Dauda ana Jonatan
20
1 Kəl ngə Dauda tə hwibiya ku Nayot a vu Rama ga ya da Jonatan ga jau nyi, <<Mi ya məra? Mi bikə ɗa? Mi sə nda zandə nyi ya nə ada nghə cho gwa'a cha tsəya ɗa?>>2 Ngə Jonatan tə wuma, <<A da wa! A da ko tə wa, ndzama, a sə da ada ɗa kwa məra, mada aman kushikura cha ndara dəgalkura cha kəla cha par ɗa wa. Mya gwa'atə cha ɗəwanda ɗa nənna? A sə ngə da vəlvəl wa!>>
3 Kəl ja, Dauda tə səmnda nyi fəla ga na, <<Ada nghə zəndə tə təkəɗəu ənda uya tə ya kwambiyakur tə lya ka, ya ngə cha na ku ɗufwa cha, <A da yo nar nyi sənə nə Jonatan wa, ma əngə wa, huɗa cho tla.> Kəl ja, a səmnda tə ya fəla na tləmər Tlakəu, ana tləm ngha ənda kushitanyi tə katə tsa yo nda tah.>>
4 Ngə Jonatan tə nar nyi nə Dauda, <<Kala sə nda ko gwa'a ya məra, yo mərtə ngha.>>
5 Ngə Dauda tə na, <<Ndzama, əzəkə ladər taɗər hya, təki yo kina səmə sərsum na təl, kəl ja, əngwa ya ki mbuta ɗa ku fa kəl akə fərpəchingə zəkəu. 6 Ma a ada nghə da la'a ɗa wa, ka nar nyi, <Dauda tə gwa'a laku tsa ya ka cha kusa gwa Baitalami, a yo mələm nyi, aka hatəmachi ka fa ka fa da hinda ka dəhə nyavi kənda.> 7 Ma cha na, <A ɗa tə mənakəu,> yau, mava nghə kwa uya mbəɗa. Kəl ja, ma huɗa cha tla, ka zəndi, a ɓatliya tə cha ka cho mərtə ɗa ɗimikur. 8 Nakə tsəu, char nyi mənakəkur nə mava ngha, aka ka mbandər na cha a huɗə Tlakəu. Macha bikə tsa ya, yau, ba'a ka tsəya ɗa na kərngha! Mya gwa'atə ko yi na ya nə ada ngha?>>
9 Ngə Jonatan tə na, <<A do ɗa wa! Macha a zəndə tə ya ənda ada ɗa na jigadəma mərtə nghə ɗimikur ya, a da yo nda nar nghə ma?>> 10 Ngə Dauda tə jawa, <<Wo nar ɗa ma ada nghə tə wumə nə nghə na huɗatla?>>
11 Ngə Jonatan tə na, <<Anda ma təra gwa takəu.>> Ngə nda təra kya'a nda.
12 Kəl ngə Jonatan tə nar nyi nə Dauda, <<Səmnda tə ya fəla na Tlakəu, Hyel nə Isra'ila, saka nənnə fərpəchingə zəkə eo ɓu ɓəli təkəra ɓwanya na, macha ana jigadəma mənakə cha təwa ngha, yo sətə nghə kurakəu ga ka zəndi. 13 Kəl ja, macha jigadəmar mərtə nghə ɗimikur da ku kəra ada ɗa, ya a da ya dəkar nghə wa, Tlakə cha tlanda ɗa nəuma ɗimiɗimi. Ga Tlakə ngya tsa'a na ka, wi nda cha ngya tsa'a na ada ɗa. 14 Kəl ja, macha tsəuta ɗa na pi, ka char ɗa mənakəkur wi nda Tlakə tə char ɗa, tsa nja da tsəya ɗa. 15 Mada ahir tə ɗa tsəu, ngwa ka da ngyar char nyi mənakəkur nə njir ki ɗa wa, mada ahir Tlakə tə kuɗənda njir dawa nghə tə dunəya.>>
16 Ngə Jonatan tə mbandər na njir ki Dauda, cha na, <<Ga Tlakə kisəkur təkəra njir dawa Dauda.>> 17 Ngə Jonatan tə nar nyi nə Dauda cha səmnda fəla ənda cho nyidatə nyi, aka Jonatan kwa nyida Dauda wi nda cho nyida kərnyi.
