Saul tə Gwa'a Tsəya Dauda
19
1 Saul tə nar nyi nə zər nyi Jonatan ana dəhə kadakaliya nyi nda tsəya Dauda. Kəl ja Jonatan kwa ngatə məsəɗakə na Dauda. 2 Ngə cha təɗəhimi nə nyi ga na, <<Ada ɗa Saul kwa gwa'a laku ka cha tsəya ngha. Aka ənga, ka ngya na ɓəla əmbudla zəkəu, təra ka ki uya mbwa ka mbutangha. 3 Naya tsə'u yo biya ta'itaɗa dza ada ɗa tə tə babal tangnda ka mbu ti. Yo ɓwanya nə nyi təkəra ka, ga ya dəkar nghə sə nda ya ngabiya tsa cha.>>4 Jonatan tə faliya Dauda nə Saul ada nyi ga nar nyi, <<Ngwa təl da mərtə nyi bikə nə mava nyi Dauda wa, aka a da cha mərtə nghə bikə wa, ya sə nda cha mər ɗa tə na sakəda nə ngha. 5 Cha sənda pya cha ku bəji nda cha tsəya ndər Filisti nda. Tlakə tə nə nyi kura dəgal nə njir Isra'ila, nakə ma'a la'a tə ka ga mər hirgyaɗi. Mya gwa'atə ko mərtə nyi ɗimikur nə ndə kəla bikə wi Dauda, ko gwa'a ka tsəya nyi ɓwa'atanya?>>
6 Ngə Saul tə səhimi da Jonatan ga səmnda fəla, cha na, <<Vəlvəl a səmnda tə ya fəla na tləmər Tlakəu, da njo tsəya nyi wa.>>
7 Ngə Jonatan tə nga Dauda ga par nyi dəhə sə inda nda pə na Saul. Ngə cha yi na Dauda huɗə Saul, cha yi ngya wi nda parakəu.
8 Ngə pah tə ɓəla hya'atə səkəu, ngə Dauda tə biya pah njir Filisti. Cha pah nda na dunama ngə nda təra na hwi.
9 Kəl ja, shanguɗə ɗimi hya'atə tsa Tlakə tə səya təkəra Saul ku bəji nda cha tə ngya ku ki nyi ana masə ku cha cha. Dauda tsə'u kwa tsa zəmbəl, 10 Saul tə gwa'a kukwanda nyi dza bangu ana masəu, kəl ja, Dauda tə tyatənda ngə masə nda tə tsokudzə gu bangu. Ku vu'i nda Dauda tə mbəɗa, ga hwita nyi.
11 Ngə Saul tə sə nji yo ki Dauda nda yi ɓəla nyi nda tsəya nyi mbudla. Kəl ja, Mikal mala Dauda tə təɗəhimi nə nyi cha na, <<Ma a ka hwi na pya ka əvu'i nə wa, əzəkə njo tsəya ngha.>> 12 Kəl ngə Mikal tə ləbiya Dauda təwa kagapəu, ngə cha hwita nyi ga mbəɗa. 13 Ngə Mikal tə hətə katə ga pinda tə gangər, ga fiya nyi sərdəhəkər nə shishi kua, ga tulndzə nyi sərtula.
14 Nda Saul tə sə nji ka nda tsəya Dauda, kəl Mikal tə na, <<A da cha yiying wa.>>
15 Ngə Saul tə ɓəla sə nji inda ka nda yi la'a Dauda ga nar nda, <<Anda ma na cha tə gangər nyi ka ga ya tsəya nyi.>> 16 Kəl ja, ma nji inda gwa, kəl janə katə tə gangər, ana shishi kua ki təwa kəra cha.
17 Ngə Saul tə nar nyi nə Mikal, <<Mya gwa'atə ka shandə ɗa kər wi nə ga lənda ndər dawa ɗa ka ga cha mbəɗa?>> Ngə Mikal tə nar nyi nə Saul, <<Cha nar ɗa, ma a da ya ngya nyi cha təra wa cho tsəya ɗa.>>
18 Nda Dauda tə təra na hwi ga mbəɗa, cha təra ya da Sama'ila vu Rama, ga yi nar nyi dəhə sə nda Saul tə mərtə nyi. Ngə Sama'ila tə təra yi Nayot. 19 Ngə nja nar nyi nə Saul ənda, <<Wula Dauda vu Nayot a hi Rama.>> 20 Ngə cha sə nja yi səya nyi. Kəl ja, manda yi nda la'a dzuku njir mətakər kwa takər ana Sama'ila biyaman nda, ngə Shanguɗə Hyel tə səya təkəra nji inda Saul tə sə nda, nanda tsə'u nda takər. 21 Nda Saul tə ngatə ənga, ngə cha ɓəla sə alenya nji, nanda ma'a nda takər. Saul tə ɓəla sə alenya nji makərkunyi, nanda ma'a nda takər. 22 Kəl ngə Saul təkərnyi tə təra yi Rama ga ya dza ka'ur ɓiti dəgal nda vu Seku. Ngə cha jawa, <<Aman ka Sama'ila na Dauda?>>
Ngə nda nar nyi, <<Wula nda vu Nayot a hi Rama.>>
23 Aka ənga Saul tə təra yi Nayot a vu Rama. Kəl ja, Shanguɗə Hyel tə səya ma'a təkəra cha, nacha ma'a cha ghəya takər tsa'a vu Nayot. 24 Cha səɗənda dzaki dzə nyi cha biyama na takər a mar Sama'ila. Cha piya dura'a pa'apəchi həmhanyi. Nacha gwa'atə nja ghəya pə karapəu bəra, <<Saul ku pama njir mətakər ma'a nacha ya?>>