Dauda vu Nob
21
1 Dauda tə təra yi Nob, yada Ahimelek pərist. Ahimelek tə biya ka dləu nyi, cho tsamətlaɗəu, ngə cha jawa, <<Mya gwa'atə zhangtang a ndə da tsa'a na kə wa?>>2 Ngə Dauda tə wuma nə Ahimelek pərist bəra, <<Tlər təl nə ya shili ka məra, ya cha nar ɗa ngwa ya da dəkar nyi sə nda cha sə ɗa ka ya mər nə madawa wa. Ya nar nyi nə na'ana nji tsəu, nda səkətə ɗa tə vanya mbwa. 3 Sakan ya, mi sə nda tsa ka? Na'a gwazhilakə takwara tufəu, əngə wa kala sə nda tsa ka.>>
4 Kəl ja, pərist tə wumə nə Dauda, <<A sərsum nda pəlakər dəhə nji kwa səm da tsa ya wa, kəl nda gwazhilakə nda nja dzəviya, yo nau nə nghə ma a wur ɗa, a nji nghə ingə da ɓə na mahi'i wa.>>
5 Ngə Dauda tə ɓəlakə nyi, <<Kəpal da wa, wi nda ea tsəl nə ma eo biya ka ma'i, a da ea ɓə na mahi'i wa. Sər shili chichi nyi tanyi mada ku wanakar ma'i tanyi, abiyakata ma'i nda na karti wi nənnə ənya na!>> 6 Ngə pərist nda tə nə nyi gwazhilakə dzəvədzəvə inda, mana a vanya gwazhilakə da tangnda wa, kəl nda gwazhilakə nda nja dzəviya, nda njo maka fa'anda mar Tlakə kwa bəlatə na kwakwaɗə nyi, pəshinda njo fa'anda tə nda.
7 Pəshinda, vanya mava Saul da tangnda, nda nja ta'ində mar Tlakəu, tləm nyi Doyeg ndər Edom, gau nə njir ɓəla sərshishi Saul.
8 Ngə Dauda tə jau Ahimelek pərist, <<A masə ndara katsakər da tsa kə tangnə ma? A ya shili na katsakər ɗa ndara vanya balmi wa, aka təl tə kusatə ɗa.>>
9 Ngə pərist nda tə wuma, <<Katsakər Goliyat ndər Filisti nda ka tsəya ku dakə Ela nda nə tangna, a ngə nja pəɗəu ku pa'ua biyahir efod nga. Macha ko gwa'a, həti, a vanya katsakər da tangnə wa kəl nacha.>>
Ngə Dauda tə na, <<A vanya katsakər da ndiya nənnə wa, na'a.>>
Dauda vu Gat
10 Pəshinda Dauda tə hwita nyi tsa Saul yada Akish təl Gat. 11 Kəl ja, ka kadakaliya Akish tə nar nyi, <<A Dauda təl Isra'ila nə ma? A da təkəra cha nda nja na miya njo utsa bəra:
<Saul tə kuɗənda nji dəbu dəbu,
Dauda tsə'u tə kuɗənda dəbu dəbu zhaka kumə ma?> >>
12 Nda Dauda tə ngatə ɓwanya nga ngə ləvər tə səya nyi tsa Akish təl Gat. 13 Ngə cha mərtə kərnyi wi ndə gwaɗəgwaɗə kər huɗən nda, aku sakanda cha ku cha nda, cha mərtə kərnyi wi ndər məlləm, cho tsəfə nya sər haɗə nyaki, cha ngyar tuli kwa ndzə səya tə təngha cha.