18 Ngə Jonatan tə nar nyi nə Dauda, <<Əzəkə ladər taɗər hya. Ma ka ɗa shong njo ngabiya, aka mbwar ngya nghə kwa ɗa jwajwa'a. 19 Fərpəchingə zəkəu njo ngabiya təkəɗəkura shongkura ka, aka ənga ma'i ya tə mbwar mbu nghə nda haaɗa nda, ka yi mbuta nghə biyahir hangu Ezel. 20 Yo handa hafə makər ya tə yimbilya hangu nda wi vanya sə da yo ha. 21 Yo sə zər cha gwa'a hafə inda, ma ya nar nyi, <Ndzama, ja ingə hafə inda ləhə dzə nghə ka fa'atə ka shili ni,> kəl ba'a ka zəbiya ka shili, a char tə ənda sə do ɗa nakə wa. 22 Kəl ja, ma ya nar nyi nə zər nda, <Ndzama, hafə inda biyama ngha,> yau, kəl ba'a ka təra, aka Tlakə səu nghə tə ku laku ka təra. 23 A təkəra alkawal nda ma mər tsəu, Tlakə ngə matauli ku pama ma na ka.>>
24 Kəl ngə Dauda tə mbuta nyi ku fa nda, nda ladər taɗər hya tə shili tsəu, ngə təl tə ngya ka səma. 25 Cha ngya ta nyi tangnda cha tsəlna ngya ti, ndo ndzamə dzə na Jonatan, Abna tsə'u tə ngya ləhə dza Saul, kəl ja, mbwar ngya Dauda tə ɗa jwajwa'a. 26 Saul da ndər pəshinda wa, aka cho har ənda, <<Vanya sə da ɗa na Dauda, nda tə mərtə nyi dyadyaɓə tsa ladər nda, kəpal da wa, a da cha na karti wa.>> 27 Kəl ja, vanya zəkəu, a tə mətləkunya pəchi nə hya nda, mbwar ngya Dauda jwajwa'a səkəu. Ngə Saul tə nar nyi nə zər nyi Jonatan, <<Mya gwa'atə a zər Jessi da shili tə mbwar səm sərsum əna ndara ənya wa?>>
28 Ngə Jonatan tə wuma, <<Dauda tə gədi ɗa tsa'anyata ya ngya nyi cha təra gwa Baitalami. 29 Cha nar ɗa, <Ngya ɗa ya ma'i, aka ku ki kəea njo lə ga'a ku ta mələm, ya zamə ɗa tə nar ɗa ya gwa. Macha a uya tə ya kwambiyakur tə lya ka, ngya ɗa ya ma'i ya ki la'a ka zamə ɗa.> Nacha nga gwa'atə a da cha shili tə mbwar səm sərsum wa.>>
30 Huɗa Saul tə tla tsa Jonatan 'ual'ualəu, ngə cha nar nyi nə Jonatan, <<Nakə zər mala bwalbwal mala tlə mwali na! Abəra a da ya zəndə ənda ko chi hi nə zər Jessi ma? Ko nə nyi kuzhi nə kərnghə ana ama nghə nan ja! 31 Ma a wur ɗa tsəutanyi Dauda na pi, a təlkur nghə ndara kərnghə do chiyadzə wa. Sakana ma'i ka ki shili na cha, aka tuku nja tsəya nyi!>>
32 Ngə Jonatan tə jau ada nyi, <<Mya gwa'atə njo tsa nya? Mi cha məra?>> 33 Kəl Saul tə vakə masə nyi yakəra Jonatan ka cha tsəya nyi. Təwa ənga, Jonatan tə ngabiya ənda jigadəmar tsəya Dauda da ku kəra ada nyi.
34 Kəl Jonatan tə hya'atə na huɗatla tə mbwar səm sərsum nda, pəshir mətləkunya pəchi nə hya nda a da cha səm sərsum wa, aka huɗa cha tla tə tsa sər kuzhi nda ada nyi tə mər nə Dauda.
35 Əmbudla Jonatan tə biya təra gwa takə ka nda ki ɓə na Dauda, na nda na vanya zər kushiu. 36 Ngə cha nar nyi nə zər nda, <<Hwi ka ki gwa'a hafə inə yo handa ina.>> Nda zər ndo hwi, ngə cha ha hafə biyama nyi. 37 Nda zər nda tə yi tangnda hafə Jonatan tə səya ti nda, ngə Jonatan tə nga nyi ga na, <<Tsəu tanyi hafə nda biyama ngha.>> 38 Ngə cha nar nyi nə zər nda, <<Kusa! Ma'i kusəkusəu, ngwa ka da ta'i wa!>> Ngə zər nda tə hətə hafə nda ga ɓəl shili da tlakə nyi. 39 Kəl ja, a zər nda da zəndə dəhə sə ingə wa, kəl ndara ka Dauda ana Jonatan ngə tə zəndi. 40 Kəl ngə Jonatan tə nə nyi balmi nyi nə zər nda ga na, <<Ɓəl nə gu mələm.>>
41 Ahir zər nda tə təra, ngə Dauda tə biya tangnda cha mbu ti, a hir hangu inda, ga zəbiya uzhi huɗə Jonatan zhaka makər ana huɗəma cha hu'i. Kəl ngə nda gaɓətə dzə ndo tiwi, kəl ja, Dauda ngə tə tiwi 'ual'ualəu.
42 Ngə Jonatan tə nar nyi nə Dauda, <<Ma'i ku piyarɗufəu, aka a səmənda tə ma fəla bazhikur nə kərnəma ku tləmər Tlakəu, ənda, <Tlakə ngə matauli ku pama ma naka, ana ku pama nyandəla ya ana nyandəla ka ba'anawa.> >> Ngə Dauda tə təra, Jonatan tsə'u tə ɓəl gu mələm.