Dauda ana Goliyat
17
1 Kəl njir Filisti tə tsəmətə ləvaləva kənda ka pah a vu Soko ku hə'i Yahuda. Nda fiya mbwar tsəmdzə vu Efes Damim, ku pama Soko ana Azeka. 2 Ngə ka Saul ka njir Isra'ila tə tsəmətə dzə ku dakə Ela ga ɓatliyadzə ka pah ka njir Filisti. 3 Njir Filisti tə vanya dəgəl njir Isra'ila tə vanyi, ana dakə ku pama nda.4 Vanya ləvaləva Filisti da tləm nyi Goliyat, hya'atə ku mələm Gat, cha zəbiya ku mbwar tsəmədzə njir Filisti. Dzəgamkur nyi ndiya tə hi dləa. 5 Cha mbu mavəkə ndzə ku kəra cha ga handzə ləkutə ndzə nda tədəɓəkura cha shekel 5,000. 6 Cha hau hya cha ku sər mbu hi nə ndzəa, ga hakəu gwadang ndzə ku yimbilya cha. 7 Gəda masə nyi dwaɓwatlə kura cha wi zəwa ndzur, ana tədəɓəkura kyara masə nyi shekel 600, ndər hə ləgə nyi, kwa ma'i biyama nyi ana ləgə ku cha cha.
8 Goliyat tə hya'atə ga ɓwanya na kurakə dzəgamdzəgam nə ləvaləva njir Isra'ila cha na, <<Mya a gwa'atə hya zəbiya tənda dzə ka pah? A ndər Filisti ya ma, nahi tsə'u ya, a mavi'i Saul hi ma? Tabiya ma ndə cha shili da ya. 9 Macha nau pah ɗa ga tsəya ɗa, eo ɗa ka mavi'i kəhi, kəl ja, ma ya kura nyi ga tsəya nyi, hyo ɗa ka mavi'i kəea hyo mər mavakur nəea.>> 10 Kəl njir Filisti tə na, <<Ənya a həya təya tə ləvaləva njir Isra'ila! Na'a ma ndə zhang ea pah kərnəea.>> 11 Nda Saul ka njir Isra'ila tə ngatə ngəna ɓwanya, ngə ləvər tə səya nda.
Dauda tə Mbwar Tsəmədzə Njir Isra'ila
12 Dauda zər ndər Ifərem cha tləmə nyi Jessi, hya'a vu Baitalami ku Yahuda. Nguli shili Jessi chisəu, ya aku bəjir Saul a hal tə cha. 13 Nguli shili Jessi makər inda wawa'a tə nəu Saul kya nya pah, zər tangərma nyi tləmə nyi Eliyab, mətləkunyi, Abinadab, makərkunyi tsəu, Shama. 14 Dauda ngə kushiu. Nguli shili wawa'a makər inda tə nəu Saul kya nya pah, 15 kəl ja, ka pəchi ka pəchi Dauda kwa maka ɓəl gwa Baitalami ka ɓəla kətəng ada nyi.
16 Hanyi fwaɗəkumnyi mbudla na akəu, njir Filisti kwa maka dlinyar njir Isara'ila.
17 Ngə Jessi tə nar nyi nə zər nyi Dauda, <<Hətə eafa uhi tsatsa ana gwazhilakə takwara kum na, nə ka zamə ngha, kusa ka təra nə gwa tə mbwar tsəmədzə kənda. 18 Ka mari dəhə ka kaɓəkaɓər gwazhilakə kum ingə nə gau dzuku kənda. Ka gwa la'a ndara aman kə'i zamə ngha, ka shili na sə nda kwa char ɗa ənda yiying ta nda. 19 Təl Saul, kə'i zamə ngha ana dəhə njir Isra'ila ku dakə Ela nda, ndo pah ka njir Filisti.>>
20 Kaɗə mbudla Dauda tə ngyar kətəng ka njir ɓəla, cha fa'atə sə inda ga go laku, wi nda Jessi tə nar nyi. Cha yo mbwar tsəmədzə nda ku bəji nda ləvaləva i'i kwa biya nya pah, ndo pə kurakər pah. 21 Njir Isra'ila ana njir Filisti tə biya tiya dzəa, ndo ndzamə kərnənda. 22 Ngə Dauda tə ngyar kar inda nə ndər ɓəla kari, ga təra na hwi ya tə mbwar pah, ga yi jawar ka zamə nyi ndara aman ɗa nda. 23 Nda cho ɓwanya na nda, ndə kwalkwala nə njir Filisti hya'atə vu Gat, Goliya tə zəbiya ku huɗa ləvaləva njir Filisti, cho pə chul ɓwanya nda haaɗa nda, ya Dauda ngatə ti. 24 Nda njir Isra'ila tə la'a ndə nda, ngə ləvər tə səya nda ngə nda təra na hwi.
