Saul tə Ngatə Sələkəkur Dauda
18
1 Ahir Dauda tə wurandə ɓwanya na Saul, kəl ɗufwa Dauda tə hətə Jonatan, ngə cha go nyida nyi wi pya cho təɗa. 2 Fwatə pəshinda Saul tə gəziya Dauda, a da cha zhaka i cha ɓəl yo ki ada nyi wa. 3 Ngə Jonatan tə mbandər na Dauda aka Jonatan kwa nyida Dauda wi pya cho təɗa. 4 Ngə Jonatan tə səɗənda ləkutə nda dzə nyi nda ga nə nyi nə Dauda, ana kar nyi ana ma'a katsakər nyi, laga nyi ana gyarakən nyi.5 Kala sə nda Saul tə sə nyi cha ki məra, kəl Dauda kwa mərtə ya cho kwasa, aka ənga cha mərtə nyi ka gau ləvaləva. Dəhə nji tə mər hirgyaɗi dəhə ka mavi'i Saul.
6 Nda nji kwa ɓəl kyo ki ahir Dauda tə tsəya ndər Filisti nda, mahi'i tə zəbiya ku dəhə mələm Isra'ila na miya ka nda ɓə na təl Saul, ana miya hirgyaɗi ana gədzəgədzə ana zəmbəl. 7 Ndo utsə ndo na miya bəra,
<<Saul tə kuɗənda dəbu dəbu, kəl ja,
Dauda tsə'u tə kuɗənda dəbu dəbu zhaka kuma.>>
8 Miya ngə tə tliya huɗa Saul, cha na, <<Nda na Dauda tə tsəya nji dəbu dəbu, kəl ja, naya dəbu tanyi tsəya ya, mya ɓəla həya nyi dzə matsa təlkura?>> 9 Fwatə pəshinda Saul tə go ndzamə Dauda na li ɗimi.
10 Vanya zəkəu, shanguɗə ɗimi hya'atə tsa Hyel tə səya təkəra Saul na dunama. Ngə cha ghəya ɓwanya ku ki wi ndər mələm, Dauda tsə'u kwa dəgə zəmbəl nə nyi wi nda cha tsəlni. Saul tsə'u na masə ku cha cha 11 cho na ku ɗufwa cha, <<Yo kukuya Dauda dza bangu.>> Zhaka mətləu saul tə vakə Dauda, kəl ja, Dauda tə tyatənda.
12 Ngə ləvər tə səya Saul tsa Dauda, aka Tlakə tsa'a na Dauda, kəl ja, Tlakə wurta təkə na Saul. 13 Aka ənga Saul da zhaka i Dauda ngya na cha wa, kəl ja, cha fiya nyi dəgal təkəra nji dəbu, ya Dauda tsə'u tə maka nəu na nji inda ku pah. 14 Ku kala sə nda cho məra, kəl cho kwasa, aka Tlakə tsa'a na cha. 15 Nda Saul tə la'a ənda Dauda kwa biyama na kwasa, ngə cha tsakətə ngatə ləvər nyi. 16 Kəl ja, dəhə njir Isra'ila ana njir Yahuda kwa i Dauda, aka cha nəu na nda ku pah.
17 Ngə Saul tə nar nyi nə Dauda, <<Janə kwa'alə ɗa Merab. Ma ka mər tlər na'a na kwalkwalkur ga panda pah nə Tlakəu, yo nə nghə nyi cha ɗa ka mala ngha.>> Aka Saul tə na ku ɗufwa cha, <<A da yo ha cha ya ka tsa nyi wa. Njir Filisti tanyi kwa tsəya nyi!>>
18 Kəl ja, Dauda tə nar nyi nə Saul, <<Wa ya? Wa ngə nji kəea ndara nyavi ada ɗa ku Isra'ila nda yo nau ɗa ka sələkənya təla?>> 19 Kəl ja, nda bəji tə shili ka njo nə nyi Merab, kwar Saul nə Dauda, ngə nja ɗəunda nyi nə Andriyel ndər Mehola.
20 Mikal kwar Saul kwa i Dauda, nda nja nar nyi nə Saul, ngə cha ngatə məsəɗakə ni. 21 Ngə cha na ku ɗufwa cha, <<Yo nə nyi, aka ga cha ɗa ka sə ndo gwa'atə cho tə ku cha njir Filisti.>> Aka ənga, ngə Saul tə nar nyi nə Dauda, <<Sakana a uya tə kə laku səkəu ka ko ɗa ka sələkə ɗa.>>
22 Ngə Saul tə nar nyi nə ka kadakaliya nyi, <<Ɓwanya ma nə Dauda tə ɗəwa, hya nar nyi, <Janə təl kwa ngatə məsəɗakə na ka, ya dəhə kadakaliya nyi kwa i nghə gagaɗa, sakan ja, ɗa ka sələkə nyi.> >>
23 Ngə nda yi dəkar nyi əngə nə Dauda. Kəl ja, Dauda tə na, <<Ɗa ka sələkənya təl ya sə kukush ngə ya? Naya ndə ɗaliɗali ya, ya nji ndo zəndə ɗa tsaɗə tanyi.>>
24 Manda kadakaliya Saul inda tə nar nyi sə nda Dauda tə na, 25 ngə Saul tə wuma, <<Nar nyi ma nə Dauda ya, <A təl do gwa'a gəna gadlə matsa ka nə nyi chichir zhumbulum nə njir Filisti 100, ka ga ka kinda nyi səkur nə təl wa.> >> Aka Saul kwa i njir Filisti tsəya Dauda.
26 Manda kadakaliya inda tə nar nyi əngə nə Dauda, ngə cha ngatə məsəɗakəkur na cho ɗa ka sələkənya təl. Təvi bəji nda nja ɓatliya ka hədzə nda shili, 27 Dauda ka nji nyi tə təra ga ki tsəya njir Filisti 200. Cha shili nə nyi chichir zhumbulum kənda dəhə nə təl ka ga cha ɗa ka sələkənya təl. Ngə Saul tə nə nyi kwa nyi Mikal ka mala nyi.
28 Nda Saul tə ngabiya ənda Tlakə tsa'a na Dauda, ya kwa nyi Mikal kwa i nyi, 29 ngə Saul tə tsakətə ngatə ləvər nyi, ngə cha ɗa ka ndər dawa nyi ku dəhə ngya nyi.
30 Wawa'ar ləvaləva njir Filisti tə biyama na biya ka pah, kəl Dauda kwa kura ndiyamatsa alenya wawa'ar ləvaləva Saul inda, kəl tləm nyi tə tiwi gagaɗa.