiya sə nda Hyel kwa mər na'a ya?>> 4 Kəl ngə Dauda tə ngyar njir yah nyi nə təl Mowab, nda ngya kə'i cha ku dəhə bəji nda Dauda tə mbu ti.
5 Kəl ja, Gad ndər mətakər tə nar nyi nə Dauda, <<Ngwa ka da ngya tə mbu wa. Kusa təra ya tə hə'i Yahuda.>> Ngə Dauda tə ngyar mbwa nda ga təra go kubu Haret.
Saul tə Tsəya Pərist nə Nob
6 Kəl Saul tə ngatə ənda la'a tə nji mbwa nda Dauda ka nji nyi ti. Saul tsə'u tə ngya vu Gibiya a tə kiɗa wur mbəla kya tə dəgəl ana masə ku cha cha, ana dəhə njirawawa'a nyi tə ɓandə nyi. 7 Ngə Saul tə nar nda, <<Ngatə ma, njikə Banyami! Dauda kwa nə hi fa ana fa anap ngan ja? Hyo la'a wi cho fiya hi ka gavərma nji dəbu dəbu ana nji gharu gharu ya? 8 Nacha na gwa'atə hyo haɓə ɗimikur nya ndəla ya ja? Ndə da ku huɗa hi tə nar ɗa, ənda zər kərɗa tə daɓtəkər na zər Jesi wa. Ndə da lya hi tə ɗəngha naya ndara cha nar ɗa ənda zər ɗa tə tsəkutə mava ɗa cha mbuya ɗa mwabu wi nə cha mər ənya nə wa.>>
9 Kəl ja, Doyeg ndər Edom, nda təta'i na Saul tə na, <<A la'atə ya zər Jessi ənda cho yada Ahimelek zər Ahitub vu Nob. 10 Ahimelek tə gədi Tlakə ka Dauda, ətsəu, cha nə nyi sərsuma ana katsakər Goliyat ndər Filisti nda.>>
11 Ngə təl tə sə nja nga Ahimelek nda pərist zər Ahitub ana dəhə njir ki nyi inda pərist i'i vu Nob, ngə dəhə nda tə shili da təl. 12 Ngə Saul tə na, <<Səya himi zər Ahitub.>>
Ngə cha wum ga na, <<Aləvari, janə yo səhimi.>> 13 Ngə Saul tə nar nyi, <<Mya gwa'atə hya mbatə nya nahi na Dauda? Mya gwa'atə hya nə nyi sərsuma ana katsakər, ana ma'a gədi Hyel ka cha, janə ɗatə cho tləmwali na'a, cho mbu ɗa wi nə cho mər ənya na?>>
14 Ngə Ahimelek tə wum ga na, <<Aku huɗa dəhə kadakaliya nghə i'i wa na gəzə alkawal wi Dauda sələkənya təl, gau njir ɓəla ngha, nda njo la'a səli nyi ku ki ngha? 15 Ənya nə ya ghəya gədi Hyel ka cha ya? A da pa'a wa! Ngwa təl da tsətsəkwa mava nyi ndara njir ki ada nyi wa, aka mava nghə da zəndə sə təkəra dəhə sə ingə wa.>>
16 Kəl ja, təl tə na, <<Ahimelek, kəpal da wa njo kuɗənda hi, nahi ka dəhə njir ki ada ngha.>>
17 Kəl ngə təl tə nar nyi nə njir ɓəla inda dzə nyi inda, <<Sha ma hya kuɗənda pərist nə Tlakə inga, aka nanda ma'a njir chi hi nə Dauda inga. A zəndə tə nda ənda cha hwi ta nyi dəhə ka ənga, a da nda par ɗa wa.>> Kəl ja, njirawawa'a inda da kwa i tsəkar pərist Tlakə inda wa.
18 Kəl ngə təl tə nar nyi nə Doyeg, <<Sha ka kuɗənda pərist inga.>> Ngə Doyeg ndər Edom tə sha ya kəra pərist inda ga kuɗənda nda. Pəshinda cha kuɗənda nji chiskumnyi parnya tufəu inda tə handzə efod nə linən. 19 Ətsəu cha kuɗənda njir Nob, mələm pərist inda, dəhə ka mahi'i ka ngulisha'a, ka nguli didizəu, ka tla ka kwara, ka kətəng.
20 Kəl ja Abiyatar, zər Ahimelek zər Ahitub, tə mbəɗə ga hwi ta nyi yada Dauda. 21 Ngə cha nar nyi nə Dauda ənda Saul kuɗənda tə pərist nə Tlakəu. 22 Kəl ngə Dauda tə nar nyi nə Abiyatar, <<Pəshinda, nda ya la'a Doyeg ndər Edom hinda, a zəndə tə ya təkədəu, cho nar nyi nə Saul. Naya nga gwa'atə njir ki ada nghə dəhə tə kuɗa. 23 Ngya tsa'a na ya, ngwa ka da ləvər wa, ndə ngo gwa'a pya kə ngə kwa gwa'a pya ya ma'a naya.>>