25 Nda na, <<La'a tə hi ənda ndə nda zəbiya tsə'u wa? Cha zəbiya ka cha həyatə njir Isra'ila. Dəhə ndə nda tsəya nyi təl kwa nə nyi gəna 'ualəu, cho nə nyi kwa nyi tsə'u cha həbiya ka mala nyi, ya cho həbiya dəhə njikə nda ku tsachi vu Isra'ila.>>
26 Ngə Dauda tə jau nji inda ta'i dzə nyi nda, <<Mi njo mərtə nyi nə ndə nda tə tsəya ndər Filisti nə ga hənda həyatəvi nə njir Isra'ila? Wa ndər Filisti ndə kəla tla bədzang kwa ngəl ləvaləva Hyel nda na pya?>>
27 Nda ɓəla dəkar nyi sənda nda na nda, bəra, <<Janə sə nda njo mərtə nyi nə ndə nda tə tsəya nyi.>>
28 Nda Eliyab, zə'ual ka Dauda tə ngatə ənda cho ɓwanya na nji inda, ngə huɗa cha tla tsa Dauda, ga jawa, <<Mya gwa'atə ka shili tangna? A nə wa ka ngya nyi na kətəng yiɗau inda kwa dadil takəa? Kwa zəndə ya kəla ngatəndərkur ngha ana dzaukur ngha, ka shili ka ga ndzam pah tanyi na.>>
29 Ngə Dauda tə wuma, <<Saka nə ya, mi mər ya? A tsə'u ya ndər bada ndər wa ya?>> 30 Ngə cha sha ya kəra vanya ndə pam ga ɓəla shili na ɓwanya nda tanyi, ngə nji inda tə wum nə nyi wi nda tanyi. 31 Nji ngatə tə sənda Dauda tə na ya ngə nja nar nyi nə Saul, ngə Saul tə sə nja nga nyi.
32 Dauda tə nar nyi nə Saul, <<Ngwa ɗufwa madawa da tsəya dzə aka ndər Filisti nə wa, naya mava nghə kwa yi pah nyi.>>
33 Ngə Saul tə ɓəlakə nyi, <<A da ko nau biya ki pah ndər Filisti nə wa, zər ka ya ndə nga ndər pah cha fwatə ku tlakalakur nyi.>>
34 Kəl ja, ngə Dauda tə nar nyi nə Saul, <<Aləvari, ma yo ɓəla kətəng ada ɗa, Ma ləvari ndara kəlikəndzau tə shili səya kətəng ku chiɓi, 35 yo gədlə nyi, yo dəgə nyi ba dləuya kətəng nda ku nya cha. Macha shangə ɗa yo səya nyi tə shishi nyi, yo dəgə nyi ba tsəya nyi. 36 Mava nghə tsəya tə ləvari ana kəlikəndzau, ndər Filisti kəla tla bədzang nə kwa ɗa tang wi na nda, aka cha ngəl ləvaləva Hyel nda na pi. 37 Tlakə nda tə dləuya ɗa ku nya ləvari ana kəlikəndzau, kwa dləuya ɗa tsa ndər Filisti na.>> Ngə Saul tə nar nyi nə Dauda, <<Ma'i, ga Tlakə nəu na ka.>>
38 Kəl ngə Saul tə pəndzə nyi kar pah nyi nə Dauda. Cha handzə nyi ləkutə pah ga mbu nyi mavəkə ndzə ku kəra cha. 39 Dauda tə hawulya katsakər təkəra ləkutə lyang nda ga dzar ma'i ni, aka a cha tsəl nə wa.
Ngə cha na, <<A da yo nau ma'i ku sə nə wa aka a da ya tsəl nə wa.>> Ngə cha səɗə nda. 40 Kəl ngə cha hətə zəwa nyi ku cha cha, cha ɗəmtsə hangu ɗakərɗakər tufu ku dlələm, ga pəu ku ɗakwata ɓəla sərshishi nyi, ana gavərdəng nyi ku cha cha, ngə cha tsaɗə tə dzə ya dza ndər Filisti nda.
41 Ndər Filisti nda kwa ya kəra Dauda, ana ndər hə ləgə nyi biyama nyi. 42 Cha ndzamar Dauda ga la'a ənda jan cha zər tlakala yiyinghəu ya gumaguma, ngə cha həyatə cha. 43 Cha nar nyi nə Dauda, <<Həya kura ya ko shili na zəwa kəraya ya?>> Ngə cha shi'u nda Dauda na tləmər sə inda njir Filisti kwa həsəli nə nda. 44 Cha na, <<Anda tangna yo nə nyi kum nghə nə eakə huɗamələm ana kum takəu.>>
45 Ngə Dauda tə nar nyi nə ndər Filisti nda, <<Ko shili da ya ana katsakər ana masəu ba'a gwadang, kəl ja, naya yo ya kəra ka ku tləmər Tlakə Ndər Gyalkur, Hyel ləvaləva njir Isra'ila, nda ka həyatə nda. 46 Ənya Tlakə kwa na'a nghə yo tsəya nghə yo tlanda kəra ka. Ənya yo nənyi kumər dza ləvaləva njir Filisti nə eakə ana kum takəu, ya dəhə dunəya kwa zəndə ənda, Hyel da vu Isra'ila! 47 Dəhə nji nə tangnə na kwa zəndə ənda a da kəl ana katsakər ndara masə ngə Tlakə kwa dləuya nji nyi wa, aka pah nə Tlakə nga, ya cho nəea hi ku cha ea.>>
48 Nda ndər Filisti nda kwa shili ləhə ka cha pah nyi, ngə Dauda tə hwi yi tə mbwar pah nda ka cha ɓə na cha. 49 Cha hau cha cha gu ɗakwata nyi ga tabiya hangu, ngə cha fəu ku gavərdəng ga chultə ga vakəya ndər Filisti nda ku nyama cha, ngə cha dla tsupə tənya səya hu'i.
50 Ngə Dauda tə kura ndər Filisti ana gavərdəng ana hangu, cha dəgə ndər Filisti nda ga tsəya nyi a da na katsakər ku cha cha wa.
51 Ngə Dauda tə hwi ga yi ta'ita nyi təkəra cha. Ngə cha tsəbiya katsakər ndər Filisti nda ku kiki nyi ga gəganda kəra cha ni.
Nda njir Filisti tə la'a ndə kwalkwal kənda tə ti, ngə nda sha ga mə na hwi. 52 Kəl ngə njir Isra'ila ana njir Yahuda tə səma nda na pə kurakəu, nda gədlə nda tsa'a biya nya lakur Ekron. Njir Filisti inda nja takasiya kwa dlədla ku laku, fwatə ku lakur Sha'arayim tsa'a vu Gat ana Ekron. 53 Nda njir Isra'ila tə ɓəl shili tə mbwar gədlə njir Filisti, ngə nda fa'aya kwazhalɓi sə inda ku mbwar tsəmədzə njir Filisti. 54 Ngə Dauda tə hətə kəra ndər Filisti nda ga shili nə vu Urshalima, ga piya balmi ndər Filisti nda ku madləɓa nyi.
55 Ku bəji nda Saul kwa ndzamə ənda Dauda kwa ma'i ka cha yi ɓə na ndər Filisti nda, ngə cha nar nyi nə Abna ndər nəu na ləvaləva bəra, <<Abna, zər wa ngə tlakala nga?>>
Ngə Abna tə wuma, <<Aləvari, a da yo zəndə wa.>>
56 Ngə təl tə na, <<Gwa'abiya ndara zər wa ngə tlakala nga.>>
57 Nda Dauda tə ɓəl shili hya'atə tə mbwar kuɗə njir Filisti, Abna tə hətə nyi ga shili na cha huɗə Saul, tsə'u tanyi na kəra ndər Filisti nda ku cha cha.
58 Ngə Saul tə jawa, <<Zər wa ka.>>
Ngə Dauda tə na, <<Naya zər mava nghə Jessi ndər Baitalami na.>>